ᤁᤥᤕᤧᤶᤒᤠ ᤂᤧᤍᤠ᤹ᤀᤥ 'ᤖᤢᤔᤣᤖᤧ ᤁᤢᤛᤧᤵᤔᤠᤱ'

- ᤒᤤᤖᤠᤃᤡ ᤁᤠᤀᤡᤗᤠ

᥇. ᤐᤠ᤺ᤴᤈᤠᤱ

ᤛᤠᤵᤛᤰᤗᤧᤴ ᤁᤢᤜᤧᤴᤈᤡᤗᤠ (ᤐᤖᤡᤓᤠᤛᤠ) ᤁᤧᤒᤡ᤹ᤒᤠ ᤛᤠᤶᤏᤡᤒᤠᤜᤠ᤹ᤖᤧ ᤛᤠᤵᤛᤰ ᤛᤈᤢᤶᤔᤡᤒᤠ ᤔᤡᤰᤌᤠᤶᤒᤣ ᤖᤥ ᤔᤧᤒᤠ᤺ᤳᤋᤢ ॥ ᤛᤧᤰᤂᤠᤀᤣ ᤔᤧᤒᤠ᤺ᤳᤋᤢ ᤐᤠ᤺ᤵᤔᤠ ᤛᤢᤰ ॥ ᤛᤠᤵᤛᤰᤗᤧᤴ ᤐᤖᤡᤰᤐᤖᤡᤰᤐᤠ ᤜᤧᤴᤗᤠ (ᤒᤡᤎᤠ) ᤜᤠ᤹ᤀᤥ ᤁᤧᤖᤧᤰ ᤜᤧᤴᤏᤡ᤺ᤵᤐᤠ / ᤔᤠᤜᤠ᤹ᤖᤧ ᤏᤠᤔᤧ᤺ᤴᤏᤢ᤹ᤖᤢᤒᤠ ᤂᤧᤍᤠ᤹ᤀᤣ ᤖᤥ ॥ ᤌᤣᤀᤠᤱ ᤂᤧᤍᤠ᤹ᤀᤡᤴ ᤏᤠᤔᤧ᤺ᤴᤏᤢ᤹ᤖᤢ ᥅ ᤛᤣ᤺ᤴᤍᤥᤖᤧ ᤏᤥᤃᤵᤐᤥ ᤀᤰᤂᤧ ᤐᤠ᤺ᤵᤔᤠ ᤛᤢᤰ - ᤂᤧᤍᤠ᤹ ᤁᤢᤏᤠᤀᤡᤒᤣ᤺ᤰ (ᤖᤢᤵ, ᤀᤠᤁᤠᤖ) ᤋᤠᤱᤒᤠᤛᤠᤱ ᤐᤍᤠᤱᤍᤠᤱᤒᤠ ᤔᤧ᤺ᤴ, ᤁᤣ᤺ᤶᤛᤠᤱ ᤐᤃᤣ᤺ᤶ -ᤃᤣ᤺ᤶᤒᤠ ᤔᤧ᤺ᤴ ॥ ᤁᤢᤗᤢᤶᤔᤥᤒᤠ ᤁᤢᤃᤣ᤺ᤴ ᤁᤧᤃᤵᤐᤠ ᤂᤧᤍᤠ᤹ᤀᤡᤴ ᤛᤰᤔᤠᤎᤡᤰᤁᤥ ᤁᤢᤛᤡᤱ - ᤌᤡᤰ-ᤅᤠ ᤐᤣᤔᤢᤰᤛᤡᤃᤠᤱ ᤕᤢᤱᤔᤠᤀᤠᤱ ᤏᤡ᤺ᤵᤔᤠ ᤀᤠᤛᤢᤖᤢᤶᤗ ᤐᤥ᤺ᤱ ॥

ᤛᤠᤶᤏᤡᤒᤠ ᤐᤕᤶᤛᤠᤶᤒᤠ ᤗᤰᤜ᤻ᤔᤡᤐᤪᤛᤠᤍ ᤍᤣᤘᤁᤥᤳᤋᤠᤖᤧᤴ ᤜᤧᤴᤈᤡᤗᤠ ᤀᤡᤛᤡ᤺ᤰ ᤂᤧᤍᤠ᤹ᤀᤡᤴ ᤗᤳᤌᤡᤰ ᤆᤢᤰᤛᤠ ᤂᤠᤶᤒᤣ᤺ᤰ ᤐᤥ᤺ᤋᤧᤳᤏᤠᤒᤠ ᤆᤢᤰᤛᤠ ᤜᤱᤒᤡᤳ ॥ ᤁᤴ ᤜᤱᤒᤡᤳᤗᤠᤶ ᤐᤠᤱᤗᤥᤒᤠ-ᤔᤠ (ᤐᤠᤋᤪ) ᤖᤧ ᤜᤡᤱᤔᤴᤏᤥ ᤁᤧᤈᤢᤰᤐᤠ ᤗᤳᤌᤡᤰ ᤜᤡᤴᤎᤥ᤺ᤰᤗᤠᤶᤒᤠ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤜᤠᤶᤃᤧᤴ ᤏᤠᤶᤕᤠᤵᤔᤡᤖᤧ ᤂᤢᤴᤜᤡ᤹ ᤜᤡᤱᤔᤴ ᤏᤢ ᤀᤡ᤺ᤳᤏᤡ᤺ᤶᤜᤠ᤹ ᤘᤠᤏᤧᤶᤒᤠ (ᤛᤖᤗ) ᤏᤢ ᤏᤡᤱᤔᤠᤶᤒᤠ (ᤆᤡᤳᤋᤠᤁᤷᤛᤰ) ᤐᤖᤡᤰᤗᤧ ᤜᤰᤕᤠᤍᤡᤶ ᤆᤥ᤺ᤰᤔᤠ ᤛᤢᤰ ॥ ᤜᤰᤕᤠᤍᤡᤶ ᤆᤥ᤺ᤰᤔᤧᤸᤗ  ᤐᤥᤎᤰᤁᤡᤴ ᤏᤧᤷᤘᤧᤳ ᤁᤧᤛᤢᤒᤠ, ᤗᤢᤱᤔᤠ᤹ ᤁᤧᤜᤡ᤺ᤶᤒᤠ, ᤏᤡᤱᤘᤠ᤹ ᤁᤧᤍᤠ᤺ᤵᤐᤠ, ᤛᤢᤶᤏᤢᤒᤠ (ᤀᤠᤍᤷᤛ) ᤐᤥ᤺ᤱᤔᤠ ᤆᤠᤜᤠ ᤆᤥ᤺ᤰᤁᤠᤱ ᤔᤧᤒᤠ᤺ᤳᤋᤢ ॥ 

᥈. ᤕᤠᤰᤌᤢᤱ ᤂᤧᤍᤠ᤹ᤖᤧ ᤛᤠᤵᤔᤢᤴᤎᤢᤶ

ᤕᤠᤰᤌᤢᤱ ᤂᤧᤍᤠ᤹ᤖᤧ ᤕᤠᤶᤓᤣᤀᤥ ᤌᤡᤰ-ᤏᤧᤳᤜᤡ᤺ ᤐᤠ᤺ᤴ ᤋᤥ᤺ᤶᤔᤠ ᤋᤃᤡᤀᤣ ᤕᤠᤰᤌᤢᤱ ᤛᤠᤵᤛᤰᤗᤧᤴ ᤛᤠᤵᤔᤢᤴᤎᤢᤶ ᤆᤢᤰᤔᤢᤰᤁᤥ ᤆᤧᤱᤔᤠ ᤆᤠᤜᤠᤒᤠ ᤆᤥ᤺ᤰ ॥ ᤐᤧᤶᤔᤢᤖᤠ-ᤆᤰᤔᤢᤖᤠ (ᤔᤦᤂᤡᤰ) ᤁᤧᤓᤧᤶᤒᤠ ᤀᤠᤏᤡ᤹ ᤕᤠᤰᤌᤢᤱ ᤐᤠᤱ-ᤛᤠᤵᤛᤰ (ᤗᤥᤰᤛᤠᤜᤡᤋᤩ) ᤏᤢ ᤔᤢᤴᤎᤢᤶ ᤛᤠᤵᤛᤡᤱᤔᤠ ᤜᤣ᤺ᤰᤋᤧᤒᤠᤀᤡᤴ ᤀᤠᤸᤗᤃ ᤁᤡᤵᤌᤡᤰᤁᤠᤱ ᤅᤠᤒᤠᤣ᤺ᤱ ᤋᤱᤒᤣ ᤁ᤺ᤠᤰᤋᤢ ॥ ᤕᤠᤰᤌᤢᤱ ᤛᤠᤵᤛᤰ ᤛᤰᤏᤡ᤺ᤶ ᤆᤥ᤺ᤰᤛᤧ ᤋᤩᤧᤀᤱᤛᤡ ᤛᤡᤖᤡᤈᤱᤃᤠᤖᤧᤴ ᤛᤠᤘᤠ᤺ᤴᤏᤡᤴ ᤀᤡ᤺ᤴᤍᤥ ᤕᤢᤱᤔᤠᤀᤠᤱ ᤕᤠᤰᤌᤢᤱ ᤛᤠᤵᤛᤰ- ᤛᤠᤵᤔᤢᤴᤎᤢᤶᤔᤡᤴ ᤛᤢᤶᤛᤡ ᤗᤰᤁᤥ ᤜᤠᤔᤠᤀᤡᤸᤗᤧ ᤀᤢᤛᤢᤖᤢ ᤐᤥ᤺ᤱ ॥ ᤁᤢᤛᤡᤱ - (᥇) ᤁᤢᤒᤢᤱᤕᤧᤶ ᤏᤠᤈᤡᤖᤡ ᤋᤱᤒᤣ ᥇᥍᥆᥊ ᤏᤢ ᥇᥏᥈᥊ ᤋᤱᤒᤣᤓᤰ, (᥈) ᤁᤢᤗᤢᤶᤕᤧᤶ ᤏᤠᤈᤡᤖᤡ ᤋᤱᤒᤣ ᥇᥏᥈᥋ ᤏᤢ ᥇᥏᥋᥊ ᤜᤧᤰᤁᤩᤠᤱ (᥉) ᤁᤥᤕᤧᤶ ᤏᤠᤈᤡᤖᤡ ᤋᤱᤒᤣ ᥇᥏᥋᥋ ᤏᤢ ᤀᤠᤸᤗᤥᤓᤰ ॥ ᤁᤴ ᤛᤢᤶᤛᤡ ᤗᤰᤂᤠ᤹ᤀᤥᤀᤠᤱ ᤕᤠᤰᤌᤢᤱ ᤂᤧᤍᤠ᤹ᤖᤧᤴ ᤁᤥᤕᤧᤶᤒᤠ ᤕᤧᤶᤖᤧ (ᤁ) ᤋᤃᤡᤒᤠ ᤗᤰ ᤕᤠ ᤋᤰᤑᤪᤧᤱ ᤕᤧᤶ (ᤐᤢᤷᤒᤠᤷᤎ ᤁᤠᤗ) ᤏᤠᤈᤡᤖᤡ ᤋᤱᤒᤣ ᥇᥏᥋᥋- ᥇᥏᥍᥊) ᤏᤢ (ᤂ) ᤀᤣᤃᤠᤱᤒᤠ ᤗᤰ ᤕᤠ ᤀᤣ᤺ᤰᤑᤪᤧᤱᤕᤧᤶ (ᤜᤳᤋᤖᤠᤷᤎ ᤁᤠᤗ) ᤏᤠᤈᤡᤖᤡ ᤋᤱᤒᤣ ᥇᥏᥍᥊ ᤏᤢ ᤀᤠᤸᤗᤥᤓᤰ ᤏᤧᤳᤜᤡ ᤗᤰᤁᤥ ᤜᤠᤔᤠ᤺ᤸᤗᤧ ᤛᤰᤏᤡ᤺ᤶᤔᤡᤴ ᤀᤢᤛᤢᤖᤢᤒᤠ ᤐᤥ᤺ᤱ ॥ ᤕᤠᤰᤌᤢᤱ ᤛᤠᤵᤛᤰᤖᤧ ᤌᤥᤒᤥᤖᤧ ᤛᤢᤶᤛᤡᤃᤣ᤺ᤰᤐᤠ ᤏᤠ᤺ᤳᤗᤠ (ᤏᤠᤈᤡᤖᤡ ᤋᤱᤒᤣ (᥇᥏᥋᥊-) ᤜᤣ᤺ᤰᤛᤡᤱᤀᤠᤱ ᤁᤳᤏᤠᤖᤰ ᤕᤠᤰᤌᤢᤱ ᤁᤥᤕᤧᤶᤒᤠ ᤛᤠᤵᤛᤰ ᤛᤠᤵᤔᤠ ᤜᤣ᤺ᤰᤋᤧᤀᤠᤱ ᤛᤢ᤺ᤛᤢ᤺ᤀᤠᤱ ᤋᤃᤡ ᤐᤥᤖᤧᤖ ᤐᤵᤐᤠ ᤐᤠ᤺ᤵᤔᤠ ᤛᤢᤰ ॥ 

ᤛᤠᤶᤔᤡᤗᤠ-ᤜᤧᤴᤗᤠ (ᤁᤠᤒᤩ-ᤒᤡᤎᤠ) ᤗᤧᤵᤛᤠᤱ ᤛᤢᤓᤠ ᤂᤷᤃᤐᤠᤜᤠᤍᤢᤖ ᤏᤧᤶᤒᤠᤱᤖᤧ ᤛᤠᤶᤔᤡᤗᤠ ᤛᤠᤵᤐᤴ ᤁᤡᤖ᤺ᤠᤳ ᤔᤡᤰ-ᤜᤴ ᤛᤠᤶᤗᤥ ᤒᤡᤁᤪᤶ ᤋᤱᤒᤣ ᥈᥆᥇᥈ (ᤏᤠᤈᤡᤖᤡ ᤋᤱᤒᤣ ᥇᥏᥋᥋) ᤗ᤺ᤴᤍᤧᤀᤠᤱ ᤌᤡᤰᤛᤡᤃᤣ᤺ᤰᤐᤠ ᤕᤠᤰᤌᤢᤱ ᤁᤥᤕᤧᤶᤒᤠ ᤛᤠᤶᤔᤡᤗᤠᤖᤧ ᤁᤢᤜᤣ᤺ᤰᤛᤡᤱ ᤐᤥ᤺ᤰᤂᤧᤒᤠ ᤘᤕᤧᤛᤠᤱ ᤁᤠᤈᤡᤔᤠᤴ ᤁᤴᤍᤱᤘᤠᤖᤧᤴ ᤁᤠᤖᤒᤠᤖ ᤂᤧᤍᤠ᤹ (ᤒᤡᤁᤪᤶ ᤋᤱᤒᤣ ᥈᥆᥇᥎ ᤕᤠ ᤏᤠᤈᤡᤖᤡ ᤋᤱᤒᤣ (᥇᥏᥌᥇) ᤗ᤺ᤴᤍᤧᤒᤠ ᤕᤧᤶᤔᤠᤱ ᤁ᤹ᤏᤠᤖᤰ ᤁᤥᤕᤧᤶᤒᤠ ᤕᤠᤰᤌᤢᤱ ᤂᤧᤍᤠ᤹ᤖᤧ ᤁᤢᤜᤣ᤺ᤰᤛᤡᤱ ᤐᤥ᤺ᤰᤂᤧ ॥ ᤁᤠᤈᤡᤔᤠᤴᤖᤧ ᤛᤠᤵᤋᤢᤒᤠ ᤁᤠᤖᤒᤠᤖ ᤂᤧᤍᤠ᤹ᤀᤡᤴ ᤁᤥᤕᤧᤶᤒᤠ ᤌᤡᤰᤛᤡᤃᤣ᤺ᤰᤐᤠ ᤕᤠᤰᤌᤢᤱ ᤂᤧᤍᤠ᤹ ᤖᤥ ॥ 

ᤜᤧᤰᤁᤣᤛᤠᤱ ᤜᤧᤴ ᤂᤧᤍᤠ᤹ᤐᤜᤡᤰ ᤁᤥᤕᤧᤶᤒᤠ ᤕᤧᤶᤗᤧᤴ ᤋᤃᤡᤒᤠ ᤗᤰ ᤕᤠ ᤋᤰᤑᤪᤧᤱ ᤕᤧᤶ (ᤏᤠᤈᤡᤖᤡ ᤋᤱᤒᤣ ᥇᥏᥋᥋ - ᥇᥏᥍᥊ ᤋᤱᤒᤣ) ᤛᤡᤃᤠᤱ ᤕᤠᤰᤌᤢᤱ ᤁᤥᤕᤧᤶᤒᤠ ᤂᤧᤍᤠ᤹ᤜᤠ᤹ ᤔᤧ᤺ᤴᤜᤠᤵᤋᤧᤴ ᤐᤠ᤺ᤵᤔᤠᤀᤠᤱ ᤛᤢᤰ ॥ ᤁᤥᤕᤧᤶᤗᤧ ᤀᤣᤃᤠᤱᤒᤠ ᤗᤰ ᤕᤠ ᤁᤢᤀᤣ᤺ᤰ ᤕᤧᤶ (ᤏᤠᤈᤡᤖᤡ ᤋᤱᤒᤣ ᥇᥏᥍᥋ ᤋᤱᤒᤣ) ᤒᤡ,ᤒᤡ, ᤔᤢᤖᤡᤱᤗᤠ ᤏᤢ ᤆᤴᤍᤪ ᤔᤠᤱᤕᤢᤱᤛᤡᤖᤧ ᤏᤠᤶᤎᤠ ᤛᤢᤰᤂᤡᤶᤏᤢ ᤗ᤺ᤳᤋᤧᤜᤢᤒᤠ ᤛᤰᤐᤣᤘᤠ ᤋᤢᤶᤍᤢᤶᤍᤥ ᤜᤧᤏᤠ (ᤏᤠᤈᤡᤖᤡ ᤋᤱᤒᤣ ᥇᥏᥍᥊) ᤗ᤺ᤶᤔᤠ ᤜᤣ᤺ᤰᤋᤧᤀᤠᤱ ᤁᤳᤏᤠ ᤕᤠᤰᤌᤢᤱ ᤛᤠᤵᤛᤰᤖᤧᤴ ᤁᤢᤛᤱ ᤛᤠᤵᤔᤢᤴᤎᤢᤶ ᤁᤢᤜᤣ᤺ᤰᤛᤡᤱ ᤐᤥ᤺ᤰᤂᤧᤓᤠᤱ ᤏᤡᤱᤈᤧᤵᤔᤠ  (ᤀᤏᤢᤔᤠᤏ) ᤛᤢᤰ ॥ ᤛᤢᤰᤂᤡᤶ ᤂᤠᤶᤄᤢᤖᤧ ᤕᤠᤰᤌᤢᤱ ᤐᤠ᤺ᤴᤏᤡᤴ ᤏᤡᤛᤠᤶᤜᤡᤶᤔᤥ ᤀᤥᤃᤠᤵ ᤆᤥ᤺ᤰᤔᤠ ᤜᤣ᤺ᤰᤋᤢᤀᤠᤱ ᤁ᤹ᤏᤠᤖᤰ ᤛᤠᤶᤔᤡᤗᤠ ᤏᤢ ᤂᤧᤍᤠ᤹ᤜᤠ᤹ ᤕᤖᤡᤰ ᤛᤠᤵᤔᤠ ᤜᤣ᤺ᤰᤋᤧ॥ ᤀᤠᤸᤗᤖᤰ ᤕᤠᤰᤌᤢᤱ ᤛᤠᤵᤛᤰᤗᤧᤴ ᤌᤥᤒᤥ ᤐᤥ᤺ᤱᤔᤠ ᤕᤧᤶᤔᤡᤴ ᤋᤩᤠ ॥ 

ᤁᤢᤒᤢᤱᤕᤧᤶ ᤏᤢ ᤁᤢᤗᤢᤶᤕᤧᤶ ᤂᤠᤖᤠᤰ ᤕᤠᤰᤌᤢᤱ ᤛᤠᤵᤛᤰ ᤏᤠᤈᤡᤖᤡ ᤋᤱᤒᤣ ᥇᥎᥊᥋ ᤏᤢᤀᤣ ᤛᤠᤵᤔᤠ ᤜᤣ᤺ᤰᤛᤡᤱᤒᤠ ᤘᤕᤧᤛᤠᤱ ᤜᤡᤴᤈᤠ᤹ ᤐᤡᤳᤜᤢ᤹ᤖᤧ ᤗᤠᤃᤡ ᤆᤢᤈᤢᤰᤛᤠ ᤌᤡᤶᤈᤡᤰᤐᤠ (ᤏᤡᤋᤡᤃᤳ) ᤂᤧᤍᤠ᤹, ᤏᤡ᤺ᤳᤜᤠᤶᤒᤠ ᤂᤧᤍᤠ᤹ (ᤛᤤᤜᤡᤰ ᤁᤌᤠ), ᤐᤠᤱᤂᤧᤍᤠ᤹ ᤏᤢ ᤔᤢᤴᤎᤢᤶᤔᤡᤒᤠ ᤂᤧᤍᤠ᤹ᤜᤠ᤹ᤗᤰ ᤛᤠᤵᤋᤧᤒᤠ ᤂᤥᤍᤧᤳ॥ ᤁᤴ ᤁᤢᤗᤢᤶ ᤕᤧᤶᤔᤥ ᤛᤠᤶᤔᤡᤗᤠ ᤏᤢ ᤐᤠᤳᤋᤡᤗᤠ ᤀᤡᤜᤠᤵᤑᤠ᤹ ᤛᤢᤸᤗᤡᤰᤗᤰ ᤛᤠᤵᤋᤧᤒᤠ ᤂᤥᤍᤧᤳ ॥ ᤏᤠᤈᤡᤖᤡ ᤋᤱᤒᤣ ᥇᥏᥍᥋ ᤏᤢ ᤀᤠᤸᤗᤥᤓᤰᤐᤠ ᤕᤧᤶᤔᤣ ᤕᤠᤰᤌᤢᤱ ᤂᤧᤍᤠ᤹ᤖᤧ ᤛᤧᤰᤂᤠᤒᤠ ᤁᤥᤕᤧᤶᤒᤠ ᤕᤧᤶ (ᤀᤠᤎᤢᤏᤡᤁ ᤁᤠᤗ) ᤐᤠ᤺ᤵᤔᤠ ᤛᤢᤰ ॥ 

ᤛᤢᤰᤂᤡᤶᤏᤢ ᤁᤧᤗ᤺ᤶᤒᤠ ᤏᤡᤳᤜᤠᤶ ᤛᤠᤵᤐᤴᤖᤧ ᤗᤠᤃᤡᤓᤠᤱ ᤛᤠᤶᤔᤡᤗᤠ, ᤛᤠᤵᤐᤰᤘᤠ ᤏᤢ ᤂᤧᤍᤠ᤹ ᤁᤧᤛᤠᤵᤐᤠᤜᤠ᤹ᤀᤥ ᤏᤧᤵᤐᤠᤸᤛ᤻ᤔᤠ ᤀᤡᤜᤠᤵᤐᤠᤜᤠ᤹ᤀᤥ ᤕᤧᤜᤠᤱ ᤗᤠᤀᤥᤳᤋᤡ, ᤐᤡᤖᤜᤡ ᤁᤠᤀᤡᤗᤠ, ᤐᤡᤖ ᤏᤧᤶᤒᤠᤱ ᤏᤢ ᤌᤠᤶᤛᤢᤜᤠᤱ ᤐᤢᤛ᤻ᤐ ᤛᤢᤓᤠᤖᤧᤴ ᤔᤡᤱᤜᤠ᤹ ᤋᤃᤡᤀᤣ ᤋᤠ ॥ ᤜᤧᤰᤁᤣᤛᤠᤱ ᤐᤠᤳᤋᤡᤗᤠ  (ᤃᤎᤩ) ᤗᤧᤵᤛᤠᤱ ᤂᤧᤍᤠ᤹ ᤜᤧᤴᤗᤠ (ᤁᤌᤠ-ᤒᤡᤎᤠ) ᤀᤥ ᤁᤧᤛᤠᤵᤐᤠᤃ ᤌᤠᤶᤛᤢᤜᤠᤱ ᤐᤢᤛ᤻ᤐ ᤛᤢᤓᤠᤖᤰ ᤐᤠ᤺ᤵᤔᤠ ᤛᤢᤰᤋᤧᤳ ॥ ᤛᤢᤰᤂᤡᤶᤏᤢ ᤁᤧᤗ᤺ᤶᤒᤠ ᤛᤰᤐᤣᤘᤠᤜᤠ᤹ᤀᤥ ᤌᤠᤶᤛᤢᤜᤠᤱ ᤐᤢᤛ᤻ᤐ ᤛᤢᤓᤠᤖᤧ ᤂᤧᤍᤠ᤹ ᤗ᤺ᤶᤔᤠ ᤜᤣ᤺ᤰᤋᤠ ॥ ᤏᤧᤵᤐᤠᤸ ᤁᤠᤌ᤻ᤔᤠᤴᤍᤢᤏᤢ ᤁᤧᤗ᤺ᤶᤒᤠ ᤕᤠᤰᤌᤢᤱ ᤛᤠᤵᤛᤰ ᤏᤢ ᤛᤠᤰᤌᤡᤶ ᤔᤡᤱᤒᤠ ᤛᤰᤐᤣᤘᤠᤀᤥ ᤁᤢᤄᤧᤍᤠ᤹ᤜᤠ᤹ ᤔᤧᤗ᤺ᤴᤍᤧ ॥ ᤜᤧᤰᤁᤣᤃ ᤋᤠ᤺ᤴᤜᤥ᤺ᤵᤐᤠ ᤛᤰᤐᤣᤘᤠᤀᤥᤀᤠᤱ ᤐᤖᤡᤰ- ᤐᤖᤡᤰᤐᤠ ᤐᤠᤱᤂᤧᤍᤠ᤹, ᤔᤢᤴᤎᤢᤶ- ᤂᤧᤍᤠ᤹ᤜᤠ᤹ ᤏᤢ ᤀᤡ᤺ᤳᤜᤠᤵᤑᤠ᤹ᤗᤰ ᤕ᤺ᤰᤋᤱᤒᤠ ᤔᤧᤗ᤺ᤴᤍᤠ ᤐᤠ᤺ᤵᤔᤠᤛᤠᤱ ᤐᤥ᤺ᤱ ॥ 

ᤕᤠᤰᤌᤢᤱ ᤛᤠᤵᤛᤰ ᤏᤢ ᤂᤧᤍᤠ᤹ᤖᤧ ᤁᤴᤍᤱᤒᤠ ᤁᤣ᤺ᤶᤒᤠ ᤛᤠᤵᤔᤢᤴᤎᤢᤶᤔᤥᤀᤠᤱ ᤂᤧᤍᤠ᤹ᤖᤧ ᤀᤰᤍᤱᤒᤠ ᤛᤠᤰᤁᤡᤸᤗᤧ ᤀᤠᤍᤧᤳᤋᤧᤸᤗᤧ ᤕᤧᤶᤔᤥ ᤕᤠᤰᤌᤢᤱ ᤌᤠᤱᤒᤧᤴᤔᤧᤴᤜᤡᤴ ᤂᤧᤍᤠ᤹ᤛᤠᤶᤒᤠ- ᤂᤧᤍᤠᤛᤠᤶᤔᤠᤠᤜᤠ᤹ᤀᤥ ᤋᤃᤡ ᤗᤠᤶᤗᤥᤖ ᤁᤧᤍᤠᤒᤠ ᤛᤣᤛᤣᤜᤠᤱᤑᤡᤕᤠᤰᤜᤠᤱ ᤏᤡᤍᤧᤳᤋᤧᤸᤗᤧ ᤀᤠᤏᤡ᤹ ᤏᤡᤱᤘᤠ᤹ ᤐᤛᤶᤛᤶ ॥ ᤛᤣᤛᤣᤜᤠᤱ ᤑᤡᤕᤠᤰᤜᤠᤱᤗᤧᤴ ᤁᤢᤄᤧᤍᤠ᤹ ᤏᤢ ᤁᤢᤄᤧᤍᤠ᤹ᤗᤠᤶᤒᤠ ᤁ᤹ᤀᤥ ᤁᤥᤕᤧᤶᤒᤠ ᤕᤠᤰᤌᤢᤱ ᤂᤧᤍᤠ᤹ᤖᤧᤴ ᤛᤰᤏᤡ᤺ᤶ ᤆᤥ᤺ᤰᤔᤠᤏᤠᤀᤠᤱ ᤐᤳ ॥

᥉. ᤕᤠᤰᤌᤢᤱ ᤂᤧᤍᤠ᤹ᤖᤧ ᤁᤢᤏᤥᤁᤢᤒᤡ᤹ ᤏᤢ ᤛᤠᤶᤏᤡᤍᤢ᤺ᤱ

ᤕᤠᤰᤌᤢᤱ ᤂᤧᤍᤠ᤹ᤖᤧᤴ ᤁᤢᤏᤥᤁᤢᤒᤡ᤹ᤀᤡᤴ ᤌᤣᤓᤧᤸᤗᤧ ᤁᤴᤛᤡᤃᤠᤱ ᤕᤠᤰᤌᤢᤱ, ᤕᤰᤕᤢᤱᤛᤠᤒᤠᤜᤠ᤹ᤖᤧ ᤔᤧᤍᤢᤔᤢᤒᤠ ᤜᤡᤴᤎᤥ᤺ᤰᤗᤧᤴ ᤁᤢᤈᤧᤰᤐᤠ ᤁᤢᤛᤠᤵ ᤂᤥᤍᤧᤳ ॥ ᤕᤠᤰᤌᤢᤱ ᤂᤧᤍᤠ᤹ᤜᤠ᤹ᤖᤧ ᤁᤥᤕᤧᤶᤒᤠ ᤜᤠᤱᤌᤡᤶᤒᤠ, ᤛᤢᤔᤠᤈᤡᤒᤠ, ᤕᤠᤱᤈᤡᤰᤐᤠ, ᤌᤠ᤺ᤰᤕᤢᤎᤡᤶᤒᤠ ᤘᤕᤠᤜᤠ᤹ᤖᤧᤴ ᤏᤡᤛᤠᤶ ᤏᤢ ᤏᤡ᤺ᤛᤢᤶ ᤀᤠᤒᤡ᤹ ॥ ᤕ᤺ᤰᤋᤱᤒᤠ ᤂᤧᤍᤠ᤹ᤜᤠ ᤛᤢᤔᤠᤈᤡᤒᤠ ᤁᤢᤈᤧᤰᤕᤠ᤺ᤶᤒᤠ  (ᤛᤠᤔᤠᤈᤡᤁ ᤖ ᤕᤌᤠᤷᤌᤒᤠᤍᤡ) ᤔᤧᤈᤥ᤺ᤰ ॥ ᤜᤧᤰᤁᤣᤛᤠᤱ ᤏᤡᤱᤏᤡᤱᤘᤠ᤹ᤗᤠᤒᤠ ᤂᤧᤍᤠ᤹ᤜᤠ᤹ᤀᤠᤱ ᤌᤡᤰ-ᤏᤧᤳᤜᤡ ᤏᤡ᤺ᤵᤔᤠ ᤂᤥᤍᤧᤳ ॥

ᤀᤰᤂᤣ᤺ᤸᤒᤠ ᤕᤧᤶᤔᤥ ᤕᤠᤰᤌᤢᤱᤒᤠᤜᤠ᤹ᤖᤧ ᤔᤧᤍᤢᤔᤢᤖ ᤔᤧᤕᤠᤰᤐᤠ ᤁᤧᤃᤵᤐᤠᤜᤠ᤹ᤖᤧ ᤔᤧᤒᤡᤖᤢᤒᤠ ᤜᤡᤏ᤺ᤠᤶ ᤕᤠ ᤁᤢᤏᤠᤔᤧ᤺ᤴᤜᤠ᤹, ᤕᤠᤱᤛᤠ᤹ᤔᤠ, ᤔᤧ᤺ᤴᤍᤱᤘᤠ, ᤕᤔᤧ᤺ᤴᤍᤱ, ᤏᤡᤜᤠᤶᤜᤥ᤺ᤵᤔᤠ (ᤀᤛᤡᤜᤩᤠ), ᤑᤧᤴᤈᤡᤰ (ᤀᤏᤤᤋᤡᤁᤋᤠ), ᤑᤧᤴᤏᤠᤶ (ᤒᤡᤛᤱᤃᤋᤡ) ᤏᤢ ᤑᤧᤴᤎᤡᤶ (ᤁᤢᤖᤡᤋᤡ), ᤆᤧᤵᤛᤡᤱ-ᤛᤧᤳᤜᤡᤱᤒᤠ  (ᤜᤋᤩᤠ ᤖ ᤜᤡᤱᤛᤠᤳᤔᤁ) ᤜᤠᤱᤌᤡᤶᤔᤠᤱ ᤔᤡ᤺ᤶ, ᤛᤧᤶᤔᤢᤀᤡ ᤜᤧᤰᤁᤩᤠᤱ ᤐᤠᤱᤓᤣ᤹ᤌᤠᤱᤓᤣ᤹ᤒᤠ ᤜᤡᤱᤒᤪᤠᤶ, ᤕᤠ᤺ᤴᤎᤠ- ᤂᤧᤖᤠ ᤏᤢ ᤋᤢᤰᤂᤣ-ᤗᤠᤰᤂᤣᤜᤠ᤹ᤖᤧ ᤔᤧᤍᤧᤳᤋᤢᤀᤠᤱ ᤜᤡᤅᤧᤒᤠ ᤆᤢᤱᤈᤡᤕᤧᤳᤜᤠᤒᤠ ᤜᤡᤱᤔᤴᤏᤡᤴ ᤐᤥᤎᤰᤔᤠ ᤀᤠᤀᤡᤶᤒᤠ ᤂᤧᤍᤠ᤹ᤜᤠ᤹ᤖᤧᤴ ᤋᤢᤶ ᤛᤠᤶᤏᤡᤍᤢ᤺ᤱ (ᤐᤪᤒᤪᤡᤋᤡ) ᤜᤠ᤹ ᤐᤠ᤺ᤵᤔᤠ ᤛᤢᤢᤰ ॥ 

ᤛᤠᤵᤔᤢᤴᤎᤢᤶ, ᤛᤠᤵᤛᤰ, ᤛᤠᤵᤐᤠ᤺ᤴ, ᤛᤠᤶᤕᤥ, ᤛᤠᤰᤌᤡᤶ, ᤌᤠ᤺ᤰᤕᤢᤎᤡᤶ ᤏᤢ ᤛᤢᤘᤠᤱᤔᤡᤒᤠ ᤔᤡᤔᤡᤍᤡᤱ (ᤔᤜᤡᤔᤠ) ᤌᤧᤰᤔᤠᤀᤠᤱ ᤋᤠᤱᤛᤧ᤺ᤵᤔᤠ ᤗᤧᤵᤛᤠᤱ ᤛᤢᤔᤠᤈᤡ ᤏᤢ ᤛᤢᤘᤠᤱᤗᤧᤴ ᤏᤡᤱᤘᤠ᤹ ᤀᤢ᤺ᤱᤔᤠ ᤀᤰᤂᤣ᤺ᤸᤛ᤻ᤔᤠ ᤕᤠᤰᤌᤢᤱ ᤂᤧᤍᤠ᤹ᤖᤧ ᤛᤠᤶᤏᤡᤍᤢ᤺ᤱᤜᤠ᤹ ᤐᤠ᤺ᤵᤔᤠ ᤛᤢᤰ ॥

᥊. ᤂᤧᤍᤠ᤹-ᤛᤢᤱ ᤖᤢᤔᤣᤖᤧ ᤁᤢᤛᤧᤵᤔᤠᤱᤜᤠ᤹

ᤁᤴ ᤂᤧᤍᤠ᤹-ᤛᤢᤱ ᤖᤢᤔᤣᤖᤧ ᤁᤢᤛᤧᤵᤔᤠᤱᤜᤠ᤹ ᤛᤣᤛᤣᤜᤠᤱ ᤑᤡᤕᤠᤰ ᤛᤢᤓᤠᤸᤗᤧ ᤕᤠᤰᤌᤢᤱ ᤛᤠᤵᤛᤰᤗᤧᤵᤛᤠᤱ ᤏᤡᤱᤘᤠ᤹ ᤐᤡ᤹ᤔᤠ ᤜᤣ᤺ᤰᤋᤢᤒᤠ ᤀᤠᤸᤗᤃ ᤌᤡᤒᤥ᤺ᤱ ᤋᤱᤒᤣ ᤁᤠ᤺ᤰᤋᤢᤀᤠᤱ ᤘᤠ ॥ ᤌᤡᤒᤥ᤺ᤱ ᤋᤱᤒᤣᤛᤡᤃᤠᤱ ᤂᤢᤏᤧ᤹ ᤛᤠᤶᤔᤡᤗᤠ, ᤛᤠᤵᤐᤰᤘᤠ, ᤂᤧᤍᤠ᤹ ᤕ᤺ᤰ ᤛᤠᤵᤋᤢᤀᤠᤱ ᤘᤠ ॥ ᤜᤢᤏᤧ᤹ ᤜᤢᤰᤛᤠᤵᤗᤠᤶ ᤆᤢᤈᤢᤰᤛᤠ ᤛᤰᤐᤣᤘᤠᤀᤠᤱ ᤗ᤺ᤳᤋᤢᤀᤠᤱ ᤘᤠ ॥ ᤁᤢᤀᤡ᤺ᤳᤜᤠᤵᤑᤠ᤹ ᤏᤧᤵᤐᤠᤸ ᤗᤠᤈᤣ᤹ᤏᤢᤖᤰ ᤔᤧ᤺ᤴ ᤛᤢᤰᤂᤡ᤺ᤶ ᤕᤢᤰᤑᤥᤏᤢ ᤁᤧᤗᤶᤒᤠ ᤛᤰᤐᤣᤘᤠᤀᤥ ᤗ᤺ᤴᤍᤧᤀᤠᤱ ᤔᤧᤘᤠ ॥

ᤁᤴ ᤖᤢᤔᤣᤖᤧ ᤁᤢᤛᤧᤵᤔᤠᤱᤜᤠ᤹ ᤂᤢᤏᤧ᤹ᤀᤡᤴ ᤌᤡᤰᤛᤡᤃᤣ᤺ᤰᤐᤠ ᤂᤧᤍᤠ᤹-ᤛᤢᤱ ᤐᤠ᤺ᤵᤔᤠ ᤐᤥ᤺ᤱ ॥ ᤁᤴ ᤛᤢᤱ ᤁᤢᤛᤡᤃᤠᤱ ᤑᤠᤱᤛᤡ (᥏) ᤂᤧᤍᤠ᤹ᤜᤠ᤹ ᤌᤡᤰ-ᤋᤧᤴᤏᤥ ᤑᤢᤰᤂᤢᤛᤡᤀᤠᤱ ᤘᤠ ॥ ᤛᤣᤛᤣᤜᤠᤱ ᤑᤡᤕᤠᤰᤗᤧᤴ ᤂᤧᤍᤠ᤹ᤖᤧ ᤁᤢᤏᤠ᤺ᤶᤓᤣᤀᤥ ᤌᤧᤵᤌᤧᤵᤐᤠᤱ ᤆᤢᤰᤔᤢᤰᤁᤥ ᤛᤰᤏᤡ᤺ᤶ ᤏᤢ ᤐᤣᤜᤧᤴ ᤋᤶᤛᤡᤴ ᤁ᤹ᤀᤥ ᤆᤥ᤺ᤰᤔᤠᤏᤠᤀᤠᤱ ᤐᤳ ॥ 

᥊.᥇. ᤐᤠᤏᤠᤗᤦᤁᤡ ᤏᤢ ᤛᤖᤢᤶᤔᤠ᤹ᤀᤡᤴ ᤁᤴ ᤂᤧᤍᤠ᤹ᤛᤢᤱᤖᤧ ᤌᤡᤰᤛᤡᤃᤣ᤺ᤰᤐᤠ ᤂᤧᤍᤠ᤹ ॥ ᤕᤧᤶᤔᤡᤴ ᤗᤧᤰᤛᤡᤱᤖ ᤐᤣ᤺ᤸᤗᤧ ᤕᤠᤰᤌᤢᤱ ᤛᤢᤔᤠᤈᤡᤗᤢᤶᤔᤥ ᤕ᤺ᤖᤡᤰ ᤗᤧᤰᤛᤡᤱ ᤋᤩᤧᤀᤠᤱ ᤕᤠᤰᤌᤢᤱ ᤜᤡᤱᤔᤴᤏᤥᤀᤠᤱ ᤆᤢᤰᤋᤧᤒᤠ ᤁᤢᤖᤧᤰᤛᤡᤱᤅᤡᤴ ᤌᤥᤰᤐᤡ ᤆᤥᤃᤢᤀᤠᤱ ᤀᤠᤏᤡ᤹ ᤐᤠ᤺ᤴ, ᤌᤠ᤺ᤰᤕᤢᤎᤡᤶ, ᤛᤠᤰᤌᤡᤶ, ᤐᤠᤱ-ᤛᤠᤵᤛᤰ ᤏᤢ ᤐᤠᤱ-ᤛᤠᤶᤀᤡᤰᤁᤡᤴ ᤏᤡᤱᤘᤠ᤹ ᤔᤧᤓᤧᤳᤜᤢᤀᤠᤱ ᤐᤠᤗᤠᤶ-ᤕᤠ᤹ᤗᤠ᤺ᤰᤔᤠᤖᤧ ᤁᤢᤗᤧᤰᤘᤠ ᤌᤠᤱᤒᤧᤴ-ᤔᤧᤴᤜᤩᤠ᤹ᤜᤠ᤹ ᤁᤧᤖᤧᤰ 'ᤍᤡᤛ᤻ᤁᤥ ᤗᤠ᤺ᤱᤅᤥ' ᤔᤧᤗᤠᤛᤧ ᤔᤧᤒᤣᤒᤠ ᤁᤢᤛᤠᤏᤥᤖᤡᤰᤁᤠᤱ ᤆᤧᤰᤂᤢᤀᤠᤱ ᤘᤠ ॥

᥋. ᤁᤥᤕᤧᤶᤒᤠ ᤂᤧᤍᤠ᤹ᤀᤥ ᤛᤣᤛᤣᤜᤠᤱᤖᤧ ᤁᤢᤖᤰᤑᤠ᤹ 

ᤜᤧᤶᤔᤩᤠᤰᤗᤰ ᤔᤧ᤺ᤴ ᤌᤠᤱᤒᤧᤴ- ᤔᤧᤴᤜᤩᤠ᤹ᤜᤠ᤹ᤖᤧ ᤔᤠᤗᤠᤈᤣ᤹ ᤏᤢ ᤔᤠᤒᤠ᤺ᤴ ᤁᤧᤖᤧᤰ ᤔᤧᤗᤧᤖᤢᤀᤠᤱ ᤀᤡᤛᤫᤠᤒᤠ ᤔᤧᤒᤥ᤺ᤰᤂᤧ ᤔᤧᤒᤣᤒᤠ ᤁᤢᤈᤧᤰᤐᤠ (ᤕᤌᤠᤷᤌ)  ᤐᤥᤎᤰᤋᤢᤀᤠᤱ ᤘᤠᤏᤧᤓᤃᤪ ᤌ᤺ᤳᤌᤠᤔᤠ ᤕᤠ ᤁᤧᤏᤠᤱᤔᤠ ᤜᤧᤰᤁᤣᤔᤠ ᤗᤧᤵᤆᤠ᤹ ᤐᤢᤎᤢᤰᤔᤠ ᤐᤠᤏᤠᤗᤦᤁᤡ ᤏᤢ ᤛᤖᤢᤶᤔᤠᤛᤡᤖᤧ ᤂᤢᤴᤜᤡ᤹ ᤗᤢᤱᤔᤠ᤹ ᤜᤡ᤺ᤶᤔᤡᤸᤗᤧᤧ ᤛᤠᤶᤗᤠᤣ᤺ᤳᤋᤧᤜᤢᤒᤠ ᤐᤠᤗᤠᤶᤖᤧ ᤀᤠᤒᤠᤱᤒᤠ ᤛᤠᤰᤌᤡᤶᤔᤥ ᤏᤢ ᤐᤠᤱ- ᤛᤠᤶᤗᤥᤀᤡᤴ ᤛᤧ᤺ᤵᤋᤧᤳᤜᤢᤒᤠᤀᤥ ᤂᤧᤍᤠ᤹ᤛᤠᤶᤒᤠᤖᤧ ᤁᤢᤏᤡᤱᤘᤠ᤹ ᤛᤠᤖᤡᤰ ᤋᤠ᤺ᤛᤢᤛᤠᤱ ᤁᤴ ᤏᤧᤵᤑᤢ ᤛᤡ᤺- ᤐᤣ᤺ᤰᤛᤡᤀᤠᤱ ᤜᤠ᤺ᤳᤗᤧ ᤋᤠᤱᤛᤧ᤺ᤵᤋᤢᤒᤠᤒᤣ ᤕᤠᤰᤌᤢᤱ ᤐᤠᤱ- ᤛᤠᤰᤌᤡᤶᤔᤡᤴ X ᤗ᤹ᤖᤡᤰ ᤕᤠᤰᤌᤢᤱ ᤌᤡᤱᤃᤠ ᤔᤠᤛᤡᤱ ᤐᤣ᤺ᤰᤐᤠ ᤁᤢᤆᤧᤰᤗᤧᤵᤛᤠᤱ ᤏᤡᤱᤘᤠ᤹ ᤜᤡ᤺ᤔᤠ ᤕᤠ᤺ᤶᤒᤰ ᤂᤧᤍᤠ᤹ᤗᤠᤶ ᤆᤥᤃᤢᤀᤠᤱ ᤘᤠ ॥ 

᤻ ᤛᤢᤶᤘᤠᤍᤥ ᤂᤧᤍᤠ᤹ᤀᤥ ᤂᤧᤍᤠ᤹ᤛᤠᤶᤒᤠᤛᤣᤛᤣᤜᤠᤱ ᤑᤡᤕᤠᤰᤗᤧ ᤀᤠᤱᤍᤡᤱᤒᤠ ᤀᤖᤢᤴ ᤏᤢ ᤋᤔᤥᤖ - ᤁ᤺ᤰᤁᤠ ᤘᤠᤜᤱᤗᤢᤶᤔᤥ ᤆᤢᤰᤋᤧᤒᤠ ᤌᤱ ᤜᤧᤰᤁᤩᤠᤱ ᤛᤢᤶᤘᤠᤍᤥ ᤏᤢ ᤐᤠᤖᤠᤜᤠ ᤔᤠᤱᤜᤡᤶᤒᤠ ᤛᤧᤘᤠᤛᤠᤒᤠ ᤗᤢᤶᤔᤥᤒᤠ ᤌᤱ ᤌᤥᤰᤐᤡ ᤆᤥᤃᤢᤀᤠᤱ ᤜᤧᤴ ᤛᤢᤶᤛᤡ ᤘᤠᤜᤱᤜᤠ᤹ ᤔᤏᤠᤍᤡᤱᤒᤠ (ᤔᤠᤏᤒᤡᤕ) ᤏᤠᤀᤡᤒᤣ᤺ᤰ (ᤖᤢᤵ) ᤐᤡᤖᤢᤛᤡᤀᤠᤱ ᤋᤢᤶᤔᤏᤠ ᤕᤔᤡᤰ (ᤐᤪᤌᤶ ᤐᤢᤖᤢᤛ ᤍᤪᤡᤛ᤻ᤋᤡᤒᤡᤴᤍᤢ) ᤗᤠᤶᤏᤢ ᤛᤢᤶᤘᤠᤍᤥ ᤂᤧᤍᤠ᤹ ᤛᤠᤵᤋᤢᤀᤠᤱ ᤘᤠ ॥ ᤐᤠᤱ-ᤛᤠᤶᤗᤥ ᤕᤠ ᤐᤠᤗᤠᤶᤔᤡᤴ ᤐᤏᤥᤖᤡᤰ ᤀᤥᤃᤠᤵ ᤆᤥᤃᤢᤀᤠᤱ ᤁᤴ ᤂᤧᤍᤠ᤹ᤀᤡᤴ ᤐᤠᤱ-ᤂᤧᤍᤠ᤹ ᤐᤧᤴᤏᤠᤶ (ᤛᤤᤗᤡ) ᤗᤠᤶᤏᤢ ᤛᤠᤵᤋᤢᤀᤠᤱ ᤘᤠ ॥ ᤐᤠᤗᤠᤶᤖᤰ ᤔᤧ᤺ᤴ ᤔᤢᤰᤂᤧᤍᤠ᤹ᤜᤠ᤹ᤀᤠᤱ ᤀᤥᤃᤠᤵ ᤔᤧᤳᤋᤢᤀᤠᤱ ᤂᤧᤍᤠ᤹ᤖᤧ ᤐᤠ᤺ᤴᤏᤡᤴ ᤏᤡᤱᤘᤠ ᤁᤧᤀᤢ᤺ᤱᤒᤠ ᤁᤢᤈᤠᤛᤥᤖᤡ᤺ᤰᤐᤠ ᤆᤥᤃᤢᤀᤠᤱ ᤘᤠ ॥ ᤐᤠᤱ-ᤛᤠᤶᤗᤥ (ᤗᤥᤁ ᤃᤡᤋ) ᤕᤠ ᤐᤠᤗᤠᤶᤔᤡᤴ ᤀᤥᤃᤠᤵ ᤆᤥ᤺ᤰᤔᤠᤀᤠᤱ ᤂᤧᤍᤠ᤹ ᤛᤠᤵᤔᤠ ᤂᤧᤍᤠ᤹ᤛᤠᤶᤒᤠ ᤛᤣᤛᤣᤜᤠᤱ ᤑᤡᤕᤠᤰᤗᤧ ᤗᤳᤌᤡᤰ ᤁᤢᤏᤥᤁᤢᤒᤡ᤹ (ᤒᤡᤛᤣᤛᤋᤠ) ॥ 

ᤘᤣ᤹ ᤂᤧᤍᤠ᤹ᤀᤥ ᤜᤧᤰᤁᤣᤀᤣ ᤁᤴ ᤛᤡᤃᤠᤱᤅᤠᤱ ᤀᤠᤱᤍᤡᤱᤒᤠ ᤀᤖᤢᤴᤏᤢ ᤋᤔᤥᤖ ᤏᤢ ᤁ᤺ᤁᤠᤛᤡᤖᤧ ᤌᤰᤋᤧᤳᤜᤢᤒᤠ ᤌᤱᤖᤧ ᤐᤥᤎᤰᤗᤠᤶ ᤂᤧᤍᤠ᤹ᤛᤠᤶᤒᤠᤖᤧ ᤀᤡᤱᤜᤠ᤹ ᤛᤧᤛᤢᤀᤠᤱ ᤘᤠ ॥ ᤜᤧᤴ ᤌ᤺ᤣ᤺ᤔᤠᤓᤠ᤺ᤸᤗᤧ ᤀᤠᤒᤠᤅᤧᤗᤠᤃᤡ ᤌᤱ ᤆᤥ᤺ᤰᤔᤠᤏᤢ ᤘᤣ᤹ᤖᤧᤗᤠᤃᤡ ᤕᤠ ᤘᤣ᤹ᤖᤧ ᤐᤠᤱᤃᤣ᤹ᤘᤠ ᤐᤥ᤺ᤱᤔᤠᤀᤠᤱ ᤌᤱ ᤆᤥ᤺ᤰᤔᤠ ᤛᤠᤖᤡᤰᤁᤣ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰ ॥ ᤁᤸᤗᤧ ᤕ᤺ᤰ ᤑᤧᤴᤎᤥ᤺ᤰ ᤋᤠᤖᤢᤀᤠᤱ ᤋᤱᤔᤠ-ᤕᤢᤱᤔᤠ ᤀᤠᤴᤜᤢᤰᤏᤧᤶᤒᤠ ᤀᤠᤈᤥ᤺ᤰ ॥ ᤘᤣ᤹ᤖᤧ ᤗᤠᤃᤡ ᤌᤱᤅᤥ ᤗᤰᤁᤧᤗᤥᤒᤠᤜᤠ᤹ ᤔᤧᤛᤡ᤺- ᤔᤧᤔᤠᤛᤡᤱ ᤁᤖ ᤌᤱᤁᤧᤒᤠᤱᤒᤠᤜᤠ᤹ ᤀᤠᤳᤋᤡᤴᤏᤠᤱ ᤜᤡᤴᤎᤥ᤺ᤰᤁᤥ ᤔᤧᤎᤠᤏᤧᤴ ᤗ᤹ᤖ ᤌᤱᤅᤥᤃ ᤀᤠᤵᤑᤠᤸᤗᤠᤱ ᤁᤧᤛᤡᤒᤠᤜᤠ᤹ᤃ ᤆᤢᤈᤢᤰᤛᤠ (ᤌᤰᤛᤠ) ᤕᤧᤳᤜᤠᤒᤠᤜᤠ᤹ᤗᤰ ᤔᤧᤒᤥ᤺ᤱ ᤁᤧᤗ᤹ᤒᤠ ᤀᤡᤱᤅᤠᤱ ᤀᤠᤒᤡ᤹ ॥

᤻  ᤁᤴ ᤂᤧᤍᤠ᤹ ᤘᤔᤡ ᤛᤡᤃᤠᤱ ᤀᤠᤸᤗᤥᤒᤠ ᤏᤧᤵᤐᤠᤸ ᤗᤠᤈᤣ᤹ ᤛᤡᤃᤠᤱᤒᤠ ᤜᤠᤱᤎᤡᤶᤒᤠ, ᤕᤠᤱᤈᤡᤰᤐᤠ ᤏᤢ ᤛᤢᤔᤠᤈᤡᤰᤐᤠ ᤘᤕᤠᤜᤠ᤹ᤖᤧᤴᤏᤠᤱ ᤁᤢᤈᤧᤰᤕᤠᤒᤠ ᤆᤧᤱ-ᤛᤠ (ᤆᤡᤋᤪᤏ) ᤆᤥ᤺ᤰᤛᤧ ᤔᤠᤗᤠᤈᤣ᤹ ᤛᤡᤃᤠᤱ ᤐᤡᤵᤑᤢᤩᤱ (ᤒᤡᤍᤥᤪᤜ) ᤐᤥᤃᤧᤀᤠᤱ ᤀᤠᤏᤡ᤹ ᤋᤢᤶ ᤐᤠᤱᤗᤥᤒᤠ ᤗᤢᤶᤔᤡᤜᤠᤱᤖᤧ ᤁᤢᤶᤒᤠ-ᤁᤢᤶᤔᤠᤛᤡᤀᤠᤱ ᤜᤧᤴ ᤐᤡᤵᤑᤢᤩᤱᤔᤡᤒᤠ ᤁᤧᤈᤡᤀᤥ ᤛᤕ᤺ᤱᤔᤡᤒᤠ ᤌᤱ ᤁᤧᤈᤥ᤺ᤰᤐᤠ ᤀᤠᤵᤋᤡᤰ ᤔᤧᤃᤢ᤺ᤳᤜᤡᤀᤠᤱ ᤔᤧᤜᤡᤵᤜᤡ, ᤔᤧᤗ᤺ᤵᤛᤡ, ᤋᤢᤰᤂᤣ ᤔᤧᤈᤠ᤺ᤳᤜᤡᤀᤠᤱ ᤕᤢᤰᤑᤥᤒᤠ ᤕᤢᤰᤌᤡᤶᤛᤠᤒᤠᤜᤠ᤹ᤖᤧ ᤔᤧᤛᤧᤖᤢᤛᤡᤒᤠ ᤁᤢᤈᤧᤰᤕᤠᤒᤠ ᤆᤧᤱ-ᤛᤠᤵ ᤆᤥᤃᤢᤀᤠᤱ ᤘᤠ ॥

ᤛᤠᤀᤠᤘᤖᤴᤍᤢᤶᤒᤠ ᤀᤠᤜᤡᤱᤄᤢᤶᤒᤠ ᤀᤣᤛᤠᤸᤗᤧ ᤁᤢᤔᤧᤸᤗᤢᤱᤅᤥ ᤕ᤺ᤰ ᤕᤠᤱ, ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤋᤠ᤺ᤵᤔᤠ ᤔᤧ᤺ᤴᤜᤢᤰᤐᤠ ᤌᤠᤱᤒᤧᤴᤏᤡᤴ ᤑᤢᤱᤏᤠ ᤔᤣ᤺ᤰᤂᤡᤶ ᤗᤰᤔᤠ ᤔᤧᤛᤢᤰᤋᤢᤴ ᤗ᤹ᤖᤡᤰ ᤀᤣᤛᤠᤔᤠᤖᤧᤴ ᤗᤧᤱᤜᤱ ᤆᤥ᤺ᤰᤔᤠᤆᤠᤔᤠᤏᤠᤒᤠ ᤑᤧᤴᤎᤡᤶᤖᤧ ᤆᤥᤃᤢ᤺ᤸᤗᤧ ᤁᤢᤘᤧᤴ ᤏᤢ ᤁᤢᤕᤧᤴᤜᤠ᤹ ᤔᤧᤃᤧᤒᤣᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤘᤠᤖᤧ ᤋᤧᤳᤋᤢᤒᤠ ᤋᤢᤶ ᤔᤧᤴᤜᤩᤠ᤹ ᤑᤢᤱᤏᤠᤖᤧ ᤀᤣ᤺ᤰᤛᤠᤒᤠ ᤜᤡᤱᤔᤴᤏᤡᤴ ᤂᤧᤍᤠ᤹ᤖᤧ ᤁᤢᤗᤢᤶᤒᤠ ᤌᤥᤰᤐᤡ ᤆᤥᤃᤢᤀᤠᤱ ᤕᤠᤰᤌᤢᤱ ᤛᤢᤘᤠᤱ (ᤈᤠᤋᤡ)  ᤛᤡᤃᤠᤱᤒᤠ ᤀᤣᤛᤠᤔᤠ ᤛᤱᤔᤠ-ᤆᤠᤔᤠᤏᤠ ᤑᤧᤴᤎᤡᤶ ᤏᤢ ᤛᤥᤛᤥᤖᤡᤰ ᤘᤣ᤹ᤗᤠᤈᤣ᤹ ᤆᤡᤔᤢ ᤆᤥ᤺ᤰᤛᤧ ᤁᤧᤒᤣ᤺ᤰᤐᤠ ᤕᤠᤰᤌᤢᤱᤒᤠᤖᤧ ᤜᤡᤱᤔᤴᤏᤠᤱ ᤂᤧᤍᤠ᤹ᤖᤧ ᤁᤢᤎᤥᤰᤐᤡ ᤆᤥᤃᤢᤒᤠ ᤏᤡᤍᤧᤳ ॥

ᤂᤧᤍᤠ᤹ᤛᤠᤶᤒᤠ ᤛᤣᤛᤣᤜᤠᤱ ᤑᤡᤕᤠᤰᤗᤧ ᤗᤳᤌᤡᤰ ᤂᤧᤍᤠ᤹ ᤛᤡᤃᤠᤱ ᤘᤣ᤹ᤘᤣ᤹ᤒᤠ ᤛᤡᤍ᤺ᤳ ᤂᤧᤍᤠ᤹-ᤌᤥᤰᤐᤡ ᤕᤠᤰᤋᤢᤀᤠᤱ ᤆᤰᤔᤧᤶᤒᤢ᤹ᤀᤣ ᤂᤧᤍᤠ᤹ᤛᤠᤶ (ᤁᤌᤠᤏᤁ) ᤀᤡᤴ ᤆᤰᤋᤢᤍᤣ᤺ᤖᤢ ॥ ᤐᤠ ᤁᤴ ᤁᤢᤏᤥᤁᤢᤒᤡ ᤂᤢᤏᤧ᤹ᤀᤡᤴ ᤐᤠᤅᤧᤶ (ᤔᤦᤗᤡᤁᤋᤠ) ᤐᤠ᤺ᤵᤔᤠ ᤛᤢᤰ ॥

᤻ ᤔᤡ᤺ᤶᤈᤡᤒᤠ ᤏᤡᤱᤘᤠ᤹ ᤀᤢᤛᤢᤖᤢᤒᤠ ᤐᤧᤴᤏᤠᤶᤗᤠᤶ ᤛᤠᤵᤋᤧᤀᤠᤱ ᤘᤠᤓᤠᤱ ᤆᤡᤈᤧᤵᤔᤠ ᤛᤢᤰ ॥ ᤕᤠᤱᤁᤧᤛᤠ᤹ᤒᤠ ᤏᤢ ᤋᤥ᤺ᤴᤍᤥ᤺ᤶᤒᤠ ᤛᤢᤳᤏᤠᤒᤠ ᤔᤏᤠᤖᤧᤴ ᤁᤢᤏᤢᤶᤔᤥ ᤀᤠᤰᤋᤱᤒᤠ ᤋᤢᤰᤂᤣᤘᤠᤒᤠ ᤘᤕᤠ ᤐᤥ᤺ᤱᤔᤠ ᤛᤢᤰᤗᤰ ᤔᤧ᤺ᤴ ᤔᤏᤠ-ᤜᤡᤱᤔᤴᤏᤥ ᤔᤡ᤺ᤶᤈᤡᤏᤢᤸᤗᤧ ᤛᤢᤰᤂᤣᤘᤠᤒᤠ ᤜᤡᤱᤒᤪᤠᤶ ᤁᤧᤒᤡᤒᤠ ᤕᤠᤱᤛᤠᤁᤢᤴᤎᤣᤖᤧ ᤁᤢᤕᤧᤰᤕᤠ ᤀᤡ᤺ᤵᤐᤠ ᤘᤠᤒᤠ ᤁᤢᤈᤧᤰᤕᤠ ᤐᤠ᤺ᤴᤏᤡᤴ ᤀᤥ᤺ᤴᤎᤠᤰᤔᤠ ᤋᤢᤶ ᤐᤠᤱᤗᤥᤒᤠ ᤏᤠᤶᤛᤡᤱᤖᤧ ᤁᤢᤔᤧᤴᤜᤩᤠ᤹ᤏᤢ ᤋᤢᤔᤢᤒᤠ ᤀᤡᤱᤗᤧᤰ ᤏᤢ ᤀᤧᤵᤗᤧᤰᤂᤧ ᤜᤡᤴᤎᤥ᤺ᤰᤂᤠ᤹ᤗᤠᤶ ᤜᤰᤕᤠᤍᤡᤶ ᤂᤧᤍᤠ᤹ᤛᤠᤶᤒᤠᤖᤧ ᤆᤥᤃᤢᤀᤠᤱ ᤜᤧᤴᤏᤡ᤺ᤵᤐᤠ-ᤔᤠᤖᤧ ᤋᤃᤡ ᤋᤥ᤺ᤴᤍᤢᤀᤠᤱ ᤘᤠ ॥ ᤁᤴ ᤔᤡ᤺ᤶᤈᤡᤒᤠ ᤏᤡᤱᤘᤠ᤹ ᤂᤧᤍᤠ᤹ᤖᤧ ᤕᤠᤱᤛᤠ᤹ᤔᤠ ᤛᤠᤖᤡᤰ ᤆᤠ᤹ᤒᤠ ᤖᤥᤓᤠᤱᤅᤠᤱ ᤗᤳᤌᤡᤰ ᤀᤡᤱ ᤀᤠᤒᤡ᤹ ॥ 

᤻ ᤏᤠᤶᤓᤧᤖᤠ ᤔᤠᤰᤆᤧᤖᤧ ᤂᤧᤍᤠ᤹ᤀᤡᤴ ᤀᤰᤂᤣ᤺ᤸᤒᤠ ᤘᤕᤠᤖᤧ ᤁᤢᤈᤧᤰᤕᤠᤒᤠ ᤆᤧᤱ-ᤛᤠᤵ ᤗᤥ ॥ ᤁᤥᤕᤧᤶᤒᤠ ᤀᤠᤏᤡ᤹ ᤗᤠᤈᤣ᤹ ᤏᤢ ᤛᤢᤔᤠᤈᤡᤛᤡᤃᤠᤱ ᤔᤧ᤺ᤴᤍᤱᤘᤠ ᤏᤢ ᤕᤔᤧ᤺ᤴᤍᤱᤘᤠᤖᤧ ᤆᤥᤃᤢ᤺ᤸᤗᤧ ᤆᤢᤰᤋᤧᤒᤠ ᤀᤠᤓᤠᤱᤛᤡᤱᤒᤠ ᤌᤱ ᤏᤢ ᤁᤧᤈᤡᤖᤧ ᤜᤡᤱᤔᤴᤏᤡᤴ ᤛᤠᤖᤡᤰ ᤏᤠᤎᤡᤶᤗ, ᤋᤧᤳᤋᤢᤀᤠᤱ ᤘᤠ ॥ ᤆᤧᤵᤛᤡᤱ-ᤛᤧᤳᤜᤡᤱ (ᤜᤡᤱᤛᤠᤳᤔᤁ) ᤛᤠᤶᤎᤱ (ᤁᤪᤠᤴᤋᤡ) ᤗᤠᤶᤔᤠᤱᤖᤰ ᤛᤧᤴᤗᤵ (ᤔᤢᤰᤋᤡ) ᤂᤥᤍᤧᤳ, ᤛᤏᤠᤖᤢᤱᤒᤠ ᤗᤠᤶᤏᤢ ᤔᤧ᤺ᤴ ᤁᤧᤗ᤹ᤒᤠ ᤛᤠᤶᤀᤡ᤺ᤳᤜᤡ  (ᤛᤡᤍᤠᤴᤋ) ᤁᤧᤏᤠ᤺ᤵᤐᤠᤜᤠ᤹ ᤔᤧᤒᤥ᤹ᤖ ᤔᤧᤕᤠᤰ ॥ ᤀᤰᤂᤧ ᤔᤧ᤺ᤴᤈᤥ᤺ᤰᤁᤧ ᤛᤢᤔᤠᤈᤡᤒᤠ ᤗᤧᤱᤘᤠ  (ᤐᤖᤡᤒᤷᤋᤴ) ᤋᤠ᤺ᤵᤔᤠ ᤌᤢᤶ ॥ 

ᤂᤧᤍᤠ᤹ᤛᤠᤶᤒᤠᤖᤧ ᤁᤴ ᤂᤧᤍᤠ᤹ᤖᤧ ᤌᤥᤰᤐᤡᤀᤡᤴ ᤐᤠ ᤁᤴ ᤛᤢᤔᤠᤈᤡᤒᤠ ᤗᤧᤱᤘᤠ (ᤐᤖᤡᤒᤷᤋᤴ) ᤁᤧᤍᤠ᤺ᤵᤐᤠ ᤛᤠᤶᤎᤱ ॥ ᤂᤧᤍᤠ᤹ᤖᤧ ᤁᤴ ᤌᤥᤰᤐᤡ ᤕᤠ ᤀᤡ᤺ᤳᤜᤥᤀᤡᤴ ᤗᤳᤌᤡᤰ ᤕᤠᤱᤛᤠ᤹ᤒᤠ, ᤁᤢᤔᤣ᤺ᤳᤋᤡᤴ ᤔᤠᤛᤡᤱᤒᤣᤀᤠᤱ ᤀᤣ᤺ᤰᤛᤠ ᤁᤧᤘᤠᤒᤠᤠ ᤔᤠᤰᤆᤧᤖᤧᤀᤡᤴ ᤁᤢᤍᤢᤰᤂᤣᤘᤠ ᤜᤢᤏᤧ᤹ ᤋᤢᤰᤂᤣᤗᤠᤰᤂᤣ ᤕᤠᤸᤗᤧᤰ-ᤁᤰᤗᤧᤰ ᤆᤥᤃᤢᤖ ᤛᤃᤡ᤹-ᤕᤠᤰᤗᤠ, ᤔᤠ᤺ᤴᤍᤠ, ᤜᤠ᤺ᤰᤘᤠ ᤏᤢ ᤆᤡᤖᤡᤱᤗᤡᤱᤒᤠ ᤋᤣ᤺ᤳᤗᤰ ᤐᤡ᤹ᤔᤠ ᤛᤢᤰᤋᤢᤀᤠᤱ ᤜᤡᤱᤄᤢᤛᤡᤒᤠ ᤏᤧᤳᤜᤡ ᤁᤢᤔᤡᤰᤜᤠᤱᤔᤠ ᤁᤢᤛᤡᤰᤐᤠ ᤁᤢᤛᤠ ᤏᤢ ᤀᤣ᤺ᤛᤠᤔᤠᤠ ᤑᤢᤱᤛᤧᤴ ᤏᤢ ᤋᤡᤖᤧᤵᤏᤠᤛᤡ ᤕᤠᤱᤛᤠ᤹ᤔᤠᤖᤧ ᤋᤖᤢᤛᤡᤀᤠᤱ ᤏᤥᤖᤡᤰᤁᤠᤱ ᤆᤠᤔᤠ-ᤌᤢᤱᤔᤠ ᤆᤠᤱᤔᤠ-ᤘᤠ᤺ᤵᤔᤠᤖᤰ ᤔᤧ᤺ᤴ ᤛᤠᤵᤗᤠ ᤏᤡ᤺ᤵᤔᤠᤀᤠᤱ ᤔᤧᤱᤄᤥᤛᤧᤳᤜᤡᤶᤒᤠ ᤜᤡᤴᤈᤠ᤹-ᤐᤡᤳᤜᤢᤒᤠ ᤜᤢᤴᤜᤡ᤹ ᤏᤡᤱᤘᤠᤛᤡᤃᤠᤱ ᤁᤧᤒᤥ᤺ᤰᤐᤠ ᤗᤧᤰᤘᤠ-ᤀᤡ᤺ᤳᤜᤡᤱ (ᤒᤍᤗᤠᤁᤥ ᤓᤠᤘᤏᤠ) ᤏᤢ ᤛᤠᤘᤠ᤺ᤴᤜᤡᤱᤒᤠ ᤜᤠᤱᤃᤧᤴ (ᤛᤡᤰᤂᤧᤱᤔᤠ ᤏᤢ ᤕᤠ᤺ᤰᤗᤧ᤹ᤔᤠ) ᤜᤠ᤹ᤖᤧ ᤆᤥᤃᤢ᤺ᤸᤗᤧ ᤕᤠᤱᤛᤠ᤹ᤔᤠ, ᤕᤧᤔᤧ᤺ᤴᤍᤱᤘᤠ, ᤔᤠᤰᤂᤡᤐᤡ᤺ᤵ (ᤛᤥᤛᤴ) ᤏᤢ ᤏᤡᤱᤄᤢᤶ (ᤀᤋᤩᤠᤆᤠᤖ) ᤗᤠᤶᤒᤠ ᤔᤠᤗᤠᤈᤣ᤹ᤖᤧᤴ ᤛᤧᤴᤗᤵ-ᤌᤱᤖᤧ ᤀᤢ᤺ᤘᤠ ᤁᤧᤀᤢ᤺ᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤛᤧᤖᤠᤎᤱᤛᤠᤒᤠ-ᤔᤠ (ᤜᤠᤐᤠᤔᤠᤖ ᤕᤥᤍ᤻ᤍᤠ) ᤐᤥ᤺ᤰᤂᤧᤳᤜᤡᤀᤠᤱ ᤌᤡᤰᤕᤧᤴ ᤋᤡᤶᤔᤰ ᤐᤱᤏᤧᤳᤜᤡᤀᤠᤱ ᤋᤠᤶᤓᤢᤱᤅᤥ ᤗᤠᤛᤧᤳᤜᤡ ᤐᤣ᤺ᤛᤧᤳᤜᤡᤒᤠ ᤀᤠᤏᤡ᤹ ᤗᤠᤈᤣ᤹ᤖᤧᤴ ᤁᤢᤈᤧᤰᤕᤠᤠ ᤐᤠᤎᤰᤋᤢᤢᤀᤠᤱ ᤘᤠ ॥ 

ᤕᤠᤱᤛᤠ᤹ᤔᤠ, ᤕᤧᤔᤧ᤺ᤴᤍᤱᤘᤠ, ᤔᤠᤰᤂᤡᤐᤡ᤺ᤳ ᤏᤢ ᤏᤡᤱᤄᤢᤶᤗᤠᤶᤒᤠ ᤔᤠᤗᤠᤈᤣ᤹ᤖᤧᤴ ᤛᤧᤴᤗᤵ - ᤌᤱᤖᤧ ᤀᤢ᤺ᤘᤠ ᤁᤧᤀᤢ᤺ᤒᤠᤜᤠ᤹ᤖᤧᤴ ᤑᤧᤈᤢᤶ - ᤑᤧᤕᤠᤛᤥᤖᤡᤰᤐᤠ (ᤛᤛᤛ᤻ᤋᤪ) ᤆᤧᤵᤛᤡᤱ-ᤛᤧᤳᤜᤡᤱ ᤛᤠᤶᤎᤱ ᤗᤠᤶᤔᤠᤱᤖᤰ ᤛᤧᤴᤗᤵ ᤂᤥᤍᤧᤳ, ᤛᤏᤠᤢᤖᤱᤒᤠ ᤗᤠᤶᤏᤢ ᤔᤧ᤺ᤴ ᤁᤧᤗ᤹ᤒᤠ ᤛᤠᤶᤀᤡ᤺ᤳᤜᤡ ᤁᤧᤏᤖᤵᤐᤠ ᤔᤠᤀᤢᤘᤠᤍᤡᤜᤠ᤹ᤖᤧᤴ ᤛᤧᤖᤠᤎᤱᤖᤧ ᤏᤠᤎᤡᤶ ᤔᤧᤳᤋᤢᤀᤠᤱ ᤂᤧᤍᤠ᤹ᤛᤠᤶᤒᤠᤖᤧ ᤀᤰᤂᤣ᤺ᤸᤛ᤻ᤔᤠ ᤕᤧᤶᤔᤥᤒᤠ ᤀᤡ᤺ᤳᤏᤡ᤺ᤶ ᤁᤢᤈᤧᤰᤕᤜᤠ᤹ ᤛᤒᤳᤗ᤹ᤖᤡᤰ ᤜᤰᤛᤢᤀᤠᤱ ᤁᤴ ᤏᤠᤶᤓᤧᤖᤠ ᤔᤠᤰᤆᤧᤖᤧ ᤂᤧᤍᤠ᤹ᤀᤡᤴ ᤛᤧᤰᤂᤠᤒᤠ ᤏᤠᤀᤡᤒᤣ᤺ᤰ ᤐᤡ᤹ᤔᤠ ᤛᤢᤰᤋᤢᤀᤠᤱ ᤘᤠᤓᤠᤱ ᤐᤠ᤺ᤵᤔᤠ ᤛᤢᤰ ॥ 

ᤛᤧᤴᤗᤵ-ᤌᤱ ᤁᤧᤈᤥ᤺ᤰᤐᤠ  ᤛᤧᤖᤠᤎᤱᤛᤠᤒᤠ-ᤔᤠ ᤌᤠᤱᤒᤧᤴ-ᤔᤧᤴᤜᤩᤠ᤹ᤜᤠᤖᤧ ᤔᤧᤍᤧᤶᤛᤢᤒᤠ ᤛᤠᤶᤀᤡ᤺ᤳᤜᤡᤖᤧ ᤋᤃᤡ ᤐᤠ-ᤔᤠᤀᤠᤱ ᤌᤣ᤺ᤀᤠᤱ ᤔᤧ᤺ᤴ ॥ ᤛᤠᤶᤀᤡ᤺ᤳᤜᤡ ᤗᤠᤃᤡ ᤔᤠ-ᤐᤠᤀᤠᤱ ᤗᤧᤳᤋᤡᤱ (ᤒᤗᤡᤍᤠᤴ) ᤐᤡᤔᤠ ᤛᤢᤰᤐᤠ ᤏᤡᤛ᤻ᤛᤣ ᤐᤠ᤺ᤴᤏᤡᤴ ᤀᤡᤍᤡ᤺ᤰ ᤕᤧᤶᤀᤣᤃᤠᤱ ᤜᤡᤶᤔᤥ ᤗ᤺ᤴᤍᤧ-ᤋᤩᤧᤛᤡᤀᤠᤱ ᤜᤢᤴᤜᤡ᤹ ᤀᤣ᤺ᤰᤛᤠ ᤁᤧᤜᤡᤱᤒᤠ ᤁᤧᤘᤠᤒᤠ ᤐᤠᤀᤡᤴᤏᤠᤱ ᤆᤢᤵᤛᤠᤱ-ᤑᤧᤴᤜᤠᤱᤏᤢ ᤌᤩ᤺ᤱ-ᤌᤩ᤺ᤱ ᤗ᤹ᤖᤡᤰ ᤑᤢᤱᤛᤧᤴ ᤏᤢ ᤋᤡᤖᤧᤵᤏᤠᤛᤡᤖᤧ ᤜᤢᤰᤋᤡᤶᤔᤰᤗᤧ ᤀᤠᤒᤧᤳᤜᤢᤀᤠᤱ ᤐᤠᤰᤌᤛᤢᤒᤠ ᤜᤡᤴᤎᤥ᤺ᤰᤗᤧ ᤆᤧᤰᤂᤢ ॥ ᤆᤧᤵᤛᤡᤱ-ᤛᤧᤳᤜᤡᤱᤒᤠ ᤛᤧᤵᤔᤠᤱᤍᤱᤒᤠ ᤛᤠᤶᤎᤱᤗᤠᤶᤏᤢ ᤛᤧᤴᤗᤵ ᤂᤥᤔᤠ ᤌᤢᤶ ॥ ᤀᤰᤂᤧᤍᤱᤒᤠ ᤕᤠ᤺ᤶᤒᤰᤖᤧᤴ ᤂᤍᤧᤶᤔᤡᤴ ᤛᤍᤣ ᤛᤢᤰᤂᤣᤘᤠᤁᤢᤍᤡᤶ ᤔᤧᤒᤥ᤺ᤱᤏᤧᤴ ॥ ᤁᤢᤍ᤹ᤕᤠ ᤑᤧᤶᤔᤠᤖᤧ ᤛᤡ᤺ᤔᤠ ᤔᤧ᤺ᤴᤜᤢᤰᤋᤧᤴᤏᤠᤱ ᤗᤠᤱᤛ᤺ᤰᤐᤠ ᤐᤥ᤺ᤰᤂᤧᤀᤠᤱ ᤆᤠᤏᤠ᤺ᤰᤁᤡ ᤁᤧᤜᤡᤱᤒᤠ ᤐᤵᤐᤪᤠᤒᤠ ᤏᤠᤶᤓᤧᤖᤠᤒᤠ ᤔᤠᤰᤆᤧᤖᤧᤖᤧ ᤀᤡᤏᤥᤃᤧᤴ ᤘᤕᤠ ᤛᤠᤖᤡᤰᤁᤣ ᤏᤠᤎᤡᤶᤒᤠ ᤐᤠ᤺ᤴᤗᤠᤶᤏᤢ ᤂᤧᤍᤠ᤹ᤛᤠᤶᤒᤠ ᤛᤣᤛᤣᤜᤠᤱ ᤑᤡᤕᤠᤰᤗᤧ ᤐᤥᤎᤰᤋᤢᤀᤠᤱ ᤜᤧᤴᤏᤡ᤺ᤵᤐᤠ-ᤔᤠᤜᤠ᤹ᤖᤧ ᤜᤢᤴᤜᤡ᤹ ᤏᤡᤱᤘᤠ᤹ ᤜᤡ᤺ᤵᤛᤢᤖ ᤕᤖᤴᤍᤢᤀᤠᤱ ᤘᤠ ॥ 

᤻ ᤔᤏᤠᤜᤡᤱᤔᤴᤏᤥ ᤀᤠᤳᤋᤡ ᤕᤧᤶᤔᤥ ᤀᤠᤰᤋᤱᤒᤠ ᤗᤧᤰᤛᤡᤱ ᤋᤠᤒᤠ ᤐᤠ᤺ᤵᤔᤠ ᤔᤧ᤺ᤴᤜᤢᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤗᤧᤰᤛᤡᤱ ᤂᤧᤍᤠ᤹ᤜᤥ ᤁᤢᤛᤠᤏᤥᤖᤡᤰ ᤜᤰᤛᤢᤀᤠᤱ ᤘᤠ ॥ ᤀᤠᤒᤠᤱᤒᤠ ᤕᤠᤰᤌᤢᤱ ᤗᤠᤈᤣ᤹ ᤏᤢ ᤛᤢᤘᤠᤱᤖᤧᤴ ᤌᤢᤶ-ᤌᤢᤶᤒᤠ ᤛᤱᤈᤢᤶᤔᤡᤒᤠ ᤌᤡᤶᤜᤠ᤹ᤖᤧᤴ ᤁᤥᤶᤓᤥ ᤆᤥ᤺ᤰᤔᤠ-ᤛᤧ᤺ᤵᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤜᤡᤱᤔᤠ ᤔᤧᤴᤜᤡᤴ ᤛᤧᤵᤔᤢᤀᤡᤖᤧ ᤁᤢᤜᤡᤱᤔᤴᤏᤥ ᤆᤄᤵ ᤋᤩᤧᤒᤠ ᤗᤧᤰᤛᤡᤱᤖᤧ ᤏᤡᤱᤘᤠ᤹ ᤁᤧᤀᤢ᤺ᤱᤒᤠ ᤁᤢᤛᤠᤵ ᤗᤥ ᤁᤴ ᤂᤧᤍᤠ᤹ ॥  ᤕᤠᤶᤒᤡᤳᤜᤠ,ᤛᤠᤖᤧ  ᤜᤢᤴᤜᤡ᤹ ᤐᤱᤘᤠ᤺ᤵᤔᤠ, ᤑᤢᤱᤗᤰ ᤐᤥ᤺ᤱᤔᤠᤀᤠᤱ ᤜᤡᤱᤔᤠ, ᤋᤧᤴᤍᤡᤱ ᤔᤧᤶᤒᤡᤶᤏᤠᤠ ᤛᤠᤵᤔᤢᤴᤎᤢᤶᤔᤡᤒᤠ ᤕ᤺ᤖᤡᤰ ᤛᤠᤱᤎᤠᤒᤢᤜᤠ᤹ ᤋᤠᤰᤁᤶᤔᤠᤖ ᤛᤰᤏᤡ᤺ᤶ ᤆᤥ᤺ᤰᤔᤠ ᤁᤧᤔᤢᤴᤜᤡᤱᤔᤠ ᤔᤧᤴᤜᤩᤠ᤹ ᤛᤧᤶᤔᤢᤀᤡᤖᤧ ᤆᤄᤵ ᤐᤠ᤺ᤴᤔᤧ᤺ᤴᤍᤱ ᤐᤧᤏᤣᤌᤡᤰ ᤏᤢ ᤔᤣ᤺ᤰᤂᤡᤶ ᤀᤠᤰᤂᤧᤀᤠᤱ ᤆᤥᤃᤢ X ᤔᤠᤒᤠ᤺ᤴ ᤔᤧ᤺ᤴ ᤐᤧᤏᤣ-ᤐᤠᤸᤗᤰ ᤁᤧᤒᤠ᤺ᤵᤔᤠ ᤌᤣ᤺ᤀᤠᤱ ᤐᤥ᤺ᤰᤂᤧᤒᤣ᤺ X ᤁᤢᤃᤣᤛᤪᤠᤱᤅᤠᤥ ᤁᤴ ᤗᤧᤰᤛᤡᤱ ᤀᤠᤳᤋᤠᤴᤏᤢ ᤋᤩᤧ - ᤏᤥᤃᤵ ᤐᤡᤔᤠ ᤔᤧ᤺ᤴᤜᤢᤰᤐᤠ ᤛᤣ᤺ᤴᤍᤥᤜᤠ᤹ᤖᤧ ᤜᤧᤴᤏᤡ᤺ᤵᤐᤠ - ᤔᤠᤜᤠ᤹ᤖᤧ ᤏᤡᤱᤛᤶ (ᤁᤦᤋᤢᤜᤗ) ᤑᤥᤛᤢᤖ ᤂᤧᤍᤠ᤹ᤛᤠᤶᤒᤠᤖᤧ ᤂᤧᤍᤠ᤹ ᤛᤠᤵᤋᤢᤀᤠᤱ ᤘᤠ ॥

ᤏᤠᤶᤃᤧᤳ ᤏᤢ ᤏᤠᤶᤎᤠ ᤐᤡᤛᤠᤱᤒᤠ ᤛᤠᤰᤌᤡᤶ ᤏᤢ ᤂᤠᤛᤠᤵᤗᤢᤶᤔᤥ ᤁᤧᤏᤡ᤺ᤶᤒᤠ ᤋᤠᤱᤛᤡᤱ - ᤂᤰᤛᤡᤍᤠᤱᤒᤠ ᤕᤠᤰᤌᤢᤱ ᤌᤠᤱᤒᤧᤴ-ᤔᤧᤴᤜᤩᤠ᤹ᤜᤠ᤹ᤖᤧᤴ ᤁᤣᤛᤢᤪᤱᤀᤥ ᤁᤧᤍᤠᤒᤠ ᤗᤧᤰᤛᤡᤱᤖᤧ ᤛᤠᤰᤌᤡᤶᤔᤡᤒᤠ ᤑᤧᤴᤗᤠᤶᤍᤥ ᤻ᤛᤠ+:ᤁᤧᤡᤋᤁ ᤡᤘᤆᤗᤏ- ᤋᤠᤖᤢᤒᤠ ᤁᤢᤈᤧᤰᤕᤠ ᤐᤠ᤺ᤴ ᤂᤧᤍᤠ᤹ᤛᤠᤶᤒᤠᤖᤧ ᤂᤍᤧᤶ ᤆᤥᤃᤢᤀᤠᤱ ᤘᤠ ॥ ᤌᤠᤱᤒᤧᤴ-ᤔᤧᤴᤜᤩᤠ᤹ᤜᤠ᤹ᤖᤧ ᤗᤢᤶᤔᤥ ᤆᤢᤰᤋᤧᤒᤠ ᤛᤠᤰᤌᤡᤶᤔᤡᤒᤠ ᤑᤧᤴᤎᤡᤶ ᤗᤠᤶ-ᤛᤠᤰᤔᤠᤀᤠᤱ ᤀᤠᤒᤠᤱᤒᤠ ᤛᤠᤰᤌᤡᤶ, ᤌᤠ᤺ᤰᤕᤢᤎᤡᤶᤜᤠ᤹ ᤛᤧ᤺ᤵᤔᤠᤖᤥᤓᤠᤱ ᤂᤧᤍᤠ᤹ᤛᤠᤶᤒᤠᤖᤧ ᤂᤧᤍᤠ᤹ᤗᤠᤶ ᤀᤡᤱᤎᤡᤰ ᤀᤠᤒᤡ ॥ ᤌᤡᤰᤜᤢᤶ ᤀᤠᤒᤥ᤺ᤱᤏᤧᤓᤃᤪ ᤀᤠᤒᤠᤱᤒᤠ ᤏᤡᤛᤢᤶ ᤋᤰᤔᤠ ᤀᤠᤛᤢᤰᤋᤢᤶ ᤗ᤹ᤒᤠᤀᤠᤱ ᤀᤡᤱ ᤀᤠᤒᤡ᤹ ॥ ᤁᤴ ᤂᤧᤍᤠ᤹ ᤛᤡᤃᤠᤱ ᤛᤰᤀᤡᤱᤄᤱ ᤁᤣ᤺ᤳᤋᤢᤀᤠᤱ ᤁᤢᤛᤠᤵᤐᤧᤴᤈᤥ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ ॥

᤻ ᤏᤠᤶᤎᤠᤐᤡᤛᤠᤱᤒᤠ ᤆᤠᤱ-ᤋᤣ᤺ᤳ, ᤛ᤺ᤳ-ᤐᤧᤴᤋ, ᤋᤠᤀᤡ, ᤛᤢᤱᤄᤣᤒᤠ ᤏᤢ ᤔᤡᤰᤁᤠᤵᤐᤡᤴ ᤁᤧᤘᤠᤳᤜᤡᤱᤒᤠᤜᤠ᤹ᤖᤰ ᤏᤡᤱᤘᤠ᤹ ᤁᤧᤒᤡᤔᤠ, ᤀᤠᤒᤠᤅᤣ ᤕᤠᤰᤐᤱᤃᤣ ᤆᤠᤱ-ᤋᤣ᤺ᤳᤜᤠ᤹ ᤆᤧ᤺ᤰᤌᤠᤰᤁᤡ ᤋᤐᤪᤡ, ᤗᤃᤣᤳ, ᤗᤠᤱᤛᤢ᤺ᤵ, ᤛᤢᤱᤄᤣᤒᤠ ᤁᤧᤈᤠᤱᤒᤠᤜᤠ᤹ ᤌ᤺ᤳᤌ᤺ᤵᤐᤠ ᤜᤧᤰᤁᤣᤗᤰ ᤁᤧᤏᤡ᤺ᤔᤠ ᤛᤢᤔᤠᤈᤡ ᤑᤧᤴᤗᤠᤶᤍᤥ ᤁᤧᤏᤠ᤺ᤵᤔᤠ ᤔᤧᤴᤜᤡᤴ ᤛᤣᤛᤣᤏᤠᤖᤧ ᤂᤢᤏᤧ᤹ ᤁᤢᤃᤣᤛᤢᤪᤱ ᤔᤧ᤺ᤴᤏᤡᤆᤄᤵ ᤀᤠᤰᤂᤧᤖᤡᤰ ᤗᤧᤰᤛᤡᤱᤒᤣ ॥ ᤏᤛᤠ᤺ᤴ ᤆᤥ᤺ᤰᤔᤠ ᤔᤧ᤺ᤴᤜᤢᤰᤏᤠᤒᤠ ᤜᤡᤴᤎᤥ᤺ᤰ ᤀᤠᤰᤂᤧᤖᤡᤰ ᤆᤢᤰᤋᤧ, ᤁᤢᤒᤴᤕᤧᤶ ᤌᤣᤒᤧ ᥅ ᤁᤴ ᤛᤣ᤺ᤴᤍᤥᤖᤧ ᤁᤢᤏᤥᤃᤵᤐᤡᤴ ᤏᤛᤠ᤺ᤴᤏᤠᤱ ᤔᤠᤒᤠᤖᤳᤜ ᤂᤧᤍᤠ᤹ᤗᤠᤶ ᤂᤧᤍᤠ᤹ᤛᤠᤶᤒᤠᤖᤧ ᤀᤠᤒᤡᤖᤧᤀᤠᤱ ᤘᤠ ॥ 

ᤗᤧᤰᤛᤡᤱ ᤂᤧᤍᤠ᤹ ᤜᤧᤰᤁᤣ ᤁᤴ ᤂᤧᤍᤠ᤹ᤀᤥᤀᤠᤱ ᤏᤠᤶᤎᤠᤒᤠ ᤘᤣ᤹ᤗᤠᤈᤣ᤹ᤒᤠ ᤛᤠᤰᤌᤡᤶ ᤏᤢ ᤂᤠᤛᤠᤶᤜᤠ᤹ ᤏᤡᤱᤘᤠ᤹ ᤔᤧᤒᤡᤖᤢᤖ ᤏᤡᤒᤥ᤺ᤱᤀᤠᤱ ᤌᤡᤰᤛᤡᤃᤣ᤺ᤰᤐᤠ ᤋᤱᤃᤵᤐᤥᤒᤠ ᤁᤥᤕᤧᤶᤒᤠ ᤌᤠᤱᤒᤧᤴ-ᤔᤧᤴᤜᤡᤴᤖᤧ ᤜᤢᤴᤜᤡ᤹ ᤜᤡᤱᤔᤴᤏᤡᤴᤖᤧ ᤑᤧᤴᤗᤠᤶᤍᤥ ᤔᤧ᤺ᤴᤗᤳᤋᤢᤒᤠ ᤔᤧᤴᤜᤩᤠ᤹ᤖᤧᤴ ᤁᤢᤃᤣᤛᤢᤪᤱᤅᤥ ᤁᤧᤍᤠᤒᤠ ᤗᤧᤰᤛᤡᤱᤗᤠᤶᤔᤥᤏᤢ ᤁᤢᤛᤠᤏᤢᤖᤡᤰ ᤂᤧᤍᤠ᤹ᤛᤡᤃᤠᤱ ᤂᤧᤍᤠ᤹ᤛᤠᤶᤒᤠᤖᤧ ᤆᤧᤰᤂᤢᤀᤠᤱ ᤐᤳ ॥ ᤁᤴ ᤂᤧᤍᤠ᤹ᤗᤠᤶ ᤂᤧᤍᤠ᤹ᤛᤠᤶᤒᤠᤖᤧ ᤌᤣ ᤀᤡᤱ ᤀᤠᤒᤡᤓᤠ᤺ᤸᤗᤧ ᤀᤠᤒᤠᤱᤒᤠ ᤕᤠᤰᤐᤱᤃᤣᤒᤠ ᤆᤠᤱ-ᤋᤣ᤺ᤳ, ᤐᤠᤱᤗᤠᤱ ᤏᤢ ᤕᤠ᤹ᤗᤠ᤺ᤱᤜᤠ᤹ᤀᤣ ᤀᤠᤏᤡ᤹ ᤌᤡᤱᤃᤠ, ᤌᤰᤗᤠ ᤏᤢ ᤜᤡᤱᤔᤴ ᤗᤥ ॥

ᤁᤴ ᤂᤧᤍᤠ᤹ᤀᤡᤴᤏᤠᤱ ᤜᤢᤏᤧ ᤋᤢᤶᤔᤏᤠ ᤕᤔᤡᤰᤗᤠᤶᤏᤢ ᤛᤠᤵᤋᤢᤒᤠ ᤘᤣ᤹ ᤌᤡᤰ ᤂᤧᤍᤠ᤹ ᤖᤥ ॥ 

᤻ ᤁᤴ ᤂᤧᤍᤠ᤹ ᤖᤢᤔᤣᤖᤧ ᤁᤢᤛᤧᤵᤔᤠᤱᤜᤠ᤹ ᤀᤠᤒᤠᤱᤒᤠ ᤑᤢᤱᤀᤡ᤺ᤰ ᤁᤢᤍᤱᤒᤠ ᤂᤠᤶᤔᤡᤴ ᤔᤠᤰᤂᤡᤐᤡ᤺ᤵᤐᤠ (ᤛᤥᤛᤁ) ᤜᤠ᤹ᤖᤧᤴ ᤜᤢᤰᤁᤥᤏᤢ ᤏᤠᤵᤔᤠᤀᤠᤱ ᤕᤠᤠᤱᤔᤥ ᤜᤢᤰᤁᤠᤵ ᤔᤧᤳᤜᤡᤱᤔᤠ ᤌᤱᤅᤥ ᤛᤠᤶᤛᤠᤶᤗᤧᤳᤋᤡᤱ (ᤀᤠᤳᤔᤒᤗᤡᤍᤠᤏ) ᤁᤧᤒᤡᤒᤠ ᤖᤢᤔᤣ ᤋᤢᤶ-ᤐᤠᤱᤗᤥᤒᤠ ᤋᤠ᤺ᤴᤜᤥᤜᤠᤱᤖᤧ ᤂᤧᤍᤠ᤹ ᤖᤥ ॥

ᤋᤥ᤺ᤴᤍᤥ᤺ᤶᤒᤠ ᤏᤢ ᤕᤥ᤺ᤴᤈᤥ᤹ᤆᤥᤒᤠ ᤛᤠᤵᤗᤠ ᤏᤡ᤺ᤵᤔᤠ - ᤛᤠᤵᤔᤠ ᤔᤧᤸᤗᤧᤶᤏᤠᤒᤠ ᤀᤠᤏᤡ᤹ ᤛᤢᤌᤧᤒᤠ- ᤋᤠᤰᤌᤧᤒᤠᤛᤡ ᤀᤢᤴᤜᤥ᤺ᤶᤒᤠ ᤕᤧᤶᤔᤥ ᤋᤠᤰᤁᤧᤓᤧᤒᤠ, ᤀᤡᤛᤫᤠᤒᤠᤜᤠ᤹ᤖᤧ ᤀᤧᤵᤗᤧᤰᤐᤠ ᤕᤠ᤺ᤶᤒᤰᤗᤠᤶ ᤋᤧᤶᤛᤰᤁᤥ ᤌᤧᤈᤡ ᤀᤣ᤺ᤵ ᤔᤧᤒᤠᤱᤄᤢᤀᤠᤱ ᤂᤢᤴᤜᤡ᤹ ᤂᤠᤶ ᤔᤧᤏᤠ᤺ᤵᤋᤢ ᤔᤧᤍᤣ᤹ᤖᤢᤒᤠ ᤐᤠ-ᤔᤠᤖᤧ ᤔᤢᤖᤠᤀᤥᤏᤢ ᤋᤠᤗᤠ - ᤋᤠᤗᤠ ᤀᤠᤄᤧᤵᤛᤢᤶ ᤀᤠᤕᤢᤖᤢᤶᤒᤠ ᤁᤴ ᤂᤧᤍᤠ᤹ᤀᤡᤴ ᤋᤠ᤺ᤴᤜᤥᤜᤠᤱ ᤗᤳᤌᤡᤰᤗᤧᤴᤖᤰ ᤂᤧᤍᤠ᤹ ᤔᤧ᤺ᤴ ॥ ᤁᤴ ᤂᤧᤍᤠ᤹ᤀᤡᤴ ᤀᤡᤰᤛᤠᤀᤥᤒᤠ ᤁᤧᤖᤧᤰ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧᤴ, ᤁᤧᤖᤧᤰ ᤕᤠᤰᤌᤢᤱᤒᤠᤜᤠ᤹ᤖᤧᤴ ᤂᤧᤍᤠ᤹ ॥ 

ᤀᤢᤴᤜᤥ᤺ᤴ ᤀᤢᤴᤜᤥ᤺ᤴᤏᤢ ᤁᤧᤕᤢᤒᤠ ᤂᤠᤶᤒᤥ᤺ᤱᤒᤠ ᤗᤢᤱᤒᤥ᤺ᤱᤒᤠ ᤕᤠᤰᤌᤢᤱᤒᤠᤜᤠ᤹ᤖᤧ ᤐᤠ᤺ᤴᤔᤧ᤺ᤴᤍᤱ ᤀᤡᤛᤩᤠᤒᤠᤏᤢ ᤔᤧᤍᤢᤔᤢᤒᤠᤖ ᤔᤧᤕᤢᤖᤢᤒᤠ ᤔᤠᤰᤂᤡᤐᤡᤵ, ᤏᤡᤱᤄᤢᤶ ᤏᤢ ᤋᤢᤰᤂᤣᤘᤠᤖᤧ ᤁᤢᤍᤡᤶ ᤛᤠᤵᤔᤢᤴᤎᤢᤶ ᤐᤠ᤺ᤵᤔᤠ ᤛᤢᤰ ᤁᤴ ᤂᤧᤍᤠᤀᤡᤴ ॥ 

ᤛᤢᤌᤧᤒᤠᤜᤠ᤹ᤖᤧ ᤑᤠᤳᤔᤧᤗᤧᤰᤂᤢᤒᤠ, ᤔᤧᤕᤢᤰᤋᤢᤒᤠ ᤂᤠᤶᤔᤡᤴ ᤛᤢᤔᤧᤴᤜᤠ᤹-ᤋᤠᤰᤔᤧᤴᤜᤠ᤹ᤜᤠᤖᤧ ᤗᤠᤃᤡ ᤛᤧᤰᤂᤠ ᤐᤠ᤺ᤵᤔᤠᤏᤧᤓᤃᤪ ᤑᤢᤱᤀᤡᤰ ᤜᤧᤰᤁᤣᤀᤣ ᤐᤥ᤺ᤱ ॥ ᤑᤢᤱᤀᤡᤰᤁᤡᤴ ᤛᤠ᤺ᤰᤔᤠ - ᤛᤧ᤺ᤵᤔᤠ ᤛᤢᤔᤧᤴᤜᤠ᤹-ᤋᤠᤰᤔᤧᤴᤜᤠ᤹ᤜᤠᤖᤧ ᤂᤢᤏᤡ᤹ ᤑᤰᤋᤢᤱᤔᤥ ᤌᤠᤕᤧᤒᤠ ᤀᤡᤎᤠᤵ ᤗᤥ ॥ ᤀᤠᤒᤠᤱᤒᤠᤖᤧ ᤗᤠᤃᤡ ᤌᤱ ᤔᤧᤈᤥ᤺ᤰᤗ, ᤔᤧᤕᤠᤰᤐᤠ ᤌᤡᤒᤥ᤺ᤱ ᤌᤠᤰᤌᤢᤒᤠᤜᤠ᤹ᤖᤧᤴ ᤁᤢᤈᤧᤰᤐᤠ ᤘᤕᤠ ᤀᤥᤴᤃᤧᤎᤠᤰᤐᤠ ᤖᤢᤔᤣ ᤋᤠ᤺ᤴᤜᤥᤜᤠᤱᤖᤧᤴ ᤁᤴ ᤂᤧᤍᤠ᤹ᤀᤡᤴ ᤕᤧᤒᤥᤍᤡᤶᤒᤠ (ᤐᤪᤋᤡᤁᤠᤳᤔᤁ) ᤂᤧᤍᤠ᤹ ᤐᤠ᤺ᤵᤔᤠ ᤛᤢᤰ ॥ ᤛᤠᤖᤡᤰ ᤐᤏᤥᤖᤡᤰᤁᤠᤱ ᤏᤡᤱᤃᤢᤶᤒᤠ ᤏᤢ ᤏᤡᤱᤛᤡᤶᤒᤠ ᤐᤠ᤺ᤴ ᤏᤢ ᤐᤧᤴᤏᤠᤶᤔᤥ ᤛᤠᤵᤋᤧᤒᤠ ᤁᤴ ᤂᤧᤍᤠ᤹ ᤂᤧᤍᤠ᤹ᤛᤠᤶᤒᤠ᤺ᤸᤗᤧᤴ ᤏᤠᤎᤡᤶᤒᤠ ᤁᤢᤛᤠᤵᤐᤧᤴᤏᤠᤶ, ᤁᤢᤛᤠᤵᤐᤧᤴᤈᤥ ᤏᤢ ᤂᤧᤍᤠ᤹ ᤛᤠᤵᤔᤠᤖᤧ ᤁᤢᤎᤢᤶᤖᤧᤴ ᤋᤛᤡ ᤐᤠ᤺ᤵᤔᤠ ᤛᤢᤰ ॥

᤻ ᤂᤧᤍᤠ᤹ᤀᤡᤸᤗᤧ ᤕᤧ᤺ᤰᤂᤢᤒᤠ ᤏᤡᤱᤘᤠ᤹ ᤂᤧᤍᤠ᤹ᤀᤡᤴ ᤁᤠ᤹ᤀᤡᤖᤧ ᤂᤡᤵᤜᤡᤒᤠ ᤔᤡ᤺ᤶᤈᤡᤖ - ᤛᤠᤰᤁᤧᤖᤧ ᤀᤡᤎᤢᤴᤜᤡᤱᤒᤠ ᤌᤠᤱᤒᤧᤴ-ᤔᤧᤴᤜᤩᤠ᤹, ᤑᤢᤱᤛᤧᤖᤡ ᤏᤢ ᤐᤥᤖᤥᤰᤛᤡᤱᤛᤡ᤹ ᤜᤢᤴᤜᤡ᤹ ᤔᤡ᤺ᤶᤔᤡᤒᤠ ᤔᤣ᤺ᤰᤂᤡᤶ ᤛᤢᤔᤠᤈᤡᤖᤧ ᤋᤧᤴᤍᤡᤱ ᤔᤧᤒᤡᤖᤢᤶᤒᤠ ᤐᤥ᤺ᤰᤂᤧᤀᤠᤱ ᤂᤧᤳᤏᤧᤳᤜᤡ ᤐᤣᤛᤡ ᤁᤖ ᤔᤣ᤺ᤳᤆᤡ ᤘᤠᤜᤱᤅᤥ ᤏᤡ᤺ᤒᤧᤛᤡ ᤛᤩᤧᤛᤡᤒᤠ ᤂᤧᤍᤠ᤹ᤀᤡᤴ ᤜᤡᤴᤈᤠ᤹ ᤘᤕᤧᤸᤗᤧᤛᤠ ᤏᤠᤶᤛᤠᤱᤗᤧᤂᤧᤵᤛᤢᤀᤠᤱᤎᤥ ᤁᤢᤏᤡᤱᤘᤠ᤹ ᤛᤡᤃᤠᤱ ᤏᤡᤱᤘᤠᤀᤡᤜᤢᤵ (ᤔᤏᤥᤃᤪᤴᤌᤡ) ᤐᤥ᤺ᤰᤂᤧᤒᤣᤀᤠᤱ ᤘᤕᤧ ॥ ᤛᤧᤰᤂᤠ ᤁᤢᤃᤡᤔᤠ ᤜᤧᤰᤁᤣᤀᤣ ᤁᤢᤶᤔᤧᤴᤜᤩᤠᤱᤃ ᤗᤠᤶᤛᤠ᤹ᤔᤠ ᤌᤠᤵᤋᤧᤒᤠ ᤜᤡᤴᤎᤥ᤺ᤰᤗᤧ ᤏᤠᤶᤛᤠᤱᤖᤧ ᤁᤢᤢᤜᤡᤱᤔᤴᤏᤥ ᤛᤠᤘᤠᤴᤍᤢᤒᤠ ᤁᤴ ᤗᤠᤕᤥᤒᤠ (ᤐᤠᤐ) ᤌᤏᤠ (ᤒᤥᤎ) ᤖᤧ ᤐᤠᤱᤓᤣ᤹-ᤌᤠᤱᤓᤣ᤹ ᤗᤧᤖᤢᤀᤠᤱ ᤔᤠ᤺ᤱᤄᤠ ᤀᤠᤳᤋᤡᤸᤗᤠᤱ ᤔᤧᤴᤏᤡᤶᤔᤠᤏᤠᤒᤠ ᤋᤧᤴᤏᤥ ᤗᤠᤛᤧ ᤐᤣ᤺ᤛᤠᤱ ᤁᤢᤏᤡᤱᤘᤠ᤹ ᤛᤡᤃᤠᤱᤒᤠ ᤆᤩᤠᤱᤗᤠᤈᤣ᤹ᤀᤥ ᤀᤡ᤺ᤖᤧᤖᤰ ᤜᤡᤅᤧ ॥ 

ᤏᤡᤱᤘᤠ᤹ᤀᤡᤜᤢᤵ ᤐᤥ᤺ᤰᤂᤧᤀᤠᤱ ᤘᤠᤒᤠ ᤁᤴ ᤁᤡᤒᤢ (ᤋᤪᤠᤛ) ᤖᤧ ᤁᤢᤒᤢᤱᤅᤥ ᤛᤥ᤹ᤔᤠ ᤕᤠ᤺ᤶᤒᤰ (ᤒᤩᤠᤓᤡᤆᤠᤖ) ᤕᤠᤶᤄᤥᤒᤠ ᤕᤠ ᤂᤢᤶᤍᤡᤱᤒᤠ (ᤍᤴᤍᤏᤡᤕ) ᤆᤥ᤺ᤰᤑᤠᤱ ᤌᤠ᤺ᤰᤕᤢᤎᤡᤶᤒᤠ ᤀᤡ᤺ᤱ ᤛᤧᤛᤢᤀᤠᤱ ᤕᤠᤰ ᤐᤠ᤺ᤵᤔᤠ ᤛᤢᤰ ॥ ᤛᤥ᤹ᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ-ᤔᤠᤛᤡ ᤛᤧᤖᤡ-ᤗᤖᤠᤱᤗᤧ ᤛᤧᤖᤢᤛᤡ ᤁᤧᤗ᤹ᤒᤠ ᤕᤠᤰᤌᤢᤱᤜᤠ᤹ᤖᤧᤴ ᤏᤛᤠ᤺ᤴ ᤂᤧᤍᤠ᤹ᤗᤠᤶ ᤀᤥ᤺ᤴᤀᤠᤎᤠᤰᤋᤧᤀᤠᤱ ᤘᤠ ॥ ᤂᤧᤍᤠᤛᤠᤶᤒᤠᤖᤧ ᤁᤴ ᤂᤧᤍᤠ᤹ᤀᤥ ᤛᤠᤰᤌᤡᤶᤔᤡᤒᤠ ᤌᤡᤶᤈᤡᤰᤐᤠ ᤔᤧᤸᤗᤢᤱ ᤁᤢᤛᤠᤏᤢᤖᤡᤰ ᤌᤧᤃᤢᤀᤠᤱ ᤁᤢᤂᤧᤍᤠ᤹ ᤛᤠᤵᤐᤧᤴᤏᤠᤶᤈᤥ ᤛᤠᤖᤡᤰ ᤌᤢᤶᤓᤠᤱ ᤏᤡᤛᤢᤶ ᤀᤠᤒᤡ᤹ᤖᤧᤀᤠᤱ ᤘᤠ ॥ ᤜᤧᤰᤁᤣᤖᤰ ᤔᤧ᤺ᤴ ᤁᤴ ᤂᤧᤍᤠ᤹ᤀᤡᤴ ᤜᤡᤴᤈᤠ᤹-ᤕᤥᤍᤱᤅᤥ ᤋᤢᤶᤏᤠᤒᤠ ᤗᤳᤌᤡᤰ ᤛᤢᤕᤧᤶ (ᤛᤴᤕᤥᤃ) ᤁᤢᤜᤡᤱᤔᤴᤏᤥ ᤋᤠ᤺ᤴᤍᤡ ᤏᤡᤛ᤻ᤛᤧᤒᤠ ᤐᤥ᤺ᤱᤔᤠ ᤛᤢᤰ ᤁᤧᤗ᤹ᤒᤠ ᤏᤡᤱᤏᤡᤱᤘᤠ᤹ᤗᤠᤒᤠ (ᤔᤏᤥᤒᤤᤃᤩᤠᤏᤡᤰ) ᤂᤧᤍ᤹ᤠᤀᤠᤱ ᤐᤠ᤺ᤵᤔᤠ ᤛᤢᤰ ॥

᥋.᥇. ᤛᤣᤛᤣᤜᤠᤱ ᤑᤡᤕᤠᤰᤗᤧᤴ ᤂᤧᤍᤠ᤹ᤖᤧᤴ ᤁᤢᤏᤥᤁᤢᤒᤡ

᥇. ᤂᤧᤍᤠ᤹ᤖᤧ ᤌᤥᤰᤐᤡ 

ᤔᤏᤠᤜᤠ᤹ᤗᤰ ᤔᤧ᤺ᤴ ᤐᤠᤳᤌᤢᤱᤍᤡᤱᤒᤠ ᤀᤠᤳᤋᤡᤴᤜᤠᤱ ᤌᤰᤛᤠ-ᤐᤢᤛᤠ, ᤐᤠᤳᤌᤢᤱᤔᤧᤶᤒᤠ ᤑᤵᤕᤠ (ᤒᤛ᤻ᤋᤢ) ᤕᤠᤱᤏᤡ᤺ᤶ (ᤐᤪᤁᤪᤡᤋᤡ) ᤖᤧᤴ ᤘᤣ᤹ᤘᤣ᤹ ᤁᤢᤕᤠᤶ (ᤀᤠᤕᤠᤶ) ᤜᤠ᤹ ᤏᤢᤎᤣᤃᤠ᤺ᤰ ᤘᤣ᤹ᤘᤣ᤹ ᤐᤖᤡᤰᤐᤠ ᤌᤥᤰᤐᤡᤜᤠ᤹ᤀᤥ ᤛᤣᤛᤣᤜᤠᤱᤗᤧᤴ ᤁᤢᤄᤧᤍᤠ᤹ ᤛᤠᤵᤋᤧᤒᤠ ᤂᤥᤍᤧᤳ ॥ 

᥈. ᤀᤠᤏᤡ᤹ ᤛ᤺ᤱᤈᤢᤶᤓᤥᤒᤠ ᤜᤡᤴᤔᤴᤏᤥ ᤛᤧᤴ-ᤗᤧᤴ ᤀᤠᤍᤢᤔᤢᤶᤒᤠ ᤏᤠᤵᤔᤡ ᤀᤠᤕᤢᤰᤐᤠ ᤁᤧᤃᤵᤐᤠᤜᤠ᤹ᤖᤧ ᤀᤠᤶᤒᤡᤒᤠ ᤀᤡᤏᤥ-ᤋᤢᤰᤂᤣ, ᤜᤡᤏᤠᤶ ᤕᤠ ᤁᤢᤏᤠᤔᤧ᤺ᤴᤜᤠ᤹, ᤕᤠᤱᤛᤠ᤹ᤔᤠ, ᤔᤧ᤺ᤴᤍᤱᤘᤠ, ᤕᤔᤧ᤺ᤴᤍᤱ, ᤏᤡᤜᤠᤶᤜᤥ᤺ᤵᤔᤠ, ᤔᤡ᤺ᤶ, ᤛᤧᤶᤔᤢᤀᤡ ᤜᤧᤰᤁᤩᤠᤱ ᤐᤠᤱᤓᤣ᤹ᤋᤠᤱᤓᤣ᤹ᤒᤠ ᤜᤡᤱᤒᤪᤠᤶᤖᤧᤴ ᤕᤠ᤺ᤴᤎᤠ-ᤂᤧᤖᤠ ᤏᤢ ᤋᤢᤰᤂᤣ-ᤗᤠᤰᤂᤣᤖᤧ ᤁᤢᤏᤠ᤺ᤶᤒᤣᤀᤥ ᤜᤡᤅᤧᤒᤠ ᤆᤢᤱᤈᤡᤕᤧᤳᤜᤠᤒᤠ ᤜᤡᤱᤔᤴᤏᤡᤴ ᤛᤣᤛᤣᤜᤠᤱ ᤑᤡᤕᤠᤰᤗᤧᤴ ᤂᤧᤍᤠ᤹ᤖᤧᤴ ᤌᤥᤰᤐᤡᤜᤠ᤹ ᤖᤥ ॥ ᤑᤧᤴᤈᤡᤰ, ᤑᤧᤴᤏᤠᤶ ᤏᤢ ᤑᤧᤴᤎᤡᤶᤜᤠ᤹ᤖᤧ ᤛᤠᤔᤧᤘᤠ᤺ᤴᤍᤢᤒᤠ ᤆᤧᤵᤛᤡᤱ - ᤛᤧᤳᤜᤡᤱᤖᤧ ᤏᤠᤎᤡᤶᤛᤢᤒᤠ ᤜᤠᤱᤌᤡᤶᤔᤠᤱ ᤁᤢᤄᤧᤧᤍᤠ᤹ᤜᤠ᤹ᤖᤧ ᤌᤥᤰᤐᤡ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ ॥ ᤜᤧᤴᤜᤠ᤹ᤗᤰ ᤔᤧ᤺ᤴ - ᤌᤠᤱᤒᤧᤴ - ᤔᤧᤴᤜᤡᤴᤖᤧ ᤔᤡ᤺ᤶᤈᤡ ᤏᤢ ᤐᤠ-ᤔᤠᤏᤢ ᤛᤠ-ᤀᤣᤛᤠᤔᤠᤗᤢᤶᤔᤥᤒᤠ ᤔᤡ᤺ᤶᤔᤡᤴ ᤋᤢᤶ ᤂᤧᤍᤠ᤹ - ᤌᤥᤰᤐᤡ ᤆᤥ᤺ᤰᤔᤠᤀᤠᤱ ᤛᤠᤵᤔᤠ ᤂᤢᤏᤧ᤹ᤘᤣ᤹ ᤌᤡᤰ ᤁᤢᤏᤥᤁᤢᤒᤡᤀᤠᤱ ᤖᤥ ॥

᥉. ᤁᤢᤄᤧᤍᤠ᤹ᤖᤧ ᤌᤡᤰ ᤁᤢᤏᤥᤁᤢᤒᤡ᤹ ᤌᤣ᤺ᤓᤠ᤺ᤸᤗᤧ ᤕᤠᤰᤌᤢᤱ ᤐᤠᤱ-ᤛᤠᤵᤛᤰ, ᤐᤠᤱ-ᤛᤠᤶᤗᤥ ᤕᤠ ᤐᤠᤗᤠᤶᤔᤡᤴ ᤏᤢ ᤐᤠᤱ-ᤗᤠ᤺ᤱᤜᤠ᤹ᤖᤧ ᤁᤢᤗᤢᤶᤗᤠᤶᤏᤢᤀᤠᤱ ᤂᤢᤏᤧ᤹ ᤁᤢᤄᤧᤍᤠ᤹ᤜᤠ᤹ ᤑᤥᤛᤢᤀᤠᤱᤅᤠᤱ ᤋᤣ᤹ᤖᤢᤀᤠᤱ ᤘᤠ ॥ ᤁᤸᤗᤧ ᤆᤥᤃᤢ᤺ᤸᤗᤧ ᤂᤧᤍᤠ᤹ᤖᤧᤀᤠᤱ ᤁᤢᤏᤠᤘᤠ ᤕᤧᤰᤕᤠᤒᤠ ᤐᤥ᤺ᤰᤂᤧᤀᤠᤱᤏᤧᤓᤃᤪ ᤁᤢᤛᤠᤏᤢᤒᤠᤀᤠᤱ ᤐᤥ᤺ᤰᤂᤧᤀᤠᤱ ॥ ᤜᤧᤰᤁᤩᤠᤱ ᤁᤸᤗᤧ ᤀᤠᤒᤠᤅᤣᤒᤠ ᤐᤠᤱᤛᤠᤶᤗᤥᤜᤠ᤹ᤀᤠᤱ ᤋᤠᤱᤛᤨ᤺ᤵ ᤐᤡᤖᤢᤀᤠᤱ ᤘᤠᤖᤥᤓᤠᤱ ᤐᤠ᤺ᤵᤔᤠᤸᤗᤧ ᤐᤠ᤺ᤴ ᤔᤧᤀᤡ᤺ᤳᤏᤧᤴ ॥ ᤀᤰᤂᤧᤖᤡᤰ ᤐᤠᤱ-ᤛᤠᤶᤗᤥ ᤏᤢ ᤐᤠᤗᤠᤶᤔᤡᤴ ᤀᤥᤃᤠᤵ ᤆᤥ᤺ᤰᤔᤠᤀᤠᤱ ᤂᤧᤍᤠ᤹ ᤛᤠᤵᤔᤠ ᤂᤧᤍᤠ᤹ᤛᤠᤶᤒᤠᤖᤧ ᤐᤠᤕᤧᤶᤒᤠ ᤁᤏᤥᤁᤢᤍᤡ᤹ ᤏᤡᤍᤧᤳ॥

᥋.᥈. ᤂᤧᤍᤠ᤹ᤖᤧ ᤐᤠᤱᤗᤥᤒᤠ-ᤔᤠ 

᥇. ᤛᤣᤛᤣᤜᤠᤱᤖᤧ ᤁᤢᤄᤧᤍᤠ᤹ᤜᤠ᤹ᤀᤥ ᤌᤥᤰᤐᤡ ᤜᤧᤰᤁᤣᤀᤣ ᤂᤧᤍᤠ᤹ᤖᤧ ᤐᤠᤱᤗᤥᤒᤠ-ᤔᤠᤜᤠ᤹ ᤘᤣ᤹ᤘᤣ᤹ ᤐᤖᤡᤰᤗᤧᤴ ᤔᤧᤘᤠᤛᤠᤱ ᤔᤧᤴᤜᤠᤶ ᤏᤠᤶᤕᤠᤵᤔᤡᤀᤣ ᤔᤧᤀᤡ᤺ᤳ ॥ ᤂᤢᤴᤜᤡ᤹ ᤔᤠᤗᤠᤈᤣ᤹ ᤕᤠ ᤛᤢᤎᤧᤒᤠ- ᤋᤠᤰᤌᤧᤒᤠᤖᤧ ᤔᤧᤕᤢᤰᤋᤢ ᤔᤧᤕᤢᤖᤢᤒᤠ ᤂᤠᤶᤒᤣ᤺ᤰᤁᤡᤴ ᤐᤠᤰᤔᤧᤎᤀᤠᤱ ᤜᤡᤱᤒᤪᤠᤶᤖᤧ ᤗᤠᤃᤡ ᤆᤡᤔᤢ ᤁᤥ᤺ᤳᤋᤡ - ᤁᤠᤣ᤺ᤳᤋᤡ ᤘᤣ᤹ᤗᤠᤈᤣᤜᤠ᤹ᤀᤥ (ᤜᤱᤁᤱ, ᤁᤥᤖᤡᤕᤠ, ᤔᤗᤣᤛᤡᤕᤠ, ᤀᤖᤒ᤻, ᤁᤸᤑ ᤗᤠᤈᤣ᤹) ᤏᤢ ᤔᤡᤰᤑᤢ᤹ᤗᤠ ᤁᤪᤂᤠ-ᤌᤰᤛᤢ ᤋᤢᤖᤠᤀᤥ ᤔᤧᤗᤠᤛᤧᤀᤠᤱ ᤐᤢᤪᤏᤠᤀᤡ, ᤛᤡᤱᤃᤠᤐᤢᤖ ᤏᤢ ᤕᤢ,ᤁᤧ,ᤏᤠᤀᤠᤱ ᤁᤧᤃᤧᤵᤐᤠ ᤕᤠᤰᤌᤢᤱᤒᤠ - ᤔᤠᤜᤠ᤹ᤀᤠᤱ ᤐᤠᤱᤗᤥᤒᤠ-ᤔᤠ ᤔᤧᤘᤠ ॥

᥈. ᤔᤏᤠᤜᤠ᤹ᤗᤰ ᤔᤧ᤺ᤴ ᤌᤰᤛᤠ-ᤁᤢᤒᤢ ᤏᤢ ᤕᤠᤱᤏᤡ᤺ᤶᤖᤧᤴ ᤘᤣ᤹ᤘᤣ᤹ ᤁᤢᤕᤠᤶᤜᤠ᤹ᤀᤠᤱ ᤔᤧᤘᤠ ॥ ᤛᤢᤶᤘᤠᤍᤥ ᤂᤧᤍᤠ᤹ᤀᤥ ᤀᤖᤢᤴ, ᤋᤔᤥᤖ ᤏᤢ ᤁ᤺ᤁᤠ ᤘᤠᤜᤱᤜᤠ᤹ ᤔᤏᤠᤍᤡᤱᤒᤠ ᤏᤠᤀᤡᤒᤣ᤺ᤰ ᤐᤡᤖᤢᤛᤡᤀᤠᤱ ᤐᤠᤱᤗᤥᤒᤠ-ᤔᤠ ᤆᤥᤃᤢᤀᤠᤱ ᤘᤠ ॥

᥋.᥉. ᤂᤧᤍᤠ᤹ᤖᤧ ᤐᤧᤴᤏᤠᤶ ᤏᤢ ᤛᤠᤵᤐᤧᤴᤈᤥ 

᥇. ᤂᤧᤍᤠ᤹ ᤁᤢᤛᤠᤏᤥᤖᤡᤰ ᤋᤣᤛᤧ ᤛᤠᤵᤆᤥᤒᤧᤴ (ᤛᤡᤐ) ᤏᤥ ᤂᤧᤍᤠ᤹ᤛᤠᤶᤒᤠᤜᤠ᤹ ᤆᤥᤒᤧᤶᤒᤠ ᤐᤥ᤺ᤱᤔᤠᤀᤥ ᤐᤥ᤺ᤱ ॥ ᤂᤧᤸᤗᤧ ᤗᤠᤃᤡ ᤂᤢᤏᤡ᤹ ᤔᤧ᤺ᤴᤖᤳᤋᤢᤒᤠ ᤐᤧᤴᤏᤠᤶ (ᤛᤤᤗᤡ)  ᤏᤢ ᤜᤧ᤹ᤕᤥ ᤀᤥᤔᤧᤃᤠᤵᤋᤢᤒᤠ ᤜᤧᤴᤏᤠᤶ (ᤐᤪᤒᤡᤎᤡ) ᤖᤧ ᤀᤡᤎᤠ᤺ᤵ ᤕᤠ ᤗᤠᤱᤒᤣ (ᤍᤠᤕᤡᤋᤫ) ᤕᤶᤒᤠ ᤆᤥ᤺ᤰ ॥ 

᥈. ᤂᤧᤍᤠᤛᤠᤶᤒᤠ ᤑᤡᤕᤠᤰᤜᤠᤱᤖᤧ ᤕ᤺ᤰᤋᤱᤒᤠ ᤁᤢᤄᤧᤍᤠ᤹ᤜᤠ᤹ᤀᤥ ᤕᤠᤰᤌᤢᤱ ᤛᤠᤰᤌᤡᤶ ᤀᤥ᤺ᤴᤁᤧᤎᤠᤰᤐᤠ ᤜᤡᤴᤎᤥ᤺ᤰ ᤏᤢ ᤘᤠᤏᤠᤶ ᤀᤡᤜᤠᤵᤋᤢᤀᤠᤱ ᤐᤏᤥᤖᤡᤰ ᤁᤢᤛᤠᤵ ᤆᤥᤃᤢᤀᤠᤱ ᤘᤠᤒᤠ ᤏᤡᤍᤧᤳ ॥ ᤂᤧᤍᤠᤛᤠᤶᤒᤠᤖᤧ ᤁᤢᤒᤠ᤺ᤴ ᤏᤢ ᤁᤢᤛᤠᤵᤐᤧᤴᤏᤠᤶ ᤏᤡᤱᤘᤠ ᤁᤧᤀᤢ᤺ᤱᤒᤠ ᤏᤢ ᤐᤏᤢᤒᤠᤖᤰ ᤔᤧ᤺ᤴ ᤏᤡᤱᤃᤢᤶᤒᤠ ᤏᤢ ᤏᤡᤱᤛᤡᤶᤒᤠ ᤆᤥᤃᤢᤀᤠᤱ ᤘᤠ ॥ ᤀᤥᤃᤠᤵ ᤔᤧᤳᤋᤢᤒᤠ ᤁᤢᤒᤠ᤺ᤴᤏᤡᤴ ᤀᤢᤛᤢᤖᤢᤒᤠ ᤘᤠ ॥ ᤔᤢᤰᤂᤧᤍᤠ᤹ ᤏᤢ ᤐᤠ᤺ᤴᤜᤢᤶ (ᤋᤢᤰᤁᤠ) ᤜᤠ᤹ᤀᤠᤱ ᤀᤥᤃᤠᤵ ᤔᤧᤳᤋᤢᤀᤠᤱ ᤂᤧᤍᤠ᤹ᤖᤧ ᤁᤢᤒᤠ᤺ᤴᤏᤡᤴ ᤏᤠᤎᤡᤶᤒᤠ ᤆᤥᤃᤢᤀᤠᤱ ᤘᤠ ॥

ᤃ. ᤂᤧᤍᤠ (ᤗᤡᤛᤡ ᤂᤧᤍᤠ᤹) ᤛᤡᤃᤠᤱ ᤛᤰᤀᤡᤱᤄᤱ ᤁᤣ᤺ᤳᤋᤢᤀᤠᤱ ᤁᤢᤛᤠᤵᤐᤧᤴᤈᤥ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ ॥

᥉. ᤗᤡᤛᤡ ᤂᤧᤍᤠ᤹ᤛᤡᤃᤠᤱ ᤐᤠᤱ-ᤛᤠᤶᤗᤥ ᤕᤠ ᤐᤠᤗᤠᤶᤔᤡᤴ ᤌᤧᤃᤢᤀᤠᤱ ᤂᤧᤍᤠ᤹ ᤏᤡᤱᤛᤡᤶᤒᤠ ᤆᤥᤃᤢᤀᤠᤱ ᤘᤠ ॥

᥋.᥊. ᤂᤧᤍᤠ᤹ ᤛᤠᤵᤔᤧᤖᤧ ᤕᤔᤡᤰ

ᤂᤧᤍᤠ᤹ᤛᤠᤶᤒᤠᤜᤠ᤹ᤖᤧ ᤘᤣ᤹ᤘᤣ᤹ ᤐᤧᤴᤏᤠᤶ ᤔᤧᤏᤠᤳᤋᤢᤛᤠᤱ ᤕ᤺ᤰᤋᤱᤒᤠ ᤋᤢᤶᤔᤏᤠ ᤕᤔᤡᤰ ᤕᤠ ᤛᤥᤛᤠᤰᤁᤢᤶᤗᤠ᤹ᤒᤠ ᤐᤧᤴᤏᤠᤶ (ᤀᤠᤳᤔᤐᤖᤰ ᤛᤤᤗᤡ) ᤏᤢ ᤘᤣ᤹ᤛᤥᤛᤠᤰᤁᤢᤶᤗᤠ᤹ᤒᤠ (ᤒᤛ᤻ᤋᤢᤐᤖᤰ ᤛᤤᤗᤡ) ᤐᤧᤴᤏᤠᤶᤔᤣ ᤔᤧ᤺ᤴᤖᤳᤋᤢᤒᤠ ᤏᤡᤍᤧᤳ ॥ ᤛᤥᤛᤠᤰᤁᤢᤶᤗᤠ᤹ᤒᤠ ᤕᤔᤡᤰ ᤕᤠᤶᤃᤢᤶᤒᤠ (ᤛᤠᤐᤣᤜᤩ) ᤆᤥ᤺ᤰᤏᤣᤓᤃᤪ ᤘᤣ᤹ᤛᤠᤰᤁᤢᤶᤗᤠᤒᤠ ᤕᤔᤡᤰ ᤕᤠᤶᤃᤢᤶᤜᤥ᤺ᤵᤐᤠ (ᤏᤡᤷᤐᤣᤜᤩ) ᤆᤥ᤺ᤰ ॥ ᤂᤧᤍᤠ᤹ ᤛᤠᤵᤔᤧᤀᤥ ᤛᤣᤛᤣᤜᤠᤱ ᤑᤡᤕᤠᤰᤗᤧᤀᤠᤱ ᤘᤣ᤹ᤔᤏᤠ ᤕᤔᤡᤰ ᤏᤢ ᤋᤢᤶᤔᤏᤠ- ᤕᤔᤡᤰᤐᤠ ᤏᤧᤵᤒᤠᤠᤠᤱ ᤐᤧᤴᤏᤠᤔᤡᤴᤏᤠᤱ ᤏᤠ᤺ᤳᤋᤢᤒᤠ ᤏᤡᤍᤧᤳ ॥

᥋.᥋. ᤂᤧᤍᤠ᤹ᤖᤧᤴ ᤛᤥ᤺ᤰ 

᥇. ᤁᤥᤕᤧᤶᤒᤠ ᤕᤧᤶᤔᤥᤒᤠ ᤜᤠᤱᤎᤡᤶᤒᤠ, ᤕᤠᤱᤈᤡᤰᤐᤠ ᤏᤢ ᤛᤢᤔᤠᤈᤡᤒᤠ ᤘᤕᤠᤜᤠ᤹ᤖᤧᤴᤏᤠᤱ ᤁᤢᤈᤧᤰᤕᤠᤒᤠ ᤻ᤕᤌᤠᤌᤨ- ᤆᤧᤱ-ᤛᤠᤵ ᤆᤥ᤺ᤰᤔᤠ, ᤛᤢᤔᤠᤈᤡᤒᤠ ᤑᤧᤴᤈᤡᤰ, ᤑᤧᤴᤗᤠᤶᤍᤥ, ᤑᤧᤴᤗᤠᤶ ᤏᤢ ᤑᤧᤴᤏᤠᤶ ᤀᤖᤣᤴᤎᤠᤰᤔᤠ ᤁᤢᤂᤧᤍᤠ᤹ᤖᤧᤴ ᤛᤖᤣᤰ ᤐᤠ᤺ᤵᤔᤠ ᤛᤢᤰ ॥ 

ᤕᤠᤰᤌᤢᤱ ᤛᤢᤘᤠᤱᤅᤥ ᤁᤧᤘᤠᤒᤠ ᤀᤣᤛᤠᤔᤠᤖᤧᤴ ᤗᤧᤱᤜᤱ ᤆᤥ᤺ᤰᤔᤠ- ᤆᤠᤔᤠᤏᤠᤒᤠ, ᤜᤰᤋ᤺ᤒᤠ ᤕ᤺ᤰ ᤏᤠ᤺ᤰᤔᤠᤏᤠᤒᤠ ᤑᤧᤴᤎᤡᤶᤜᤠ᤹ ᤀᤠᤣ᤺ᤴᤎᤠᤰᤔᤠ ᤁᤢᤄᤧᤍᤠ᤹ᤜᤠ᤹ᤖᤧᤴ ᤛᤥ᤺ᤰ ॥ 

᥈. ᤁᤢᤂᤧᤧᤍᤠ᤹ᤛᤡᤃᤠᤱ ᤗᤳᤌᤡᤰ ᤏᤠ ᤗᤳᤌᤡᤰ ᤀᤡᤱ ᤘᤠᤀᤣ ᤘᤠ ॥ ᤁᤢᤂᤧᤍᤠ᤹ᤜᤠ᤹ ᤀᤡᤱᤛᤧᤒᤠ (ᤛᤴᤍᤣᤛᤔᤢᤗᤰ) ᤔᤧᤈᤥ᤺ᤰ ॥ ᤛᤢᤔᤠᤈᤡᤒᤠ ᤑᤧᤴᤗᤠᤶ ᤏᤢ ᤑᤧᤴᤏᤠᤶᤖᤧ ᤋᤠᤖᤢᤒᤠ ᤁᤡᤒᤢᤗᤠ (ᤋᤪᤠᤛᤍᤡ) ᤀᤥ᤺ᤴᤎᤠᤰᤔᤠᤀᤣ ᤁᤢᤄᤧᤍᤠ᤹ᤜᤠ᤹ᤖᤧᤴ ᤋᤠᤖᤠᤵᤑᤠᤓᤠᤱ ᤆᤡᤈᤧᤵᤔᤠ ᤛᤢᤰ ॥ 

᥉. ᤁᤢᤂᤧᤍᤠ᤹ᤜᤠ᤹ ᤌᤠᤱᤒᤧᤴ-ᤔᤧᤴᤜᤩᤠ᤹ ᤗᤢᤶᤔᤥ ᤆᤢᤰᤋᤧᤒᤠ ᤛᤠᤰᤌᤡᤶᤔᤡᤒᤠ ᤏᤢ ᤛᤢᤔᤠᤈᤡᤒᤠ ᤑᤧᤴᤗᤠᤶ ᤏᤢ ᤑᤧᤴᤏᤠᤶ, ᤑᤧᤴᤗᤠᤶᤍᤥᤜᤠ᤹ᤖᤧᤴ ᤏᤠᤖᤠᤒᤠ ᤋᤣ᤺ᤵᤑᤠᤣ᤺ᤴᤍᤠᤜᤠ᤹ ᤁᤧᤓᤠᤱᤒᤠ ᤀᤡᤱᤛᤧᤒᤠ ᤔᤧᤵᤔᤠ ᤛᤢᤰ ॥

᥊. ᤌᤠ᤺ᤰᤕᤢᤎᤡᤶ, ᤐᤠᤱᤛᤠᤰᤌᤡᤶ, ᤐᤠᤱᤛᤠᤶᤀᤡᤰᤗᤠᤜᤠ᤹ᤖᤧᤴ ᤋᤠᤱᤛᤧ᤺ᤵ ᤏᤢ ᤑᤥᤒᤥᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤗᤠᤜᤡᤱᤗᤠ (ᤐᤣᤪᤖᤏᤠ) ᤕᤠ ᤕᤠᤶᤈᤠᤱᤘᤠ ᤀᤠᤒᤡ ॥ 

᥌. ᤏᤡ᤺ᤳᤜᤠᤶᤜᤥ᤺ᤵᤔᤠᤖᤧ ᤔᤏᤠᤜᤡᤱᤔᤴᤏᤥ ᤋᤠᤖᤢᤒᤠ ᤋᤢᤰᤂᤣ-ᤗᤠᤰᤂᤣᤜᤠ᤹ ᤐᤥᤎᤰᤋᤢᤖ ᤂᤧᤴᤜᤠ᤹ ᤛᤠᤱᤃᤧᤴ ᤑᤥᤕᤥ ᤋᤣ᤹ᤔᤠᤖᤧ ᤏᤡᤗᤠᤶ (ᤀᤢᤐᤠᤕ) ᤂᤧᤍᤠ᤹ᤛᤠᤶᤒᤠᤖᤧ ᤀᤠᤣ᤺ᤴᤀᤠᤶᤎᤠᤰ ᤐᤠ᤺ᤵᤔᤠ ᤛᤢᤰ ॥

᥍. ᤌᤠᤱᤒᤧᤴ-ᤔᤧᤴᤜᤩᤠ᤹ᤜᤠ᤹ ᤘᤣ᤹ᤘᤣ᤹ ᤗᤠᤈᤣ᤹ ᤐᤣ᤺ᤰᤔᤠᤖᤧ ᤁᤢᤗᤧᤰᤘᤠ ᤐᤠ ᤀᤠᤒᤠᤅᤣ ᤐᤠᤱᤓᤣ᤹- ᤌᤠᤱᤓᤣ᤹ᤀᤥ ᤘᤠᤔᤠᤖ ᤜᤥ᤺ᤶᤒᤪᤡᤰᤘᤠ ᤛᤧᤔᤠᤀᤠᤱ ᤗᤠᤈᤣ᤹ ᤏᤢ ᤛᤠᤰᤌᤡᤶᤜᤠ᤹ ᤛᤧ᤺ᤵᤛᤡᤱ ᤐᤡᤔᤠ ᤌᤢᤶ ᤀᤠᤒᤡ᤹ ॥

᥌. ᤜᤡᤴᤎᤥ᤺ᤰᤁᤡᤒᤠ ᤂᤧᤍᤠ

ᤛᤣᤛᤣᤜᤠᤱ ᤑᤡᤕᤠᤰᤜᤠᤱᤗᤧᤴ ᤁᤧᤖᤧᤰ ᤂᤧᤍᤠ᤹ᤜᤠ᤹ ᤜᤡᤴᤎᤥ᤺ᤰᤁᤡᤒᤠ ᤂᤧᤍᤠ᤹ ᤔᤧᤵᤔᤠᤒᤥ᤺ᤱ ॥ ᤐᤠ ᤗᤳᤌᤡᤰ ᤂᤧᤍᤠ᤹ᤀᤥ ᤌᤡᤰᤏᤢᤀᤠᤱ ᤕ᤺ᤰ ᤜᤡᤴᤎᤥ᤺ᤰ ᤔᤧᤈᤢᤰ ॥ ᤜᤧᤰᤁᤣᤛᤠᤱ ᤁᤢᤄᤧᤍᤠ᤹ ᤏᤠ᤺ᤳᤗᤠᤏᤠ᤺ᤳᤗᤠ ᤆᤰᤔᤧᤶᤒᤢ᤹ᤀᤣ ᤐᤥᤖᤒᤣ᤺ᤰ ॥ ᤐᤠ ᤁᤴ ᤌᤢᤶᤔᤡᤗᤠᤒᤠᤖᤧᤀᤣ ᤂᤧᤍᤠ᤹ᤛᤠᤶᤒᤠ ᤛᤒᤵᤐᤠ ᤆᤥᤃᤢᤀᤠᤱ ᤘᤠᤖᤥ ॥ 

᥍. ᤁᤢᤏᤢᤶ ᤐᤠ᤺ᤴ

ᤂᤧᤍᤠ᤹ᤛᤠᤶᤒᤠ ᤛᤣᤛᤣᤜᤠᤱ ᤑᤡᤕᤠᤰᤜᤠᤱᤗᤧᤴ ᤁᤴ ᤂᤧᤍᤠ᤹ᤛᤢᤱᤅᤡᤴ ᤂᤢᤏᤧ᤹ᤀᤡᤴ ᤌᤡᤰᤛᤡᤃᤣ᤺ᤰᤐᤠ ᤂᤧᤍᤠ᤹-ᤛᤢᤱ ᤗᤥ ॥ ᤜᤧᤰᤁᤣᤛᤠᤱ ᤁᤴ ᤂᤧᤍᤠ᤹ᤜᤠ᤹ ᤛᤠᤵᤔᤧᤀᤥ ᤂᤢᤏᤧ᤹ ᤀᤥ᤺ᤴᤀᤠᤎᤠᤰᤋᤧᤒᤠ ᤐᤥᤒᤧᤴ (ᤐᤖᤡᤐᤁᤫᤋᤠ) ᤖᤧ ᤂᤢᤏᤧ᤹ᤛᤡᤃᤠᤱ ᤐᤥᤒᤧᤶᤒᤠ (ᤐᤦᤪᤎ) ᤂᤧᤍᤠ᤹ᤛᤠᤶᤒᤠ ᤆᤡᤱᤛᤡᤅᤧᤀᤠᤱ ᤘᤠᤒᤠ ᤋᤛᤡ ᤀᤠᤒᤡ ॥ ᤆᤰᤔᤧᤶᤒᤢ᤹ ᤂᤧᤍᤠ᤹ᤛᤠᤵᤔᤠ ᤕᤠ᤺ᤶᤒᤰᤁᤡᤴ ᤑᤥᤛᤢᤀᤠᤱ ᤋᤣ᤹ᤖᤢᤏᤧᤓᤃᤪ ᤂᤢᤏᤧ᤹ ᤕᤠᤰᤌᤢᤱ ᤂᤧᤍᤠ᤹- ᤛᤠᤵᤛᤰᤗᤧᤴ ᤋᤱᤃᤵᤐᤥ ᤐᤕᤶᤕᤶᤒᤠ ᤆᤓᤠ, ᤐᤡᤔᤠ ᤛᤢᤰᤋᤢᤒᤠ ᤏᤛᤠ᤺ᤴ ᤆᤥ᤺ᤰᤔᤠ ᤀᤠᤛᤢᤰᤗᤥ ॥

(ᤛᤠᤶᤏᤡᤃᤧᤶᤒᤠ ᤐᤤᤖᤠᤃᤡ ᤁᤠᤀᤡᤗᤠᤖᤧ ᤔᤠᤀᤥᤍᤧᤶᤔᤠᤜᤠ᤹ᤗᤠᤶ ᤋᤧᤴᤜᤠᤌᤱ ᤐᤠᤣ᤺ᤰᤂᤧᤖ ᤘᤕᤧᤛᤠ ᤛᤠᤵᤋᤢᤒᤠᤖᤥ ॥)

tfa'I` uf]/vfkqsf] lnDa" efiff k[i7, lj=;+= @)^$ c;f]h ^, cfOtaf/ tyf lj=;+= @)^$ c;f]h !@, zlgaf/