ᤀᤠᤶᤔᤠᤖᤧ ᤁᤢᤒᤠ᤺ᤴ

 ᤀᤡᤔᤠᤜᤠᤱ ᤛᤧᤳᤗᤡᤱ

ᤗᤡᤃᤵᤐᤡᤛᤠᤱᤏᤢ ᤁᤒᤢ᤺ᤃᤧᤴ ᤐᤠᤱᤓᤣ᤹ᤗᤧ ᤁᤒᤢᤒᤠ ᤗᤳᤌᤡᤰ ᤕᤶᤒᤠ ᤕᤠᤰᤌᤢᤱ ᤐᤠᤱᤓᤣ᤹ᤛᤡᤳ ᤏᤧᤛ᤻ᤛᤧ ॥ ᤂᤠᤂᤧᤴ ᤐᤠᤱᤓᤣ᤹ᤗᤢᤶᤔᤥ ᤒᤡᤷᤜᤠᤱ ᤏᤢ ᤛᤧᤶᤓᤢᤱᤔᤠᤛᤡᤖᤧᤀᤠᤱ ᤆᤢᤰᤛᤠ ᤜᤡᤶᤛᤡᤳ ᤆᤥᤃᤧᤛᤡᤀᤠᤱ ᤋᤢᤰᤂᤣ - ᤗᤠᤰᤂᤣᤒᤠ ᤜᤡᤱᤒᤪᤠᤶ ᤜᤡᤱᤄᤧᤛᤡᤖ ᤕᤢᤅᤧᤛᤡ ॥ ᤂᤢᤴᤜᤡ᤹ᤏᤢ ᤗᤠᤈᤣ᤹ ᤛᤡᤱᤒᤢᤱᤅᤠᤱ ᤕᤖᤡᤰ ᤜᤠᤣ᤺ᤵᤋᤧ ॥ ᤁᤖᤛᤠᤱ ᤂᤢᤴᤜᤡ᤹ ᤛᤠᤖᤡᤰ ᤋᤢᤰᤂᤣ ᤁᤧᤈᤠᤣ᤺ᤰᤐᤠ ᤘᤕᤧᤛᤡ ॥ "ᤋᤢᤰᤂᤣ ᤔᤧᤴᤈᤠᤣ᤺ᤰᤁᤣ ᤛᤢᤰᤂᤣ ᤔᤧᤒᤠᤣ᤺ᤱᤏᤧᤴ" ᤁᤧᤖ᤹ᤒᤠ ᤔᤢᤰᤐᤠ᤺ᤴᤏᤡᤴ ᤀᤡ᤺ᤳᤋᤧᤛᤡᤖ ᤔᤧᤴᤍᤱᤍᤱ ᤗᤠᤍᤢᤰᤂᤣ - ᤏᤠᤶᤍᤢᤰᤂᤣ ᤆᤥᤃᤧᤛᤡᤖ ᤐᤣᤛᤡᤀᤡᤸᤗᤧ ᤀᤣᤃᤠᤱᤀᤣᤃᤠᤱ ᤔᤩᤠᤰᤔᤩᤠᤰ ᤕᤠᤱᤛᤠᤀᤠᤱ ᤌᤃᤧᤛᤡᤖ ᤋᤣ᤹ᤖᤧᤛᤡ ॥ ᤋᤠ᤺ᤴᤍᤡ ᤛᤠ᤺ᤀᤣ ᤔᤢᤀᤡᤍᤠᤱᤜᤠ᤹ ᤋᤢᤰᤂᤣ ᤔᤧᤈᤠᤀᤡᤖᤠᤓᤠᤱ ᤆᤢᤰᤛᤠ-ᤆᤢᤰᤛᤠ ᤗᤠᤈᤣ᤹ ᤛᤡᤱᤒᤢᤱᤜᤠ᤹ᤀᤠᤱ ᤀᤡᤅᤧᤛᤡᤖ ᤕᤥ᤹ᤖᤧᤛᤡᤖ ᤋᤣ᤹ᤖᤧᤛᤡ ॥

ᤏᤅᤣ᤺ᤰ - ᤏᤅᤣ᤺ᤰ ᤒᤡᤷᤜᤠᤱ ᤏᤢ ᤛᤧᤶᤓᤢᤱᤔᤠᤛᤡ ᤐᤠᤱᤓᤣ᤹ᤒᤠ ᤏᤶᤓᤠ ᤁᤢᤴᤎᤣᤍᤠᤱᤒᤠ ᤏᤢ ᤗᤠᤈᤣ᤹ᤍᤠᤱᤒᤠ ᤐᤠᤣ᤺ᤰᤂᤧᤛᤡᤖ ᤐᤣᤛᤡ ॥ ᤕᤠᤶᤔᤥ ᤘᤃᤣ᤺ᤰᤔᤠ ᤗᤠ᤺ᤸᤗᤧ ᤁᤧᤒᤥᤒᤠ ᤆᤫᤠ ᤜᤧᤰᤁᤣ ᤜᤠᤱᤛᤠ ᤏᤢ ᤏᤠᤶᤛᤠ ᤔᤧᤵᤔᤠᤏᤠ ᤂᤢᤴᤜᤡ᤹ ᤏᤧᤳᤜᤡ ᤛᤠ᤺-ᤀᤣᤜᤠ᤹ᤀᤠᤱ ᤕᤧᤴᤕᤧᤴ ᤐᤥᤖᤧᤛᤡᤖ ᤐᤣᤛᤡ ॥

ᤌᤡᤰᤛᤧᤴᤍᤡ ᤒᤡᤷᤜᤠᤱ ᤏᤢ ᤛᤧᤶᤓᤢᤱᤔᤠᤖᤧ ᤗᤢᤶᤔᤥ ᤋᤠ᤹ᤈᤧᤱᤎᤡᤰ ᤐᤠᤣ᤺ᤰᤂᤧ ॥ ᤛᤧᤶᤓᤢᤱᤔᤠᤖᤧ ᤁᤢᤜᤡᤶᤛᤠᤒᤧᤴ ᤔᤧᤳᤋᤢ - "ᤜᤡᤶᤒᤠᤀᤣ ,,, ᤀᤠᤏᤡ᤹ ᤐᤠ -ᤔᤠᤖᤧᤃ ᤏᤡ᤺ᤵᤔᤠ ᤛᤠᤵᤔᤠ ᤀᤠᤱᤄᤥᤛᤢᤶᤔᤡᤴ, ᤛᤠᤖᤡᤰ ᤋᤢᤰᤂᤣ ᤀᤠᤈᤩᤧ, ᤁᤖ ᤛᤠ- ᤀᤣᤜᤠ᤹ᤃ ᤀᤠᤰᤁᤣᤖᤡᤰᤛᤠᤱ ᤏᤡ᤺ᤵᤐᤠ ᤐᤠᤱᤔᤠᤛᤡ ᤐᤠᤣ᤺ᤱᤗᤥ ॥" ᤀᤰᤂᤣᤍᤱᤒᤠ ᤛᤧᤶᤓᤢᤱᤔᤠᤖᤧ ᤁᤢᤒᤠᤠ᤺ᤴᤏᤡᤴ ᤂᤧᤶᤔᤠ ᤗᤱᤔᤧ᤺ᤴᤏᤣ ᤁᤢᤜᤡᤶᤛᤠᤒᤧᤴᤏᤠᤱ ᤐᤠᤖᤧ - "ᤂᤧᤵᤛᤧ᤹ ᤜᤡᤶᤔᤠᤀᤣ ,,, ᤀᤠᤴᤜᤡ᤹ ᤛᤠᤜᤠ᤹ᤖᤧ ᤏᤡ᤺ᤳᤜᤢᤛᤠᤱ ᤔᤧᤏᤡ᤺ᤳᤜᤢᤱᤜᤠᤱ ᤀᤠᤵᤑᤠᤸᤗᤧᤀᤠᤱ ᤋᤢᤰᤂᤣ ᤔᤧᤈᤠᤛᤡᤴ, ᤀᤠᤴᤜᤡ᤹ ᤛᤠ- ᤀᤣᤜᤠ᤹ᤃ ᤗᤠᤈᤣ᤹- ᤛᤡᤱᤒᤢᤱᤗᤧ ᤁᤢᤴᤍᤠᤱᤒᤠᤛᤡ, ᤐᤠᤱᤓᤣ᤹ ᤌᤠ᤺ᤱᤓᤣᤖᤧ ᤔᤡᤱᤛᤥ ᤁᤧᤍᤰᤐᤠᤛᤡᤃᤏᤢ, ᤁᤴᤜᤠ᤹ᤖᤧ ᤗᤠᤃᤡ ᤌᤣᤖᤧᤴᤏᤠᤱ ᤋᤢᤰᤂᤣ ᤜᤠᤣ᤺ᤵ ॥ ᤕᤠᤱᤗᤧ ᤕᤠᤱ ᤘᤠ᤹, ᤂᤠᤶᤖᤧ ᤂᤠᤶ ᤘᤠ᤹ ॥" ᤀᤰᤁᤣᤖᤡᤰ ᤜᤡᤶᤒᤠᤀᤡᤴ ᤁᤢᤏᤡᤱᤛᤡᤶᤛᤡᤶ ᤕᤶᤒᤠ-ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧᤒᤧᤴ ᤂᤧᤵᤛᤢᤀᤠᤱ ᤛᤧᤶᤓᤢᤱᤔᤠᤖᤧ ᤕᤠᤶᤔᤥ ᤘᤣ᤹ ᤐᤠ᤺ᤴᤎᤡᤰ ᤕᤥ᤹ᤖᤢ- "ᤜᤧᤰᤁᤣᤃ ᤀᤠᤰᤂᤧᤴ ᤗᤠᤍᤢᤰᤂᤣ-ᤏᤠᤶᤍᤢᤰᤂᤣ ᤀᤠᤈᤥᤃᤧᤛᤡᤖᤛᤠᤱ ᤗᤠᤈᤣ᤹- ᤛᤡᤱᤒᤢᤱᤃ ᤛᤡᤍ᤺ᤳᤋᤣ ᤀᤠᤀᤡᤅᤧᤛᤢ ॥ ᤕᤠᤱᤛᤠ ᤁᤢᤴᤎᤣᤀᤠᤱ ᤀᤠᤎᤃᤧᤛᤢ ᤁᤖ ᤗᤠᤈᤣ᤹-ᤛᤡᤱᤒᤢᤱᤏᤢ ᤕᤠᤱᤛᤠ ᤁᤢᤴᤎᤣᤖᤧᤖᤰ ᤌᤣᤀᤠᤱ ᤔᤧᤈᤥᤃᤢᤴ ॥ ᤛᤠ-ᤀᤣᤜᤠ᤹ ᤏᤡᤛᤠᤶᤔᤠᤱ ᤐᤡ᤹ᤔᤠᤛᤡᤒᤠᤣ᤺ᤱ ॥ ᤁᤶᤓᤧᤸᤗᤧᤒᤠ ᤕᤧᤶᤔᤥ ᤔᤧᤴᤏᤡ᤺ᤵᤔᤠᤏᤠ ᤔᤧᤴᤜᤠᤔᤠᤏᤠ ᤔᤏᤠᤖᤧᤃ ᤌᤣᤎᤣᤀᤠᤱ ᤆᤠᤣ᤺ᤰᤔᤠ ᤔᤧᤴᤜᤢᤰᤋᤢᤴ ॥ ᤀᤠᤳᤋᤡ ᤔᤧᤒᤣ᤺ᤰᤛᤠᤱ ᤀᤠᤳᤋᤡ ᤔᤧᤘᤠ᤹ᤛᤠᤱ ᤋᤧᤴ ᤂᤥᤔᤠ ᤔᤧᤳᤜᤢᤰᤋᤢᤴ, ᤋᤢᤰᤂᤣᤖᤰ ᤔᤧᤈᤠ ॥ ᤕᤠᤶᤔᤥ ᤁᤧᤏᤡ᤺ᤵᤐᤠᤖᤧ ᤗᤠᤃᤡ ᤂᤠᤶᤒᤣ᤺ᤰᤔᤧᤴᤏᤠᤱ ᤐᤕᤶᤕᤶᤒᤠ ᤐᤠᤣ᤺ᤱ, ᤔᤧᤴᤏᤡ᤺ᤵᤔᤠᤏᤠᤖᤧ ᤗᤠᤃᤡ ᤆᤡᤓᤡᤵᤑᤡᤵᤐᤠ ᤐᤠᤣ᤺ᤱ ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤜᤠᤱᤛᤠ ᤏᤢ ᤏᤠᤶᤛᤠᤀᤠᤱ ᤏᤡᤛᤠᤶᤜᤡᤶ ᤐᤠᤱᤔᤠᤛᤡᤀᤣ ᤐᤠᤣ᤺ᤱ, ᤛᤡᤍ᤺ᤳ ᤏᤡ᤺ᤵᤔᤠ ᤐᤠᤱᤔᤠᤛᤡᤀᤠᤱ ᤏᤡᤛᤠᤶᤔᤡᤒᤠ ᤆᤠᤣ᤺ᤰᤔᤠᤛᤡ ᤐᤠᤣ᤺ᤱ ॥" ᤀᤰᤂᤣ ᤗ᤹ᤖᤡᤰ ᤛᤧᤶᤓᤢᤱᤔᤠᤖᤧ ᤁᤢᤜᤡᤶᤛᤠᤒᤧᤴ ᤔᤧᤳᤋᤢ ॥ ᤕᤠᤶᤔᤥ ᤔᤠᤥᤂᤡᤶᤔᤥ ᤁᤢᤜᤡᤶᤛᤠᤒᤧᤴ ᤐᤠᤖᤧ- "ᤔᤧᤶᤒᤧ ,,, X ᤛᤠ-ᤀᤣ ᤋᤢᤰᤂᤣ ᤔᤧᤴᤈᤠᤏᤧᤸᤗᤓᤠᤱᤅᤣ ᤁᤢᤖᤧᤴ ᤌᤡᤰᤛᤡᤳ ᤔᤧᤴᤏᤠ᤹ᤛᤡᤱᤅᤣ ᤆᤠᤣ᤺ᤰᤔᤠ ᤔᤧᤴᤈᤠᤣ᤺ᤰᤔᤠ ᤋᤢᤰᤂᤣ ᤀᤠᤈᤥᤃᤧᤛᤡᤀᤠᤱ ᤁᤶᤓᤠ ᤕᤸᤗᤡᤰ ᤗᤠᤈᤣ᤹- ᤛᤡᤱᤒᤢᤱ ᤀᤠᤀᤡᤱᤅᤧᤛᤡ, ᤀᤠᤖᤛᤠᤱ ᤏᤧᤳᤜᤡᤛᤡᤳ ᤁᤧᤘᤠ᤹ᤒᤠ ᤛᤠᤜᤠ᤹ᤀᤠᤱ ᤏᤡᤛᤠᤶᤜᤡᤶ ᤀᤠᤒᤠᤱᤛᤢᤛᤡᤃᤪ ᤁᤶᤓᤠ ᤕᤸᤗᤡᤰ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤜᤠ᤺ᤳᤗᤧ ᤛᤧ᤺ᤵᤋᤢ ᤋᤠᤱᤄᤢᤒᤣ᥅ ᤐᤠ-ᤔᤠᤖᤧᤖᤰ ᤀᤠᤰᤂᤧᤴ ᤕᤧᤴ ᤆᤠᤣ᤺ᤰᤔᤠ ᤐᤠ᤺ᤵᤔᤠ ᤛᤢᤰᤋᤧᤳᤋᤠᤱᤒᤣ ᥅ ᤀᤠᤸᤗᤃ ᤛᤠᤀᤣᤖᤧᤀᤠᤱ ᤔᤧᤈᤥᤃᤢ ᤔᤧᤒᤠ᤺ᤳᤋᤢᤖ ᤐᤠᤣ᤺ᤱᤃᤏᤢ ॥" "ᤜᤧᤰᤁᤣᤃᤖ ᤀᤠᤸᤗ ᤜᤠᤱᤛᤠ ᤏᤢ ᤏᤠᤶᤛᤠᤀᤠᤱ ᤏᤡᤛᤠᤶᤜᤡᤶ ᤔᤧᤒᤡᤳᤜᤡᤴᤏᤠᤱ ᤜᤡᤶᤔᤥᤀᤣ ᤕᤠ᤺ᤴᤎᤠ᤹ - ᤂᤧᤍᤠ᤹ᤖᤰ ᤋᤡ᤺ᤰᤛᤢᤖ ᤘᤠ᤹ᤛᤡᤒᤠ ᤒᤡ ᥅" ᤔᤠᤀᤡᤸᤗᤧ ᤕᤠᤶᤔᤥ ᤀᤰᤁᤣᤖᤡᤰ ᤘᤣ᤹ ᤛᤣ᤺ᤴᤗᤠᤵᤌᤡᤰ ᤕᤥ᤹ᤖᤢ ॥ ᤐᤠᤀᤡᤴ ᤏᤶᤓᤠ ᤔᤢᤖᤣ ᤀᤡ᤺ᤳᤜᤡᤱᤅᤠᤱ ᤐᤠᤖᤧ- "ᤀᤠᤸᤗ ᤛᤠᤀᤣᤜᤠ᤹ ᤏᤡᤛᤠᤶᤜᤡᤶ ᤐᤠᤱᤔᤠᤛᤡᤀᤣ ᤐᤠᤣ᤺ᤱᤃᤪ ᤏᤧᤳᤜᤡ ᤛᤠᤀᤣᤵᤔᤥ ᤑᤠᤣ᤺ᤰᤘᤠᤒᤧᤸᤗᤳ ᤏᤡᤛᤠᤶᤜᤡᤶ ᤐᤠᤱᤔᤠᤒᤠᤣ᤺ᤱ, ᤋᤢᤶᤒᤧᤴ ᤜᤡᤶᤔᤥᤀᤣ ᤁᤵᤔᤠᤒᤠᤣ᤺ᤱ॥ ᤌᤣᤀᤠᤱᤓᤧᤸᤗᤧ ᤗᤳᤌᤡᤰᤗᤧ ᤏᤡᤖᤢ ᤛᤠᤵᤋᤢᤀᤠᤱ ᤀᤠᤰᤂᤥ ᤋᤠ᤺ᤴᤍᤡᤰ ᤀᤠᤳᤋᤡ ᤐᤣ᤺ᤰᤛᤠᤱ ᤘᤠ᤹ᤛᤠᤱ ᤗᤳᤌᤡᤰᤗᤧᤃ ᤐᤠ-ᤔᤠ, ᤜᤡᤶᤎᤠ᤺ᤱ ᤏᤢ ᤗᤠᤈᤣ᤹ ᤛᤡᤱᤒᤢᤱᤅᤠᤱᤛᤠ ᤀᤥᤔᤧᤵᤔᤠ ᤐᤠᤣ᤺ᤱᤃᤏᤢ ॥" ᤁᤢᤜᤡᤶᤛᤠᤒᤧᤸᤗᤧ ᤀᤰᤂᤣᤍᤱᤒᤠ ᤁᤢᤒᤠ᤺ᤴᤏᤡᤴᤏᤢ ᤁᤢᤏᤡᤱᤘᤠ᤹ ᤔᤧᤍᤩᤧᤏᤧᤴᤏᤠᤱ ᤛᤧᤶᤓᤢᤱᤔᤠᤖᤧ ᤕᤠᤶᤔᤥ ᤘᤣ᤹ ᤐᤠ᤺ᤴᤎᤡᤰ ᤋᤠᤣ᤺ᤴᤍᤢ- "ᤔᤧ᤺ᤶᤒᤧ ,,, X ᤗᤳᤌᤡᤰ ᤛᤠᤀᤡᤴ ᤏᤡ᤺ᤵᤐᤠᤱᤔᤠᤀᤠᤱ ᤘᤣ᤹ ᤛᤠᤀᤡᤴ ᤜᤡᤶᤔᤥᤀᤣ ᤁᤵᤔᤧᤸᤗᤧ ᤏᤥᤒᤠ ᤔᤧᤒᤠᤣ᤺ᤱᤏᤧᤴ ॥ ᤀᤠᤰᤂᤥ ᤋᤠ᤺ᤴᤍᤡᤰ ᤛᤠ-ᤀᤣᤖᤧ ᤏᤡᤱᤘᤠ᤹ ᤋᤢᤰᤔᤠ ᤐᤠᤣ᤺ᤱᤃᤏᤢ,,, ॥" ᤁᤖ ᤁᤴ ᤛᤧᤶᤓᤢᤱᤔᤠᤖᤧ ᤁᤢᤒᤠ᤺ᤴᤏᤡᤴ ᤁᤢᤜᤡᤶᤛᤠᤒᤧᤸᤗᤧ ᤋᤧᤴᤍᤡᤱ ᤔᤧᤒᤡᤖᤢᤴ ॥ "ᤀᤠᤱᤃᤠ᤹ ᤌᤣ ᤐᤠ᤺ᤳᤋᤢᤱ ᤏᤥᤒᤤ ᤐᤠ᤺ᤳᤋᤢᤱ" ᤗ᤹ᤖᤡᤰ ᤁᤢᤜᤡᤶᤛᤠᤒᤧᤴ ᤏᤧᤳᤏᤠ ᤔᤧᤳᤜᤡᤱ ॥ ᤛᤧᤶᤓᤢᤱᤔᤠᤀᤠᤱ ᤕᤠᤶᤔᤥᤃ ᤌᤣ ᤔᤧᤶᤒᤠ᤺ᤳᤋᤣ ᤀᤡᤔᤠ᤹ ᤗᤧᤳᤋᤧ ॥

ᤒᤡᤷᤜᤠᤱ ᤁᤠᤵᤐᤥᤒᤧᤸᤗᤧ ᤐᤠ᤺ᤳᤋᤢ ᤀᤡᤛᤡ᤺ᤰ ᤌᤡᤰᤕᤧᤴ ᤏᤡᤕᤧᤴ ᤀᤣᤃᤠᤱᤏᤢᤀᤣ ᤁᤢᤛᤠ ᤑᤠᤣ᤺ᤰᤘᤠᤒᤧᤴ ᤏᤡᤛᤠᤶᤜᤡᤶ ᤐᤠᤱᤔᤠ ᤜᤣ᤺ᤰᤋᤢ ॥ ᤑᤠᤣ᤺ᤰᤘᤠᤒᤠ ᤏᤠᤶᤛᤠᤀᤡᤴ ᤐᤛ᤺ᤳᤛ᤺ᤳᤋᤧᤖ ᤏᤡᤛᤠᤶᤜᤡᤶ ᤐᤣ᤺ᤰᤔᤠ ᤜᤣ᤺ᤰᤋᤧ ॥ ᤜᤡᤶᤔᤥ ᤋᤢᤶᤒᤠᤛᤠ ᤜᤠᤱᤛᤠᤖᤰ ᤐᤠ᤺-ᤔᤠᤏᤢ ᤛᤥᤛᤥᤖᤡᤰ ᤕᤠ᤺ᤴᤎᤠ-ᤂᤧᤍᤠ᤹ ᤆᤠᤣ᤺ᤰᤔᤠ ᤜᤣ᤺ᤰᤋᤧ ॥ ᤀᤰᤂᤣᤖᤡᤰ ᤁᤢᤏᤢᤛᤠ᤹ᤖᤧ ᤏᤥᤒᤠᤏᤥᤒᤠ ᤋᤣ᤺ᤳ ᤗᤠᤱᤛᤢ᤺ᤵ ᤆᤠᤰᤂᤢᤀᤠᤱ ᤏᤡᤛᤠᤶᤜᤡᤶ ᤐᤣᤒᤧᤴ ᤏᤡᤛᤢᤀᤠᤱ ᤜᤠᤱᤛᤠᤖᤧᤀᤠᤱ ᤏᤡᤛᤠᤶᤜᤡᤶ ᤐᤣ᤺ᤰᤔᤠ ᤁᤢᤛᤡᤖᤠ᤹ ᤌᤠᤱᤅᤧᤒᤠ ᤐᤠ᤺ᤴᤏᤡᤴ ᤁᤢᤶᤒᤠ-ᤁᤢᤶᤔᤠᤛᤡ ᤆᤧᤰᤋᤢᤛᤡ ᤁᤖ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤀᤠᤵᤑᤠᤸᤗᤧᤀᤠᤱ ᤋᤧᤴᤍᤡᤱ ᤔᤧᤒᤠᤣ᤺ᤰᤂᤧᤴ ॥

ᤕᤧᤶᤜᤠ᤹ᤖᤧ ᤌᤧᤃᤢ ᤔᤧᤖᤧᤃᤢ ᤔᤧᤍᤣ᤹ᤖᤢ, ᤆᤧᤖᤧᤰᤂᤠ ᤜᤡᤔᤠᤍᤱᤒᤠ ᤋᤱᤒᤣ ᤗᤠᤒᤣᤜᤠ᤹ ᤔᤧᤜᤡᤖᤧᤖ ᤔᤧᤒᤣ, ᤔᤧᤜᤡᤖᤧᤖ ᤔᤧᤍᤩᤧ ॥ ᤛᤡᤍ᤺ᤳ ᤐᤖᤡᤰᤐᤠ ᤕᤧᤶᤜᤠ᤹ᤖᤧ ᤁᤢᤖᤧᤰᤛᤡᤱᤏᤢ ᤋᤱᤍᤱ ᤏᤠᤶᤛᤠᤖᤧᤀᤠᤱ ᤐᤠᤱᤓᤣ᤹ᤒᤠ ᤕᤠᤰᤑᤠ ᤌᤡᤒᤠᤣ᤺ᤱ ᤏᤡᤖᤢᤛᤢᤖᤢ ॥ ᤂᤧᤴ ᤀᤣᤃᤠᤱ ᤕᤠᤶᤔᤥ ᤁᤢᤶᤒᤠᤖᤧ ᤏᤠᤶᤛᤠ ᤐᤠᤱᤕᤰᤁᤥ ᤏᤡ᤺ᤳᤜᤧ ᤐᤠᤱᤄᤢᤍᤣᤛᤢ ॥ ᤁᤢᤶᤓᤢ᤹ ᤜᤠᤱᤛᤠᤀᤠᤱ ᤕᤶᤒᤠ ᤌᤠᤱᤒᤧᤴᤛᤠ ᤐᤠᤣ᤺ᤰᤂᤧ ॥ ᤁᤧᤖᤧᤰ ᤐᤠ᤺ᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤐᤠᤣ᤺ᤰᤂᤧ ॥

ᤜᤠᤱᤛᤠᤖᤧ ᤋᤃᤡᤋᤃᤡᤃ ᤐᤠ-ᤔᤠᤖᤧ ᤔᤧᤔᤧᤳᤋᤢᤒᤠ ᤁᤧᤖᤧᤰ ᤐᤠ᤺ᤴ ᤂᤧᤵᤛᤢᤖᤀᤣ ᤘᤕᤧ, ᤌᤣ ᤕᤠ᤺ᤶᤒᤰᤛᤠᤱ ᤆᤥᤃᤢᤖᤀᤣ ᤘᤕᤧ ॥ ᤁᤖ ᤁᤢᤏᤢᤛᤠ᤹ ᤏᤠᤶᤛᤠᤀᤡᤴ ᤐᤠᤱᤕᤰᤁᤥ ᤏᤡ᤺ᤳᤜᤧ ᤐᤣᤒᤧᤴ ᤏᤡᤛᤢᤏᤢ ᤌᤣᤀᤠᤱᤅᤡ ᤌᤣᤀᤠᤱ ᤂᤢᤏᤧ᤹ᤀᤠᤱ ᤜᤡᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤂᤠ᤹ ᤗᤧᤖᤢᤀᤠᤱ ᤏᤠ᤺-ᤏᤠ᤺ ᤌᤥᤎᤥᤖᤰ ᤋᤠᤰᤁᤴᤈᤠᤔᤠ ᤜᤣ᤺ᤰᤋᤧ ॥ ᤀᤰᤂᤣᤖᤡᤰ ᤆᤄᤵᤐᤣ ᤜᤠᤱᤛᤠᤖᤧ ᤁᤢᤛᤡᤃᤠᤱ ᤁᤢᤖᤧᤰᤛᤡᤱ ᤋᤩᤧᤒᤧᤴ ᤏᤡᤛᤢᤀᤠᤱ ᤔᤠᤀᤡᤴ ᤐᤕᤶᤕᤶᤒᤠ ᤀᤡ᤺ᤳᤜᤡᤱᤅᤥ ᤌᤩᤧ ॥ "ᤀᤠᤸᤗ ᤑᤠᤣ᤺ᤰᤘᤠᤒᤠ ᤏᤠᤶᤛᤠᤀᤠᤱ ᤏᤡ᤺ᤳᤜᤧ ᤛᤠᤵᤛᤧᤓᤠᤱ ᤀᤠᤰᤂᤧᤴ ᤋᤱᤒᤣ᤹ᤖᤧ ᤗᤠᤃᤡ ᤐᤠᤱᤕᤰ ᤗᤧᤵᤔᤠᤱ ᤗᤠᤶᤔᤧᤳᤜᤡᤱ ॥ ᤜᤡᤶᤔᤥ ᤐᤠᤑᤰᤋᤠᤱ - ᤔᤠᤑᤰᤋᤠᤱ ᤁᤧᤍᤰᤐᤠ ᤜᤠᤱᤛᤠᤀᤡᤴᤏᤠᤱ ᤌᤣ ᤗ᤹ᤖᤧᤒᤣᤀᤠᤱ ᤘᤠ᤹ᤒᤠ ᤀᤡ X ᤀᤠᤕᤧᤴᤍᤠ᤺ᤴᤃ ᤌᤣ ᤕᤠ᤺ᤶᤒᤰᤁᤠᤱ ᤔᤧᤴᤈᤠᤣ᤺ᤰᤁᤣ ᤐᤠᤱᤓᤣ᤹ᤖᤰ ᤋᤠᤰᤁᤴᤈᤠᤏᤢ ᤘᤠ᤹ ॥" ᤔᤠᤀᤡᤸᤗᤧ ᤁᤢᤛᤠᤜᤠ᤹ ᤀᤡ᤺ᤳᤋᤢᤛᤡᤀᤠᤱ ᤂᤠᤀᤰᤂᤣᤖᤡᤰᤁᤣ ᤁᤢᤛᤧᤴ - ᤁᤢᤖᤧᤴ ᤔᤡᤰᤋᤡᤱ ᤆᤠᤣ᤺ᤰᤔᤠ ᤜᤣ᤺ᤰᤋᤧ ॥

ᤌᤡᤰᤕᤧᤴ ᤕᤠᤶᤔᤥ ᤐᤠ-ᤔᤠ ᤏᤢ ᤜᤠᤱᤛᤠᤖᤧ ᤗᤢᤶᤔᤥ ᤋᤠ᤹ᤈᤧᤱᤎᤡᤰ ᤐᤠᤣ᤺ᤰᤂᤧ ॥ ᤁᤢᤶᤒᤠᤖᤧ ᤜᤠᤱᤛᤠ ᤔᤧᤳᤋᤢ - "ᤜᤠᤱᤛᤠᤀᤣ ᤂᤧᤏᤧ᤹ᤃ ᤛᤡᤍ᤺ᤳ ᤕᤧᤴ ᤋᤃᤡᤏᤢᤀᤣ ᤜᤡᤶᤕᤠ᤺ᤶᤒᤰ ᤁᤧᤖᤧᤰ ᤁᤧᤗᤧᤖᤢᤀᤠᤱ ᤐᤠᤱᤓᤣ᤹ᤀᤥᤖᤰ ᤋᤠᤰᤁᤴᤈᤠᤏᤢ ᤁᤧᤘᤠ᤹ ॥ ᤀᤡᤱᤃᤠ᤹ᤃ ᤀᤠᤰᤂᤧᤴ ᤋᤢᤰᤂᤣ ᤆᤥᤃᤢᤱᤅᤠᤱ ᤂᤧᤴᤜᤡ᤹ ᤗᤠᤃᤡᤀᤣᤓᤠᤱ ᤁᤶᤓᤠ ᤕᤸᤗᤡᤰ ᤗᤠᤈᤣ᤹- ᤛᤡᤱᤒᤢᤱ ᤀᤡᤱᤅᤢᤅᤠᤱ ᤏᤧ᤺ ॥ ᤀᤠᤸᤗ ᤁᤧᤏᤢᤛᤠ᤹ᤃ ᤏᤡ᤺ᤳᤜᤧ ᤛᤠᤵᤛᤧᤓᤠᤱ ᤐᤠᤱᤕᤰ ᤐᤠᤱᤄᤢᤱᤍᤣᤛᤢᤱ ॥ ᤁᤧᤏᤢᤛᤠ᤹ ᤔᤧᤴᤏᤠᤣ᤺ᤱᤍᤠ᤺ᤰ ᤐᤠ-ᤔᤠ ᤜᤡᤶᤎᤠᤱᤏᤢ ᤗᤠᤈᤣ᤹- ᤛᤡᤱᤒᤢᤱ ᤁᤧᤖᤧᤰ ᤂᤧᤏᤧ᤹ᤀᤣ ᤁᤧᤍᤰᤋᤢᤖ ᤐᤠᤣ᤺ᤱ, ᤀᤥᤃᤧᤔᤧᤳᤋᤢᤖ ᤐᤠᤣ᤺ᤱᤗᤥ ॥ ᤀᤰᤂᤣᤖᤡᤰ ᤜᤡᤶᤎᤠ᤺ᤱ ᤗᤧᤵᤔᤠᤀᤠᤱ ᤋᤠᤰᤁᤴᤈᤠᤏᤢᤖᤰ ᤘᤠ᤹ᤔᤠ ᤏᤥᤒᤠ ᤔᤧᤒᤠᤣ᤺ᤱᤏᤧᤴᤗᤥ ॥" ᤀᤰᤂᤣᤍᤱᤒᤠ ᤁᤢᤶᤒᤠᤖᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠᤗᤧᤵ ᤜᤠᤱᤛᤠᤖᤧᤀᤠᤱ ᤁᤢᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠ᤺ᤴᤎᤡᤰ ᤐᤠ᤺ᤳᤋᤢ- "ᤀᤠᤒᤥ-ᤀᤠᤔᤥᤛᤡᤖᤧ ᤀᤠᤰᤂᤧᤴ ᤋᤢᤰᤂᤣ ᤁᤧᤈᤥᤃᤧᤛᤡᤀᤠᤱ ᤁᤶᤓᤠ ᤕᤸᤗᤡᤰ ᤗᤠᤈᤣ᤹-ᤛᤡᤱᤒᤢᤱ ᤀᤡᤱᤔᤠ ᤐᤡ᤹ᤔᤠ ᤁᤧᤛᤢᤰᤋᤧᤛᤢ ᤁᤖ ᤀᤠᤱᤃᤠ᤹ᤃ ᤀᤠᤏᤢᤛᤠ᤹ ᤜᤧᤰᤁᤣ ᤏᤡᤛᤠᤶ ᤐᤡ᤹ᤔᤠ ᤁᤧᤴᤜᤢᤰᤋᤧᤴᤜᤡᤴ ॥ ᤀᤠᤱᤃᤠ᤹ᤀᤠᤱ ᤀᤠᤏᤢᤛᤠ᤹ ᤜᤧᤰᤁᤣᤀᤣ ᤛᤡᤍ᤺ᤳ ᤏᤡ᤺ᤵᤔᤠᤀᤠᤱ ᤏᤡᤛᤠᤶᤔᤡᤒᤠ ᤏᤢ ᤏᤧᤜᤡᤍᤠᤱᤒᤠ ᤐᤠᤣ᤺ᤱᤔᤠ ᤀᤠᤏᤡᤱᤘᤠ᤹ ᤘᤕᤧ, ᤁᤖ ᤀᤠᤒᤥ-ᤀᤠᤔᤥᤖᤧᤀᤣ ᤏᤡ᤺ᤵᤔᤠ-ᤛᤠᤵᤔᤠ ᤀᤠᤜᤢᤰᤁᤡᤴ ᤁᤧᤄᤰᤋᤧᤛᤢᤀᤠᤱ ᤕᤠ᤺ᤴ ᤌᤠᤣ᤺ᤱᤔᤠ, ᤕᤠ᤺ᤴ ᤀ᤺ᤰᤔᤠ ᤜᤢᤰᤗᤳ ᤀᤠᤃᤧᤒᤡᤖᤧᤛᤡ ॥ ᤗᤠᤈᤣ᤹-ᤛᤡᤱᤒᤢᤱᤃ ᤌᤢᤢᤰᤘᤠ-ᤔᤠᤱᤘᤠᤖᤧᤀᤠᤱ ᤋᤣ᤹ᤔᤠ ᤛᤢᤰᤋᤢ᤹ ᤁᤖ ᤏᤡᤛᤠᤶᤔᤡᤴᤃ ᤌᤣᤎᤣᤖᤧᤀᤠᤱ ᤋᤣ᤹ᤔᤠ ᤔᤧᤛᤢᤰᤋᤢᤴ ॥ ᤁᤴ ᤐᤠ᤺ᤴᤏᤡᤴ ᤀᤠᤒᤥ-ᤀᤠᤔᤥᤖᤧ ᤀᤠᤵᤑᤠᤸᤗᤧᤀᤠᤱ ᤁᤧᤴᤀᤡ᤺ᤳᤋᤧᤴᤜᤡᤴ ॥" 

ᤀᤰᤂᤣ ᤗ᤹ᤖᤡᤰ ᤜᤠᤱᤛᤠ ᤐᤠ-ᤔᤠᤖᤧ ᤋᤃᤡ ᤔᤧᤴᤍᤱᤍᤱ ᤏᤡᤱᤘᤠ᤹ ᤋᤢᤰᤛᤡᤱᤗ ᤜᤠᤒᤧ ॥ "ᤋᤠ᤺ᤴᤍᤡ ᤛᤠ-ᤀᤣᤖᤧ ᤏᤡᤱᤘᤠ᤹ ᤋᤢᤰᤔᤠ ᤐᤠᤣ᤺ᤱᤗᤥᤓᤠᤱ ᤀᤠᤱᤃᤠ᤹ᤃ ᤋᤃᤡᤀᤣ ᤐᤠ᤺ᤳᤋᤢᤱᤅᤠᤱ ᤘᤕᤧ" ᤗ᤹ᤖᤡᤰ ᤔᤠᤀᤡᤴᤏᤠᤱ ᤛᤡᤒᤡ᤹ ᤔᤡᤰᤘᤠ ᤛᤢ᤺ᤴᤜᤡᤱ ॥ "ᤌᤣ ᤔᤧᤵᤔᤠ ᤋᤃᤡᤃ ᤀᤠᤱᤃᤠ᤹ᤀᤠᤱ ᤀᤠᤏᤡᤱᤘᤠ᤹ ᤔᤧᤍᤢᤶᤛᤧᤴ, ᤏᤥᤒᤤ ᤐᤠᤣ᤺ᤱ ᤁᤧᤖ᤹ᤒᤠ ᤀᤡ᤺ᤳᤋᤢᤱᤅᤠᤱ ᤘᤕᤠᤱ ᤁᤖ ᤐᤠ-ᤔᤠᤖᤧ ᤏᤡᤱᤘᤠ᤹ᤏᤢ ᤛᤠ-ᤀᤣᤖᤧ ᤏᤡᤱᤘᤠ᤹ ᤔᤧᤍᤱᤏᤧᤴᤖᤜ ॥ ᤀᤠᤸᤗ ᤌᤣ ᤆᤠᤣ᤺ᤰᤔᤠᤒᤣ,,, X ᤂᤠ ᤀᤰᤁᤣᤀᤣ ᤐᤠᤣ᤺ᤰᤂᤧ" ᤗ᤹ᤖᤡᤰ ᤐᤠ᤺ᤀᤡᤴᤏᤠᤱ ᤁᤢᤏᤡᤱᤛᤠᤱ ᤛᤠᤰᤁᤪᤡᤰ ᤐᤢᤃᤧᤀᤠᤱ ᤕᤢᤅᤧ ॥

ᤀᤰᤂᤣᤖᤡᤰ ᤐᤠ-ᤔᤠᤏᤢ ᤋᤠ᤹ᤈᤧᤱ ᤐᤠᤣ᤺ᤰᤂᤧᤒᤠ ᤛᤢᤶᤕᤧᤴ ᤗᤡᤕᤧᤴ ᤀᤣᤃᤠᤱᤏᤢᤃ ᤜᤧᤴᤏᤠ ᤜᤠᤱᤛᤠᤖᤧ ᤜᤡᤶᤔᤥᤒᤠ ᤆᤠᤔᤠ-ᤌᤢᤱᤔᤠ ᤁᤧᤖᤧᤰ ᤗᤧᤖᤢᤀᤠᤱ ᤐᤠᤱᤓᤣ᤹ ᤛᤡᤃᤠᤱᤒᤠ ᤌᤣᤎᤣ ᤁᤧᤜᤠᤱᤒᤠ ᤁᤧᤛᤢ᤺ᤵᤐᤠᤜᤠ᤹ᤖᤰ ᤆᤠᤔᤠ-ᤌᤢᤱᤔᤠ ᤜᤣ᤺ᤰᤋᤢ ॥

ᤏᤅᤣ᤺ᤰ- ᤏᤅᤣ᤺ᤰ ᤜᤠᤱᤛᤠᤃ ᤐᤠᤱᤓᤣ᤹ ᤁᤧᤈᤡ᤺ᤴᤒᤠ ᤌᤡ᤺ᤔᤛᤠᤱᤏᤡ ᤐᤠᤣ᤺ᤰᤂᤧᤒᤣ ॥ ᤁᤴ ᤌᤡ᤺ᤔᤛᤠᤱ ᤜᤠᤱᤛᤠᤖᤧ ᤐᤠᤱᤓᤣ᤹ ᤆᤡ᤺ᤴᤍᤢ, ᤀᤠᤏᤡ᤹ᤀᤠᤱ ᤀᤠᤈᤡ᤺ᤴᤗᤥ ᤗ᤹ᤖᤡᤰ ᤁᤧᤖᤧᤰ ᤐᤠᤱᤓᤣ᤹ᤛᤠᤜᤠ᤹ᤖᤧ ᤔᤧᤈᤡ᤺ᤳᤋᤢᤖ ᤔᤧᤍᤣ᤹ᤖᤢ ᤁᤖᤛᤠᤱ ᤜᤠᤱᤛᤠᤖᤧ ᤌᤡ᤺ᤌᤢᤱᤔᤠᤀᤠᤱ ᤔᤛᤡᤱᤔᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤖᤧᤖᤢᤴ ॥ ᤂᤢᤏᤧ᤹ ᤁᤢᤛᤧᤴ-ᤁᤢᤖᤧᤴ ᤔᤛᤡᤴᤏᤠᤱ ᤜᤠ᤺ᤳᤏᤢᤛᤠᤱ ᤆᤢᤱᤄᤧᤖ ᤌᤰᤋᤧᤖᤖᤰ ᤘᤕᤧ ॥ 

ᤜᤧᤰᤁᤣᤖᤡᤰ ᤘᤕᤧᤖ-ᤘᤕᤧᤖ ᤔᤧᤴᤏᤡ ᤔᤧᤴᤎᤠ ᤜᤠᤱᤛᤠᤖᤧ ᤁᤢᤎᤰᤁᤥ ᤐᤖᤡᤰ- ᤐᤖᤡᤰᤐᤠ ᤋᤢᤰᤔᤠ- ᤛᤠᤰᤔᤠᤜᤠ᤹ ᤗᤠᤛᤧᤖ ᤐᤣ ॥ ᤐᤠ-ᤔᤠᤜᤠ᤹ᤖᤧ ᤛᤢᤰᤛᤢᤰ ᤜᤠᤱᤄ-ᤔᤠᤱᤄ ᤆᤥᤃᤧᤛᤢ ॥ ᤔᤠ᤺ᤱᤄᤠ᤹ ᤔᤠ᤺ᤱᤄᤠ᤹ᤒᤠ ᤛᤥᤔᤥᤀᤡᤜᤡᤶᤔᤥ ᤋᤣ᤹ᤖᤧᤛᤡᤀᤠᤱ ᤛᤡᤍᤠ᤹-ᤐᤠᤱᤍᤠ᤹ ᤔᤧᤳᤋᤧᤛᤢ ॥ ᤜᤠᤱᤛᤠ ᤘᤣ᤺ᤶᤜᤧ ᤜᤡᤱᤛᤧ ᤐᤠ-ᤔᤠᤜᤠ᤹ᤖᤧ ᤀᤠᤰᤂᤧᤴ- ᤀᤠᤰᤂᤧᤴ ᤋᤶᤛᤡᤱ ᤆᤥᤃᤧᤛᤡ, ᤁᤖᤛᤠᤱ ᤁᤢᤏᤢᤶᤔᤥ ᤗᤳᤌᤡᤰ ᤛᤥᤔᤥᤀᤡᤜᤡᤶᤔᤥ ᤜᤠᤱᤛᤠᤖᤧ ᤁᤢᤛᤰᤔᤠ ᤐᤣ ॥

ᤜᤠᤱᤛᤠᤃ ᤁᤢᤍᤰᤕᤠ ᤑᤧᤶᤔᤠ ᤀᤡᤛᤣ᤺ᤱ ᤔᤠ᤺ᤛᤡᤱᤅᤠᤱ ᤐᤣ ᤁᤖ ᤑᤠᤣ᤺ᤰᤘᤠᤒᤠ ᤏᤠᤶᤛᤠᤖᤧᤀᤠᤱ  ᤜᤡᤶ ᤗᤧᤖᤢᤀᤠᤱ ᤐᤠᤱᤕᤰ ᤏᤡ᤺ᤳᤜᤧ ᤐᤣᤒᤧᤴ ᤋᤱᤒᤣ ᤕᤧᤳᤜᤡ- ᤑᤠᤱᤛᤡ ᤏᤢᤒᤧᤛᤠᤱ ᤌᤡᤰᤗᤧᤱᤛᤡᤳᤋᤠᤱ ᤜᤡᤶᤔᤥ ᤔᤧᤏᤠᤣ᤺ᤰᤂᤧᤴ ᤔᤧᤍᤩᤧᤏᤧᤴ ॥ ᤐᤠ-ᤔᤠᤜᤠ᤹ᤖᤧ ᤁᤢᤛᤧᤴ ᤁᤢᤖᤧᤴ ᤏᤠᤶᤛᤠᤖᤧ ᤁᤢᤒᤠ᤺ᤴᤗᤳ ᤐᤠ᤺ᤳᤋᤧᤛᤡᤖ ᤕᤢᤅᤧᤛᤡᤸᤗᤧ ᤌᤡᤰᤕᤧᤴ ᤆᤄᤵ ᤂᤢᤴᤜᤡ᤹ ᤜᤢᤰᤁᤥ ᤛᤰᤀᤡᤱᤄᤱᤎᤡᤰ ᤆᤢᤰᤋᤧ ॥ ᤛᤰᤀᤡᤱᤄᤱᤅᤡᤴ ᤏᤠᤶᤛᤠᤖᤧ ᤜᤠᤱᤅᤢᤒᤠᤖᤧᤜ ॥ ᤂᤢᤏᤧ᤹ ᤛᤠᤵᤋᤢᤀᤠᤱ ᤐᤳᤜᤧ - ᤀᤠᤒᤥ-ᤀᤠᤔᤥᤖᤧ ᤔᤧᤴᤍᤱᤍᤱ ᤋᤢᤰᤂᤣ ᤁᤧᤈᤥᤃᤧᤛᤡᤀᤠᤱ ᤐᤠᤱᤕ᤺ᤰᤁᤥ ᤏᤡ᤺ᤳᤜᤧ ᤛᤠᤵᤛᤧ ᤀᤠᤃᤧᤒᤠᤱᤄᤧᤛᤡ ॥ ᤀᤠᤱᤃᤠ᤹ᤃ ᤏᤡ᤺ᤵᤔᤠ ᤛᤠᤵᤔᤠ ᤛᤢᤖᤢᤱᤅᤠᤱ ᤀᤰᤂᤣᤸᤗᤧ ᤐᤠᤱᤕᤰᤁᤥᤀᤣ ᤕᤶᤒᤠ ᤜᤠᤱᤕᤠᤶᤈᤥᤒᤠ ᤐᤠᤣ᤺ᤰᤂᤠᤱᤅᤠᤱ ᤘᤠ᤹ᤀᤠ ॥ ᤕᤠᤶᤔᤥ ᤀᤠᤱᤃᤠ᤹ᤃ ᤐᤠᤱᤕᤰᤁᤥᤀᤣ ᤗᤠᤈᤣ᤹- ᤛᤡᤱᤒᤢᤱ ᤀᤡᤅᤢᤱᤅᤠᤱ ᤜᤡᤶᤎᤠ᤺ᤱᤅᤠᤱ ᤆᤥᤃᤢᤱ ᤛᤢᤖᤢᤱᤗᤥ ॥ ᤀᤠᤸᤗ ᤐᤠᤱᤓᤣ᤹ᤔᤥ ᤁᤧᤏᤧᤒᤠ ᤗᤠᤈᤣ᤹- ᤛᤡᤱᤒᤢᤱᤜᤠ᤹ ᤁᤧᤖᤧᤰ ᤀᤠᤶᤓᤢ᤹ ᤐᤡᤖᤠᤶᤔᤥ ॥ ᤐᤠᤵᤐᤪᤠ ᤀᤠᤶᤓᤢᤖᤧᤃ ᤛᤢᤳᤗᤠ ᤌᤡᤰᤛᤡᤳᤋᤠᤱ ᤏᤡ᤺ᤵᤔᤠ ᤛᤠᤵᤔᤠ ᤔᤧᤄᤥᤛᤢᤴ, ᤂᤧᤸᤗᤧ ᤁᤢᤖᤧᤰᤘᤠ ᤀᤠᤱᤃᤠ᤹ ᤀᤠᤄᤥᤔᤠ ᤗᤠᤈᤣ᤹- ᤛᤡᤱᤒᤢᤱᤜᤠ᤹ᤀᤠᤱ ᤁᤧᤖᤧᤰ ᤀᤠᤶᤓᤢ᤹ᤖᤧᤀᤣ ᤂᤥᤛᤢᤖᤖᤥ॥ ᤀᤡᤱᤃᤠ᤹ᤗᤠᤶ ᤌᤣᤀᤠᤱ ᤏᤡᤱᤘᤠ᤹ ᤋᤢᤰᤔᤠ ᤔᤧᤒᤠᤣ᤺ᤱᤏᤧᤴ ॥ ᤀᤠᤗᤠᤃᤡᤃ ᤏᤡᤛᤠᤶᤔᤡᤴᤏᤣ ᤁᤧᤖᤧᤰᤏᤢᤸᤗᤧ ᤕᤶᤒᤠ ᤁᤢᤴᤎᤣ ᤐᤠᤣ᤺ᤰᤂᤧᤀᤠᤱ ᤘᤠ᤹ᤖᤥ ॥ ᤁᤶᤓᤪᤰ ॥**

ᤋᤠᤒᤢᤱ: गोरखापत्रको लिम्बू भाषा पृष्ठ, वि.सं. २०६४ असोज ६, आइतबार