ᤒᤡᤷ ᤏᤧᤶᤒᤠᤱ ᤏᤢ ᤕᤠᤰᤌᤢᤱ ᤛᤠᤶᤔᤡᤗᤠ

ᤒᤤᤖᤠᤃᤡ ᤁᤠᤀᤡᤗᤠ

ᤀᤠᤒᤠᤅᤧᤏᤢ ᤛᤰᤛᤰ ᤏᤢ ᤛᤠᤵ-ᤛᤠᤵᤛᤰ ᤁᤧᤃᤵᤐᤠ ᤕᤠᤰᤌᤢᤱ ᤛᤠᤵᤛᤰᤖᤧᤴ ᤛᤠᤵᤔᤢᤴᤎᤢᤶ ᤀᤢᤏᤠᤒᤠ ᤔᤧ᤺ᤴᤜᤠᤱ ᤁᤣ᤺ᤶᤒᤠᤀᤣ ᤘᤠᤖᤥ ॥ ᤔᤠᤛᤡᤱᤔᤠ ᤀᤡ᤺ᤳᤋᤢᤒᤠ ᤛᤡᤖᤡᤈᤱᤃᤠ ᤛᤰᤛᤰᤁᤡᤴ ᤋᤩᤧᤀᤠᤱᤛᤡ ᤛᤡᤖᤡᤈᤱᤃᤠ (ᤏᤡᤛᤡᤃᤣ᤺ᤰᤐᤠ) ᤖᤧ ᤁᤥ᤺ᤳᤋᤢᤗ᤺ᤳᤋᤢ (ᤏᤠᤈᤡᤖᤡ ᤋᤱᤒᤣ᤹ ᥇᥍᥆᥊-᥇᥍᥎᥏) ᤀᤠᤱ ᤆᤥ᤺ᤰᤕᤢᤎᤡᤶᤒᤠ (ᤐᤪᤆᤗᤴ) ᤆᤥᤃᤢᤀᤠᤱ ᤁᤳᤏᤠ ᤁᤴ ᤛᤰᤛᤰᤁᤡᤴ ᤜᤡᤅᤧᤀᤠᤱ ᤌᤠᤅᤧᤒᤠᤖᤥ ॥ ᤐᤠ ᤂᤢᤏᤧ᤹ ᤁᤢᤜᤢᤰᤛᤠᤵᤐᤥ ᤁᤧᤘᤠᤒᤠ ᤐᤧᤛᤠᤐᤜᤠ᤹ᤀᤠᤱ ᤔᤡᤰᤑᤢ᤺ᤳᤗᤠ ᤒᤡ,ᤀᤣᤆ᤻ ᤜᤈ᤻ᤛᤴᤗᤧ ᤂᤥᤛᤢᤀᤠᤱ ᤛᤧ᤺ᤵᤋᤢᤒᤠ ᤀᤢᤏᤠᤒᤠ ᤛᤠᤵᤗᤠ-ᤔᤢᤴᤎᤣᤜᤠ᤹ᤀᤥ ᤕᤠᤰᤐᤡᤓᤠᤱ ᤆᤡᤈᤧᤵᤔᤠ ᤛᤢᤰᤋᤧᤳᤗᤥ ॥ ᤜᤧᤰᤁᤣᤛᤠᤱ ᤛᤡᤖᤡᤈᤱᤃᤠ (ᤏᤡᤛᤡᤃᤣ᤺ᤰᤐᤠ) ᤔᤠᤛᤡᤱᤒᤠ ᥉᥈-᥉᥉ ᤋᤱᤒᤣ᤹ ᤁᤧᤳᤔᤧᤱᤃᤧᤳ ᤌᤡᤔᤧᤴᤎᤢᤱ ᤁᤷᤂᤠ (ᤃᤥᤷᤂᤠᤗᤡ) ᤜᤠ᤹ᤖᤧ ᤕᤠᤰᤌᤢᤱᤒᤠᤜᤠ᤹ ᤔᤧᤏᤠ᤺ᤴᤍᤢᤛᤡᤀᤠᤱ ᤂᤢᤴᤜᤡ᤹ ᤗᤠᤈᤣ᤹ ᤏᤢ ᤕᤢᤰᤑᤥ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤳᤏᤠ ᤁᤷᤂᤠ (ᤃᤥᤷᤂᤠᤗᤡ)ᤜᤠ᤹ᤖᤧ ᤁᤧᤒᤥᤒᤠ ᤏᤠᤎᤡᤶᤏᤢ (ᤐᤪᤓᤠᤘ) ᤛᤥ-ᤛᤥᤖᤡᤰ ᤜᤡᤴᤍᤢ ᤛᤠᤶᤕᤥᤗᤧ ᤆᤡᤀᤧ᤺ᤵᤐᤥ ᤔᤧᤎᤩᤧᤀᤠᤱ ᤕᤠᤰᤌᤢᤱ ᤐᤠ᤺ᤴ ᤛᤠᤰᤌᤡᤶ ᤏᤢ ᤛᤠᤶᤕᤥ ᤏᤅᤣ᤺ᤰᤁᤠᤱ ᤔᤠᤛᤡᤱᤖ ᤐᤣᤒᤠᤴ ᤀᤠᤏᤡ᤹ ᤔᤡᤰ ᤋᤃᤡᤀᤣ ᤘᤠᤖᤥ ॥ ᤂᤧᤸᤗᤧ ᤂᤍᤧᤶ (ᤐᤪᤋᤡᤑᤸ) ᤀᤡᤛᤡᤰ ᤀᤢᤏᤠᤒᤠ ᤕᤧᤶᤔᤥ ᤂᤠᤛᤠᤶᤒᤠ ᤏᤢ ᤋᤠᤰᤑᤠᤍᤡᤶᤒᤠ ᤛᤠᤰᤌᤡᤶ ᤁᤧᤃᤵᤐᤠ ᤕᤠᤁᤌᤢᤱᤒᤠᤜᤠ᤹ ᤐᤠ᤺ᤴᤔᤧᤴᤍᤱᤜᤠ᤹ᤏᤢ ᤀᤰᤂᤣ᤺ᤸᤗᤧ ᤛᤠᤖᤡᤰ ᤀᤣᤃᤠᤱ ᤔᤧᤒᤥ᤺ᤰᤂᤧ ᤔᤧᤒᤣ᤺ᤀᤠᤱ ᤔᤧᤘᤠᤖᤥ ॥

ᤀᤠᤳᤋᤡᤴᤜᤠᤱ ᤛᤢᤘᤠᤱ ᤕᤠ ᤛ᤺ᤱᤈᤢᤶᤓᤥᤀᤥ ᤁᤧᤔᤠᤛᤡᤱᤒᤠᤖ ᤁᤧᤒᤣ᤺ᤰᤐᤠ ᤀᤠᤒᤠᤅᤣᤒᤠ ᤛᤠᤶᤕᤥ, ᤛᤠᤰᤌᤡᤶ, ᤔᤠᤒᤠ᤺ᤴ, ᤛᤰᤛᤰ ᤏᤢ ᤛᤠᤵᤛᤰᤗᤧ ᤋᤠᤱᤛᤧ᤺ᤵ ᤏᤢ ᤌᤥᤒᤥᤍᤡᤶ (ᤀᤢᤳᤌᤠᤴ) ᤁᤧᤈᤥ᤺ᤰᤐᤠ ᤛᤥᤎᤢᤱᤃᤧᤴᤒᤠᤜᤠ᤹ (ᤒᤡᤓᤢᤋᤡ) ᤀᤠᤵᤑᤠ᤺ᤸᤗᤧᤀᤠᤱ ᤔᤧᤛᤢ᤺ᤴᤏᤧᤸᤗᤥ ॥ ᤁᤴ ᤐᤠ᤺ᤴᤏᤡᤴ ᤁᤡᤖᤠ᤺ᤳ ᤕᤠᤰᤌᤢᤱ ᤛᤱᤅᤥ᤹ᤀᤠᤱ ᤛᤧᤰᤂᤠᤒᤠ ᤜᤧᤰᤁᤣ ᤏᤡᤍᤧᤳ ॥ ᤏᤡᤛᤡᤃᤣ᤺ᤰᤐᤠ ᤛᤡᤖᤡᤈᤱᤃᤠ ᤖᤢᤔᤣᤒᤠ ᤐᤥ᤺ᤰᤂᤧᤒᤠ ᤔᤠᤱᤓᤠ ᤕᤧᤶ ᤀᤣ᤺ᤃᤠᤱ ᤑᤣᤍᤠᤵ ᤌᤢᤶᤔᤥ᤹ᤒᤠ ᤑᤠᤰᤁᤥᤛᤣ᤺ᤰ (ᤐᤧᤏᤧ ᤋᤱᤒᤣ᤹ ᥇᥎᥋᥋), ᤐᤠ᤺ᤴᤌᤷ ᤌᤢᤶᤔᤥᤒᤠ ᤐᤠ᤺ᤴᤈᤠᤵᤛᤡᤱ (ᤏᤠᤈᤡᤖᤡ ᤋᤱᤒᤣ ᥇᥎᥍᥋), ᤀᤠᤌᤪᤣ ᤌᤢᤶᤔᤥᤒᤠ ᤗᤠᤸᤛᤥᤷ ᤛᤧᤴᤍᤠᤱ (ᤏᤠᤈᤡᤖᤡ ᤋᤱᤒᤣ ᥇᥎᥌᥆-᥇᥏᥈᥎ ᤂᤧᤳᤋᤡ), ᤔᤢᤍᤠᤛᤣ᤺ᤰ ᤑᤠᤸᤃᤢᤏᤴᤍ (ᤐᤧᤏᤣ ᤋᤱᤒᤣ ᥇᥏᥊᥋-᥈᥆᥆᥋), ᤀᤡᤔᤠᤴᤛᤡᤱ ᤆᤧᤶᤈᤱ (ᤏᤠᤈᤠᤖᤡ ᤋᤱᤒᤣ᤹ ᥇᥏᥆᥊-᥇᥏᥍᥌) ᤏᤢ ᤛᤢᤒᤣᤍᤠᤷ ᤐᤠᤈ᤻ᤒᤡᤷ ᤌᤸᤗᤱᤜᤠ᤹ᤖᤧᤴ ᤏᤢᤕᤠ᤺ᤰᤒᤰᤗᤧ ᤕᤠᤰᤌᤢᤱ ᤐᤠ᤺ᤴ, ᤛᤰᤛᤰ ᤏᤢ ᤛᤠᤵᤛᤰᤜᤠ᤹ ᤋᤠᤱᤛᤧ᤺ᤵᤋᤢ ᤌᤠᤰᤋᤢᤖᤥ ॥ ᤏᤠᤈᤡᤖᤡ ᤋᤱᤒᤣ ᥇᥏᥋᥆-᥋᥇ ᤜᤧᤱᤄᤠ᤺ᤳᤋᤡ ᤛᤢᤰᤂᤡᤶᤒᤠ ᤐᤍᤶᤛᤡᤱ ᤔᤢᤖᤡᤱᤗᤠᤜᤠ᤹ᤏᤢ ᤆᤧ᤺ᤶᤈᤱᤜᤠᤱᤜᤠ᤹ᤖᤧ ᤛᤥ-ᤛᤥᤖᤡᤰ ᤁᤠ᤺ᤴᤍᤰᤏᤢ ᤜᤢᤁᤛᤠᤵᤐᤥ᤹ ᤔᤧᤛᤠᤵᤋᤢᤒᤠ ᤆᤢ-ᤈᤢᤰᤛᤠ ᤛᤠᤵᤐᤴᤜᤠ᤹ ᤜᤢᤰᤌᤢᤵᤐᤧᤳᤋᤥ᤹ ᤔᤧᤀᤧ᤺ᤵᤋᤢᤀᤠᤱᤛᤠᤱ ᤔᤧᤗ᤺ᤳᤋᤢᤀᤠᤱ ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤰᤛᤰᤜᤠ᤹ ᤋᤠᤱᤛᤧ᤺ᤵᤔᤠ ᤏᤢ ᤌᤥᤒᤥ (ᤒᤡᤁᤠᤛ) ᤆᤥ᤺ᤰᤔᤠ ᤕᤠ᤺ᤶᤒᤰ ᤏᤡ᤺ᤶ (ᤏᤡᤖᤴᤋᤷ) ᤔᤧᤈᤥᤃᤢ ᤔᤧᤕᤢᤖᤢ ॥ ᤐᤠᤃᤴ ᤔᤠᤐᤠ᤺ᤴ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ᤖᤧ ᤋᤶᤛᤡᤴ ᤔᤧᤈᤥᤃᤢᤀᤠᤱᤗᤰ ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤰᤛᤰᤗᤧ ᤀᤠᤀᤡᤶᤒᤠ ᤕᤢᤱᤘᤠᤏᤠᤶ (ᤀᤡᤛ᤻ᤌᤡᤋᤡ) ᤂᤥᤛᤢᤒᤠᤖᤥ ॥

ᤐᤧᤏᤣ ᤋᤱᤒᤣ ᥈᥆᥆᥍ ᤀᤥ ᤏᤧᤵᤐᤠᤸ ᤗᤠᤈᤣ᤹ᤀᤥᤀᤠᤱ ᤜᤰᤆᤢᤶᤓᤥᤖᤧᤴ ᤁᤢᤕᤢᤰᤛᤡᤱ ᤐᤥ᤺ᤰᤂᤧᤀᤠᤱ ᤁᤳᤏᤠ ᤆᤥ᤺ᤰᤕᤢᤶᤓᤥᤖᤧᤴ ᤁᤢᤕᤢᤰᤛᤡᤱ ᤐᤥ᤺ᤰᤂᤧᤀᤠᤱ ᤁᤳᤏᤠ ᤆᤥ᤺ᤰᤕᤢᤶᤒᤠ ᤏᤢ ᤛᤧᤴᤗᤵᤐᤠ ᤘᤠᤏᤠᤶᤔᤥ ᤛᤢᤘᤠᤱ ᤏᤢ ᤔᤠᤒᤠ᤺ᤴ ᤔᤡ᤺ᤶ ᤁᤧᤔᤧᤵᤐᤠ ᤕ᤺ᤰ ᤕᤠᤰᤌᤢᤱ ᤛᤠᤵᤛᤰᤁᤧᤶᤒᤠᤜᤠ᤹ ᤁᤴᤗᤧᤵᤛᤠᤱ ᤀᤠᤏᤡᤛᤢᤶ ॥ ᤀᤰᤂᤣᤗ᤹ᤖᤡᤰ ᤁᤴ ᤗᤠᤶᤔᤥ᤹ ᤁᤧᤗᤠ᤺ᤵᤐᤠᤜᤠ᤹ᤀᤥ ᤏᤧᤵᤐᤠᤸᤒᤠ ᤁᤠᤈᤡᤔᤠᤴ ᤁᤴᤍᤱᤘᤠ ᤏᤢ ᤛᤠᤱᤃᤪᤠᤶᤒᤠ ᤂᤷᤃᤒᤜᤠᤍᤢᤷ ᤏᤧᤶᤒᤠᤱᤛᤡᤖᤧᤴ ᤔᤡ᤺ᤱ ᤐᤠ᤺ᤵᤔᤠ ᤛᤢᤰᤋᤧᤳ ॥ ᤜᤧᤰᤁᤣᤗ᤹ᤖᤡᤰᤁᤣ ᤔᤢᤍᤠᤛᤣ᤺ᤰ ᤑᤠᤸᤃᤢᤴᤍ ᤏᤢ ᤁᤢᤗᤠᤶ ᤁᤧᤏᤠ᤺ᤵᤐᤠ ᤛᤠᤱᤃᤪᤠᤶᤒᤠ ᤖᤴᤎᤥᤈ᤻ ᤏᤧᤶᤒᤠᤱᤛᤡᤖᤧ ᤔᤡ᤺ᤱ ᤏᤡᤱᤘᤠ᤹ᤀᤣ ᤁᤵᤔᤤ ᤐᤥ᤺ᤱᤒᤠ ᤔᤡᤱᤛᤥ ᤖᤥ ॥ ᤐᤧᤏᤣ ᤋᤱᤒᤣ ᥈᥆᥆᥏ ᤀᤠᤱ ᤁᤳᤏᤠ ᤛᤠᤱᤃᤪᤠᤶᤒᤠ ᤆᤧ᤺ᤶᤈᤱᤜᤠᤱ ᤏᤧᤵᤐᤠᤸ ᤗᤠᤈᤣ᤹ᤛᤡᤃᤠᤱ ᤗᤠᤛ᤻ᤛᤧᤀᤠᤱᤃ ᤕᤠᤰᤌᤢᤷ ᤐᤠ᤺ᤴ, ᤛᤰᤛᤰ ᤏᤢ ᤐᤠᤅᤧᤶᤒᤠ ᤛᤠᤰᤌᤡᤶᤖᤧᤴ ᤁᤥ᤺ᤶᤓᤥ ᤕᤠ᤺ᤶᤒᤰᤁᤡᤴ ᤔᤢᤴᤜᤡᤱᤅᤠᤱ ᤌᤠᤅᤧ ॥ 

ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤰᤛᤰ, ᤜᤧᤰᤁᤩᤠᤱ ᤁᤥᤕᤧᤶᤒᤠ ᤕᤠᤰᤌᤢᤱ ᤛᤠᤵᤛᤰᤗᤧᤴ ᤌᤥᤒᤥ-ᤏᤠ᤺ᤳᤗᤠ ᤆᤧᤱᤔᤠᤸᤗᤧ ᤐᤧᤏᤣ ᤋᤅᤒᤣ᤹ ᥈᥆᥈᥆ᤀᤠᤱ ᤁᤳᤏᤠᤒᤠ ᤐᤥ᤺ᤱᤃᤡᤵᤜᤠ᤹ (ᤍᤛᤰ)ᤗᤰ ᤕᤧ᤺ᤰᤕᤠᤒᤠ ᤔᤧᤵᤔᤠᤛᤠᤱ ᤐᤥ᤺ᤱ ॥ ᤋᤠᤈᤣᤗᤢᤱᤅᤥ ᤛᤠᤵᤗᤠ ᤏᤡ᤺ᤳᤜᤧ ᤁᤧᤒᤣ᤺ᤰᤐᤠ ᤏᤧᤵᤗᤠᤸᤒᤠ ᤕᤠᤰᤌᤢᤱ ᤏᤡ᤺ᤳᤜᤠᤶᤒᤠᤜᤠ᤹ᤖᤧ "ᤁᤥ᤺ᤶ" (ᤒᤡᤖᤜᤡ ᤁᤤᤗᤠ, ᤏᤠᤈᤡᤖᤡ ᤋᤱᤒᤣ᤹ ᥇᥏᥌᥍), ᤜᤢᤰᤛᤠᤵᤐᤥ ᤔᤧᤛᤠᤵᤋᤢᤒᤠ ᤛᤰᤐᤣᤘᤠᤜᤠ᤹ ᤜᤢᤰᤆᤧᤴᤗᤠᤶᤏᤢ ᤔᤧᤗ᤺ᤳᤋᤢᤀᤠᤱ ᤐᤕᤶᤒᤠ ᤆᤓᤠ᤹ ᤔᤧᤒᤡᤖᤢᤀᤠᤱ ᤔᤧᤘᤠ ᤖᤥ ॥

ᤁᤢᤜᤣ᤺ᤰᤛᤡᤱᤅᤥ᤹ ᤋᤠᤈᤣᤗᤢᤱᤏᤢ ᤕᤠᤰᤌᤢᤱ ᤛᤰᤐᤣᤘᤠ ᤔᤧᤗᤴᤍᤧᤒᤠᤛᤠᤱ ᤏᤠᤈᤡᤖᤡ ᤋᤱᤒᤣ ᥇᥏᥊᥋ ᤀᤥ ᤏᤠᤶᤎᤠ ᤛᤢᤰᤂᤡᤶᤏᤢ "ᤋᤢᤶᤍᤢᤶ ᤜᤧᤏᤠ" (ᤒᤡ,ᤒᤡ, ᤔᤢᤖᤡᤱᤗᤠ, ᤆᤴᤍᤪ ᤔᤠᤱᤕᤢᤱ) ᤔᤡᤱᤒᤠ ᤛᤰᤐᤣᤘᤠ ᤗᤶᤔᤠ ᤜᤣ᤺ᤰᤋᤧᤀᤠᤱ ᤁᤳᤏᤠᤃ ᤁᤴ ᤕᤠ᤺ᤶᤒᤰᤁᤥ᤹ ᤛᤢᤰᤂᤡᤶ ᤛᤍᤣᤛᤠᤱ ᤁᤠᤰᤏᤢ ᤋᤃᤡ ᤐᤥ᤺ᤰᤂᤧ ᤐᤣᤀᤠᤱ ᤘᤠᤖᤥ ॥ ᤛᤢᤰᤂᤡᤶ ᤕᤢᤰᤑᤥ᤺ᤸᤗᤧ ᤕᤠᤰᤌᤢᤱ ᤐᤠ᤺ᤴ ᤏᤡᤛᤠᤶᤜᤡᤶᤔᤥ᤹ ᤛᤠᤵᤔᤠ-ᤏᤡ᤺ᤵᤔᤠ ᤀᤡᤱᤍᤳ ᤐᤡᤖᤢᤀᤠᤱᤎᤥ ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤠᤵᤛᤰᤗᤧᤴ ᤌᤥᤒᤥ ᤆᤠᤸᤗᤡᤰᤁᤣ ᤀᤠᤸᤗᤧᤰ ᤐᤥ᤺ᤰᤂᤧ ᤌᤠᤅᤧ ॥ ᤏᤡ᤺ᤳᤜᤠᤵ ᤛᤠᤵᤗᤧᤵᤐᤥ᤹ ᤁᤧᤵᤔᤠᤖᤧ ᤗᤠᤃᤡᤛᤠᤱ ᤀᤡ᤺ᤳᤜᤠᤵ ᤛᤠᤵᤔᤠ ᤛᤠᤵᤐᤠᤱᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤸᤗᤧᤀᤠᤱ ᤁᤥᤕᤧᤶᤒᤠ ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤠᤵᤛᤰᤗᤧᤴ ᤌᤥᤒᤥ ᤆᤠᤸᤗᤡᤰᤁᤣ ᤀᤠᤸᤗᤧᤰ ᤐᤥ᤺ᤰᤂᤧ ᤌᤠᤱᤅᤧ ॥ ᤏᤡ᤺ᤳᤜᤠᤡ᤺ ᤛᤠᤵᤗᤧᤵᤐᤥ᤹ ᤁᤧᤵᤔᤠᤖᤧ ᤗᤠᤃᤡᤛᤠᤱ ᤀᤡ᤺ᤳᤜᤠᤵ ᤛᤠᤵᤔᤠ ᤛᤠᤵᤐᤠᤱᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤸᤗᤧᤀᤠᤱ ᤁᤥᤕᤧᤶᤒᤠ ᤕᤠᤰᤌᤢᤱ ᤛᤠᤵᤗᤰᤗᤧᤴ ᤏᤠᤶᤓᤣᤖᤧᤴ ᤁᤢᤕᤢᤰᤛᤡᤱ ᤏᤢᤖᤡᤰᤁᤠᤱ ᤐᤥ᤺ᤰᤂᤧ ॥ ᤘᤣ᤹ᤘᤣ᤹ ᤋᤠᤰᤑᤠᤖᤧ ᤕᤠᤰᤑᤠᤱᤖᤧ ᤗᤠᤃᤡᤒᤠ ᤂᤧᤍᤠ᤹, ᤛᤠᤶᤔᤡᤗᤠ᤹ ᤛᤠᤵᤐᤰᤘᤠ ᤏᤢ ᤐᤠᤱᤘᤠᤀᤡᤗᤠ ᤛᤠᤵᤔᤠ ᤋᤣ᤹ᤔᤠᤸᤗᤧᤛᤠᤱ ᤕ᤺ᤰ ᤀᤡ᤺ᤳᤜᤠᤵᤐᤠ/ᤔᤠᤜᤠ᤹ᤖᤧᤴ ᤛᤠᤘᤠ᤺ᤴ ᤐᤥ᤺ᤰᤂᤧᤀᤠᤱ ᤂᤧᤴᤜᤠ᤹ᤖᤧ ᤋᤠᤰᤑᤠᤍᤡᤶᤒᤠ ᤛᤠᤵᤛᤰ ᤔᤧᤛᤠᤵᤋᤢᤖ ᤔᤧᤘᤠᤖᤥ ॥ ᤛᤢᤰᤂᤡᤶᤏᤢ ᤛᤠᤵᤗᤴ ᤁᤧᤒᤥ᤺ᤱᤒᤠ ᤏᤡ᤺ᤳᤜᤠᤵ ᤛᤠᤵᤐᤴᤏᤥ᤹ ᤀᤡ᤺ᤳᤜᤠᤵ ᤔᤧᤛᤠᤵᤋᤢᤖ ᤁᤧᤗᤶᤒᤠ ᤏᤧᤵᤐᤠᤸᤒᤠ ᤕᤠᤰᤌᤢᤱ ᤛᤠᤶᤒᤠᤜᤠ᤹ᤀᤥ ᤋᤢᤳᤋᤢ ᤕᤧᤜᤠᤱ ᤗᤠᤀᤥ᤺ᤳᤋᤡᤷ ᤒᤡᤖᤜᤡ ᤁᤤᤗᤠᤷ ᤐᤢᤛ᤻ᤐ ᤌᤠᤶᤛᤢᤜᤠᤱᤜᤠ᤹ᤖᤧ ᤁᤢᤀᤣᤃᤠᤱ ᤁᤧᤍᤠᤒᤠ ᤔᤡᤱᤅᤡᤴ ᤏᤠᤶᤒᤡᤴ ᤏᤧᤵᤐᤠᤸ ᤐᤠᤴᤌᤷ ᤌᤢᤶ ᤁᤧᤕᤢᤱᤒᤠ ᤋᤢᤳᤋᤢ ᤒᤡᤷ ᤏᤧᤶᤒᤠᤱᤗᤥ ॥ 

ᤜᤡᤴᤈᤠ᤹ ᤘᤕᤧᤸᤗᤧᤛᤠ ᤀᤠᤒᤠᤅᤣᤒᤠ ᤛᤢᤘᤠᤱ, ᤛᤠᤵᤔᤢᤴᤎᤢᤶ, ᤔᤠᤒᤠ᤺ᤴ, ᤛᤰᤛᤰ, ᤛᤠᤵᤛᤰ ᤏᤢ ᤛᤠᤰᤌᤡᤶᤔᤥ᤹ ᤏᤡᤱᤘᤠ᤹ ᤛᤠᤖᤡᤰ ᤁᤧᤒᤡ᤹ᤒᤠ ᤔᤏᤠ ᤒᤡᤷ ᤏᤧᤶᤒᤠᤱ ᤖᤥ ॥ ᤏᤠᤛᤢᤔᤠ ᤁᤡᤖᤠ᤺ᤳ ᤋᤧᤱᤃᤵ ᤏᤢ ᤕᤠᤰᤌᤢᤱ ᤛᤢᤘᤠᤱᤒᤠᤗᤣ ᤔᤧᤍᤢᤔᤢᤒᤠ ᤋᤢᤰᤂᤣ-ᤗᤠᤰᤂᤣ, ᤔᤠᤰᤂᤡᤐᤡᤵ (ᤛᤥᤛᤴ), ᤆᤡᤀᤧ᤺ᤵ (ᤀᤢᤳᤐᤡᤍᤴ), ᤏᤢ ᤆᤡᤔᤧᤴᤍᤱᤘᤠᤒᤠ (ᤀᤢᤛᤔᤠᤴᤋᤠ) ᤖᤧ ᤗᤠᤃᤠᤵ (ᤒᤩᤒᤜᤠᤖ) ᤏᤡᤛᤢᤀᤠᤱ ᤜᤡᤴᤈᤠ᤺ᤸᤗᤧᤛᤠ ᤁᤢᤏᤧᤜᤡ-ᤏᤡᤱᤘᤠ᤹ᤀᤡᤴ ᤁᤧᤈᤡᤒᤠ (ᤀᤠᤴᤍᤥᤗᤡᤳ) ᤐᤥ᤺ᤰᤂᤧᤀᤠᤱ ᤘᤕᤧ ॥ ᤜᤧᤰᤁᤣᤀᤠᤱ ᤂᤢᤏᤧ᤹ ᤋᤠ᤺ᤴᤍᤡ ᤁᤧᤈᤡᤖᤥᤒᤠ (ᤒᤡᤍᤪᤥᤜᤡ) ᤐᤥ᤺ᤰᤂᤧ ᤗᤴᤍᤧᤖᤥ ॥ ᤁᤢᤏᤡᤱᤘᤠ᤹ ᤛᤡᤃᤠᤅᤒᤠ ᤁᤧᤈᤡᤸᤗᤧ ᤋᤃᤡᤃ ᤔᤠᤛᤡᤱᤔᤠ ᤀᤡ᤺ᤳᤋᤢᤒᤠ ᤀᤠᤒᤠᤅᤧ ᤐᤠ᤺ᤴ ᤏᤢ ᤛᤰᤛᤰ ᤋᤠᤱᤛᤧ᤺ᤵ ᤆᤥ᤺ᤰᤔᤠ ᤕᤠᤶᤒᤰᤁᤥ᤹ ᤜᤁᤕᤠᤍᤡᤶ (ᤀᤓᤡᤒᤩᤰᤋᤡ) ᤂᤥᤛᤢ ᤘᤕᤧᤒᤠ ᤁᤖ ᤂᤧᤶᤓᤠᤠᤀᤥ ᤁᤢᤏᤡᤱᤘᤠ᤹ ᤔᤧᤍᤩᤧ᤺ᤴᤏᤠᤱ ᤜᤠᤱᤌᤡᤶᤒᤠ ᤆᤢᤶᤓᤥ (ᤛᤱᤃᤌᤴ) ᤆᤥᤃᤢᤀᤠᤱ ᤜᤠᤱᤌᤡᤶᤒᤠ, ᤕᤠᤱᤈᤡᤰᤐᤠ ᤏᤢ ᤛᤢᤔᤠᤈᤡᤒᤠ ᤕᤠ᤺ᤶᤒᤰ ᤏᤢ ᤁᤢᤖᤧᤰᤛᤡᤱ ᤋᤠ᤺ᤵᤔᤠᤀᤠᤱ ᤛᤢᤘᤠᤱ ᤏᤢ ᤛᤱᤈᤢᤶᤓᤥᤖᤧᤴ ᤂᤩᤠᤶ ᤌᤥᤒᤥᤍᤡᤶᤔᤥ ᤆᤓᤠ᤹ ᤐᤡ᤹ᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤜᤠᤱᤌᤡᤶᤔᤥ᤹ ᤗᤠᤛᤧᤐᤣ ᤖᤥ ॥ ᤀᤰᤂᤣ᤺ᤸᤗᤧᤀᤠᤱ ᤐᤠ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤢᤰᤛᤡᤱ ᤆᤥᤃᤢᤒᤠ ᤗᤡᤶᤒᤢᤘᤠ᤺ᤴ ᤛᤧᤴᤗᤡ᤺ ᤌᤰᤆᤢᤶᤓᤥᤖᤧ ᤌᤥᤛᤢᤍᤡᤶᤒᤠ ᤐᤥ᤺ᤰᤂᤧᤀᤠᤱ ᤜᤠᤱᤎᤡᤶ ᤕᤠ᤺ᤶᤒᤰᤁᤥ, ᤆᤰᤔᤧᤶᤒᤢ ᤕᤠᤰᤗᤥ ॥

ᤐᤧᤏᤣ᤹ ᤋᤱᤒᤣ ᥈᥆᥈᥍-᥈᥎ ᤗᤧᤵᤛᤠᤱᤒᤡ ᤗ᤹ᤀᤠ ᤂᤢᤏᤧ᤹ ᤆᤢᤰᤋᤧᤸᤗᤧᤛᤠ ᤀᤠᤶᤓᤢᤅᤠ᤹ ᤒᤡᤷ ᤏᤧᤶᤒᤠᤱ ᤏᤢ ᤀᤠᤱᤃᤠ᤹ᤀᤡᤴ ᤏᤡ᤺ᤛᤡᤱ ᤐᤥ᤺ᤰᤂᤧᤀᤠᤱ ᤘᤕᤧᤒᤠ ᤀᤠᤏᤡᤱᤘᤠ᤹ᤀᤥ ᤕᤠᤰ ॥ ᤁᤠ᤹ᤀᤡᤀᤥ ᤂᤢᤏᤧ᤹ ᤀᤠᤶᤓᤢᤅᤠ᤹ ᤌᤠ᤺ᤵ, ᤀᤠᤱᤃᤠ᤹ ᤏᤠᤰᤐᤠ ᤌᤠ᤺ᤵᤐᤠ᤹ ॥ ᤀᤠᤱᤃᤠ᤹ ᤛᤠᤵᤛᤰᤁᤥ᤹ ᤀᤡᤃᤣ᤺ᤰᤐᤠ ᤘᤕᤠᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤴᤜᤡ᤹ᤃᤧ ᤛᤠᤖᤡᤰ ᤏᤡ᤺ᤳᤋᤠᤱᤒᤠ ᤀᤠᤃᤣᤈᤢᤶ ᤘᤕᤧ᤹ᤜᤡᤃᤧᤖᤥ ॥ ᤀᤢᤴᤜᤥ᤺ᤶᤒᤠ ᤜᤢᤰᤛᤠᤵ ᤐᤧᤛᤠᤵᤜᤠ᤹ ᤛᤠᤵᤗᤠ-ᤔᤢᤴᤎᤣᤜᤠ᤹ ᤁᤥ᤺ᤳᤋᤧᤳᤜᤢᤃᤧᤖ, ᤗᤠᤱᤕᤥ᤺ᤰ ᤆᤥᤃᤧᤳᤜᤢᤃᤧᤖ ᤔᤠᤱᤓᤠ ᤕᤖᤡᤰ ᤋᤱᤒᤣᤓᤰ ᤀᤠᤴᤜᤡᤃᤧ᤹ ᤛᤥ-ᤛᤥᤖᤡᤰ ᤘᤕᤧᤛᤡᤃᤧ ॥ ᤆᤥ᤺ᤰᤛᤠᤶᤒᤠ (ᤛᤁᤪᤡᤕ) ᤋᤢᤳᤋᤢ ᤒᤡᤷ ᤏᤧᤶᤒᤠᤱ ᤜᤧᤰᤁᤣ᤺ᤸᤗᤧᤀᤠᤱ ᤀᤢᤴᤜᤥ᤺ᤶᤒᤠ ᤜᤢᤰᤛᤠᤵ ᤐᤧᤛᤠᤵᤜᤠ᤹ ᤛᤠᤵᤗᤠ-ᤔᤢᤴᤎᤣᤜᤠ᤹ ᤁᤥ᤺ᤳᤋᤢᤖᤛᤠᤱ ᤜᤠᤱᤎᤡᤶᤒᤠ ᤕᤠ᤺ᤶᤒᤰᤁᤠᤱ ᤆᤥᤃᤢᤒᤠᤖᤧᤳᤜ ॥ ᤜᤧᤸᤗᤧᤗᤠᤃᤛ ᤂᤢᤏᤧ᤹ ᤐᤠᤴᤌᤷ, ᤋᤠᤵᤗᤡᤈᤱ ᤏᤢ ᤌᤠᤖᤠᤴ, ᤜᤧᤰᤁᤩᤠᤱ ᤌᤠᤖᤠᤴ ᤏᤢ ᤋᤠᤵᤗᤡᤈᤱ ᤏᤢ ᤛᤢᤰᤂᤡᤶᤓᤰ ᤛᤍᤣ ᤋᤠᤰᤁᤴᤍᤧᤖᤖᤰ ᤕᤠᤃᤧᤖᤥ ॥ ᤀᤰᤂᤣᤗ᤹ᤖᤡᤰ ᤜᤠᤱᤎᤡᤶᤔᤥ᤹ ᤆᤥ᤺ᤰᤛᤠᤶᤒᤠ ᤘᤕᤧᤛᤠᤱ ᤔᤠᤒᤠ᤺ᤴ, ᤛᤰᤛᤰ ᤏᤢ ᤛᤠᤵᤛᤰᤗᤧ ᤌᤥᤒᤥᤒᤣ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤵᤑᤠ᤺ᤸᤗᤧᤀᤠᤱ ᤂᤢᤏᤧ᤹ ᤔᤧᤗᤧᤖᤢᤴ ॥ 

ᤏᤠ ᤛᤢᤰᤂᤡᤶ ᤗᤧᤵᤛᤠᤱ ᤐᤠ᤺ᤴ, ᤛᤰᤛᤰ ᤏᤢ ᤁᤥᤕᤧᤶᤒᤠ ᤌᤏᤠ ᤁᤢᤍᤡᤶᤒᤠ ᤛᤠᤵᤛᤰᤁᤡᤴ ᤛᤠᤘᤠ᤺ᤴᤜᤡᤱᤗ ᤐᤳᤜᤧᤸᤗᤧ ᤁᤳᤏᤠ ᤒᤡᤷ ᤏᤧᤶᤒᤠᤱᤅᤡᤴ ᤜᤠᤱᤎᤡᤶᤔᤥ᤹ ᤗᤠᤛᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤄᤢᤶᤒᤠ ᤜᤠᤱᤈᤢᤶᤗᤧ ᤂᤢᤏᤧ᤹ᤃ ᤕᤧᤳᤗᤧᤱᤗᤧᤱ ᤐᤢᤱᤗᤠᤜᤡᤶᤔᤥ᤹ ᤛᤠᤰᤋᤢᤖᤖᤰ ᤕᤠᤃᤧ ॥ ᤁᤢᤓᤠ ᤁᤢᤓᤠᤃ ᤘᤣ᤹ᤗᤠᤈᤣ᤹ (ᤋᤧᤔᤧᤴ ᤗᤠᤈᤣ᤹) ᤂᤧᤳᤜᤡᤱ ᤐᤣᤀᤠᤱ ᤗᤠᤶᤍᤡᤰᤐᤠ ᤜᤧᤰᤁᤣ ᤕᤢᤅᤧᤆᤩᤧᤀᤠᤱ ᤘᤕᤧ ॥ ᤀᤰᤂᤣᤗ᤹ᤖ ᤗᤠᤶᤍᤡ᤺ᤰᤐᤠ ᤘᤕᤧ ᤁᤳᤋᤧᤸᤗᤧ ᤀᤠᤒᤠᤱᤒᤠ ᤗᤠᤈᤣ᤹ ᤏᤢ ᤐᤠᤱᤓᤣ᤹ ᤌᤠᤱᤒᤣᤖᤧ ᤔᤡ᤺ᤶᤗᤧ ᤁᤢᤏᤡᤱᤘᤠ᤹ ᤛᤠᤖᤡᤰ ᤐᤱᤛᤡᤅᤧᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤖᤰ ᤆᤠ᤺ᤳᤋᤢ ॥ ᤁᤧᤒᤱᤛᤡᤱᤒᤠ ᤁᤢᤏᤡᤱᤘᤠ᤹ᤒᤠᤖᤧᤴ ᤜᤠ᤺ᤶᤛᤡᤰᤘᤠ (ᤖᤥᤍᤴ), ᤔᤧᤖᤡᤱ (ᤒᤧᤍᤏᤠ)ᤜᤠ᤹ ᤛᤠᤶᤔᤡᤗᤠᤖᤧ ᤏᤠᤀᤡᤒᤣ᤺ᤰᤁᤥ᤹ ᤜᤰᤕᤠᤍᤡᤶ ᤆᤥᤃᤢᤖ ᤋᤣ᤹ᤖᤢ ॥ ᤘᤣ᤹ᤗᤠᤈᤣ᤹ᤀᤥ ᤂᤧᤳᤜᤡᤱᤅᤧᤀᤠᤱ ᤕᤢᤱᤅᤧᤸᤗᤧ ᤂᤢᤏᤧ᤹ ᤀᤡ᤺ᤳᤜᤠᤵᤋᤢᤒᤠ ᤗᤳᤌᤡᤰ ᤛᤧᤶᤔᤢᤀᤡ (ᤏᤠᤈᤡᤖᤡ ᤋᤱᤒᤣ ᥇᥏᥎᥌) ᤔᤡ᤺ᤱᤒᤠ ᤗᤰᤛᤠᤶᤒᤣ ᤜᤧᤴ ᤕᤧᤶᤗᤧᤛᤠ ᤛᤢᤰᤂᤡᤶ, ᤁᤠ᤺ᤴᤍᤰᤏᤢ ᤛᤠᤵᤗᤴ ᤐᤥ᤺ᤰᤂᤧᤀᤠᤱ ᤘᤕᤧ ॥ ᤜᤧᤰᤁᤣᤛᤠᤱ ᤋᤃᤡ (ᤏᤠᤈᤡᤖᤡ ᤋᤱᤒᤣ ᥇᥏᥎᥊) ᤏᤢᤀᤣ ᤛᤢᤰᤂᤡᤶᤏᤢ ᤛᤠᤵᤗᤴ ᤁᤧᤒᤥ᤺ᤱᤒᤠ ᤏᤡ᤺ᤳᤜᤠᤶ ᤛᤠᤵᤗᤧᤵ ᤛᤠᤵᤐᤴᤗᤠᤶᤒᤠ ᤛᤠᤶᤒᤠᤖᤧ ᤏᤠᤀᤡᤒᤣ᤺ᤰᤁᤥ ᤁᤢᤔᤡ᤺ᤱᤅᤡᤴ ᤛᤧᤖᤧᤆᤢᤖᤧᤀᤠᤱ ᤘᤕᤧ ॥ ᤌᤰᤛᤠᤶᤒᤠ (ᤛᤱᤄᤷᤛᤛᤡᤸ) ᤜᤠᤱᤎᤡᤶᤗᤧ ᤁᤢᤜᤡᤱᤔᤴᤏᤡᤴ ᤗᤢᤱᤜᤧᤰᤁᤣ ᤁᤧᤈᤠ᤹ᤒᤠ ᤆᤥᤃᤢᤐᤡᤖᤢᤛᤠᤱ ᤛᤠᤶᤒᤠᤖᤧ ᤁᤢᤏᤠᤀᤡᤒᤣ᤺ᤰᤁᤥ᤹ᤃ ᤏᤶᤏᤶᤒᤠ ᤏᤧᤷᤘᤧᤳ ᤁᤧᤘᤠᤒᤠ ᤂᤢᤏᤧ᤹ ᤔᤡᤶᤈᤡᤒᤠ, ᤗᤢᤱᤔᤠ ᤐᤜᤡ᤺ᤶᤒᤠ ᤏᤢ ᤔᤧᤖᤡᤱᤃᤧᤴ ᤀᤡᤏᤥᤍᤡᤶᤒᤠ ᤛᤠᤶᤔᤡᤗᤠ ᤛᤠᤵᤔᤠ ᤀᤠᤳᤋᤡ᤺ᤸᤗᤧᤛᤠᤱ ᤔᤧᤴᤜᤡ᤹ᤖᤢᤴ ᤜᤧᤰᤁᤣ ᤗ᤹ ॥ ᤛᤢᤔᤠᤈᤡᤒᤠ ᤆᤡᤀᤧ᤺ᤵ ᤏᤢ ᤆᤡᤔᤧᤴᤍᤱᤗᤧ ᤁᤢᤀᤳᤋᤥ (ᤒᤡᤖᤢᤍ᤻ᤍ) ᤐᤎᤢᤶᤗ᤹ᤖᤡᤰ ᤁᤧᤈᤡ ᤁᤧᤓᤥ᤺ᤱᤒᤠᤛᤠᤱ ᤁᤢᤒᤢᤱᤅᤥ᤹ᤃ ᤂᤢᤏᤧ᤹ ᤔᤡ᤺ᤶ ᤏᤢ ᤔᤣᤖᤡᤱᤗᤧ ᤛᤠᤶᤒᤠ ᤖᤥ ॥ ᤐᤏᤥᤒᤠ (ᤛᤢᤴᤍᤷ) ᤏᤢ ᤁᤢᤛᤠᤏᤢ᤺ᤖᤡᤰᤐᤠ (ᤛᤢᤗᤗᤡᤳ) ᤐᤠ᤺ᤴ ᤆᤥᤛᤠᤶᤒᤠ (ᤁᤗᤠᤳᤔᤰ) ᤐᤧᤴᤏᤠᤶᤔᤥ ᤛᤠᤵᤔᤠ ᤔᤢᤰ ᤁᤧᤃᤵᤐᤠ ᤒᤡᤷ ᤏᤧᤶᤒᤠᤱ ᤛᤠᤵᤐᤠᤴᤏᤥ ᤜᤢᤰᤁᤠᤵ ᤁᤧᤃᤵᤐᤠ ᤛᤠᤶᤒᤠ ᤔᤧᤵᤔᤠ ᤛᤢᤰᤋᤧᤳᤗᤥ ॥ ᤐᤠ ᤁᤴᤏᤧ ᤁᤢᤛᤠᤶᤒᤣᤃᤧᤴ ᤔᤢᤰ ᤗᤥ ॥

ᤍᤒᤸ ᤛᤢᤓᤠ ᤂᤷᤃ ᤒᤜᤠᤍᤢᤷ ᤏᤧᤶᤒᤠᤱᤗᤧ ᤛᤠᤵᤋᤢᤒᤠ ᤐᤧᤏᤣ ᤋᤱᤒᤣ᤹ ᥈᥆᥇᥈ ᤀᤥ ᤌᤢᤵᤐᤧᤳ ᤁᤧᤒᤥ᤺ᤱᤒᤠ "ᤁᤡᤖᤠ᤺ᤳ ᤔᤡᤰᤜᤴ ᤛᤠᤶᤗᤥ"ᤀᤡᤴ ᤕᤠᤰᤌᤢᤱ ᤛᤠᤶᤔᤡᤗᤠ ᤛᤠᤵᤛᤰᤁᤥ᤹ ᤌᤡᤰᤛᤡᤃᤣ᤺ᤰᤐᤠᤖᤰ ᤔᤧ᤺ᤴ ᤁᤴᤏᤡᤴ ᤀᤢᤏᤠᤒᤠ ᤏᤢ ᤁᤢᤛᤱ ᤛᤠᤵᤛᤰ ᤁᤧᤛᤧᤶᤒᤠ ᤀᤡᤴᤍᤥᤗᤢᤱ (ᤔᤠᤀᤡᤸ ᤀᤡᤛ᤻ᤋᤥᤴ) ᤔᤧᤵᤔᤠ ᤐᤥ᤺ᤱ ॥ ᤜᤧᤰᤁᤣᤛᤠᤱ ᤁᤴ "ᤁᤡᤖᤠ᤺ᤳ ᤔᤡᤰᤜᤴ ᤛᤠᤶᤗᤥ" ᤕᤠᤰᤌᤢᤱ ᤛ᤺ᤱᤈᤢᤶᤓᤥ ᤛᤡᤃᤠᤱ ᤛᤱᤈᤢᤶᤔᤡᤒᤠ ᤋᤥ᤺ᤴᤈᤥᤖᤧᤴ ᤌᤏᤠ (ᤆᤧᤋᤏᤠ) ᤁᤧᤍᤠ᤺ᤵᤐᤠ ᤔᤡᤰᤁᤧᤜᤶᤒᤠ (ᤈᤠᤃᤖᤴᤔᤢᤗᤰ) ᤛᤠᤶᤔᤡᤗᤠ ᤛᤠᤵᤛᤰᤗᤰ ᤘᤕᤧ ॥ ᤁᤡᤖᤠ᤺ᤳ ᤔᤡᤰᤜᤴ ᤛᤠᤶᤗᤥ ᤛᤠᤵᤗᤴ ᤐᤥ᤺ᤰᤂᤧᤒᤠ ᤔᤠᤱᤓᤠ ᥈᥆ ᤋᤱᤒᤣ ᤀᤣᤃᤠᤱᤗᤰ ᤏᤧᤵᤐᤠᤸ ᤗᤠᤈᤣ᤹ᤒᤠ ᤛᤠᤶᤒᤠᤜᤠ᤹ᤖᤧᤀᤠᤱ ᤁᤥᤕᤧᤶᤒᤠ ᤐᤠᤠᤠᤠᤱᤃᤡᤵᤖᤧ ᤌᤏᤠ (ᤕᤢᤃᤆᤧᤋᤏᤠ) ᤁᤧᤃᤵᤐᤠ ᤛᤠᤶᤔᤡᤗᤠ  ᤛᤠᤵᤔᤠ ᤔᤧᤜᤣ᤺ᤰᤋᤢᤒᤠ ᤏᤡᤍᤧᤳ ॥ 

ᤐᤧᤏᤣ ᤋᤱᤒᤣ ᥈᥆᥊᥌ ᤀᤥ ᤁᤧᤒᤥ᤺ᤱᤒᤠ ᤋᤧᤴᤜᤠ᤺ᤶᤁᤧᤈᤡᤖᤧ (ᤈᤏᤀᤠᤴᤍᤥᤗᤴ) ᤆᤥᤃᤢᤸᤗᤧ ᤕᤠᤱᤔᤥ ᤕᤰᤗᤢᤵᤘᤠᤒᤠ (ᤒᤜᤢᤍᤗᤡᤕ) ᤜᤰᤆᤢᤶᤓᤥ (ᤐᤪᤈᤠᤋᤴᤋᤪ) ᤀᤠᤏᤡ᤹ ᤜᤢᤰᤁᤥ ᤆᤢᤰᤋᤧᤀᤠᤱ ᤁᤳᤏᤠ ᤕᤖᤡᤰ ᤕᤠᤰᤌᤢᤱ ᤌᤠᤱᤒᤧᤴ ᤏᤢ ᤔᤧᤴᤜᤩᤠᤜᤠ᤹ᤖᤧ ᤀᤡ᤺ᤳᤜᤠᤵᤔᤠ ᤕᤠ᤺ᤶᤒᤰᤁᤥ ᤂᤢᤴᤜᤡ᤹ ᤏᤡᤱᤘᤠ᤹ ᤔᤧᤒᤡ᤹ᤖᤢᤖ ᤔᤧᤕᤠᤰ ॥ ᤕᤖᤡᤰ ᤋᤱᤒᤠᤖᤧ ᤛᤰᤐᤣᤘᤠᤜᤠ᤹ ᤔᤧᤗ᤺ᤳᤋᤢᤖᤀᤠᤱ ᤑᤠ᤹ᤛᤡᤱ ᤔᤧᤒᤡ᤹ᤖᤢᤖ ᤔᤧᤕᤠᤰ ॥ ᤁᤴᤁᤣᤒᤠ ᤕᤠ᤺ᤶᤒᤰᤗᤧ ᤕᤠᤰᤌᤢᤱ ᤛᤠᤶᤔᤡᤗᤠ ᤛᤠᤵᤛᤰᤁᤡᤴ ᤁᤢᤴᤎᤣᤍᤠᤱᤒᤠ ᤐᤥ᤺ᤱᤗ ᤋᤃᤡ ᤐᤥᤖ ᤐᤳ ॥

ᤛᤢᤰᤂᤡᤶᤒᤠ ᤕᤠᤰᤌᤢᤱ ᤛᤠᤵᤛᤰᤗᤧᤴ ᤌᤥᤒᤥ ᤛᤠᤵᤔᤢᤴᤎᤢᤶᤔᤡᤴ ᤘᤣ᤹ ᤛᤢᤕᤧᤶᤔᤥ᤹ ᤘᤣ᤹ ᤋᤧᤴᤏᤥ ᤐᤥᤎᤰ ᤆᤥ᤺ᤰᤔᤠᤸᤗᤧ ᤏᤢ᤹ᤒᤡᤑᤠᤱ ᤒᤡᤷ ᤏᤧᤶᤒᤠᤱᤗᤧᤴ ᤁᤴ ᤛᤠᤶᤔᤡᤗᤠᤛᤢᤱᤗᤧ ᤕᤠᤶᤒᤣᤀᤥᤖᤰ ᤁ᤹ᤀᤥ ᤏᤡᤱᤘᤠ᤹ ᤋᤣᤛᤢᤶ ॥ 

ᤁᤴ ᤛᤠᤶᤔᤡᤗᤠ ᤛᤢᤱᤛᤡᤃᤠᤱ ᤕᤧᤳᤜᤡ ᤛᤠᤶᤔᤡᤗᤠᤜᤠ᤹ᤖᤰ ᤔᤧᤕᤠᤰ ॥ ᤏᤠᤈᤡᤖᤡ ᤋᤅᤒᤣ ᥇᥏᥎᥊ ᤀᤥᤏᤢ ᥇᥏᥏᥏ ᤋᤱᤒᤣ ᤛᤡᤃᤠᤱ ᤛᤠᤵᤋᤧᤒᤠ ᤜᤧᤰᤁᤩᤠᤱ ᤛᤢᤰᤂᤡᤶᤏᤢ ᤛᤠᤵᤗᤴ ᤁᤧᤒᤥ᤺ᤱᤒᤠ ᤛᤠᤵᤐᤰᤘᤠ ᤏᤢ ᤛᤠᤵᤐᤴᤜᤠ᤹ ᤏᤢ ᤋᤃᤡᤀᤥ ᤌᤢᤵᤐᤧᤳ ᤐᤥ᤺ᤰᤂᤧᤆᤢᤖᤧᤒᤠ ᤛᤠᤶᤔᤡᤗᤠᤜᤠ᤹ᤖᤰ ᤁᤴ ᤛᤢᤱᤅᤥ᤹ ᤔᤧᤕᤠᤰᤗᤥ ॥ ᤁᤴ ᤛᤠᤶᤔᤡᤗᤠᤜᤠ᤹ᤀᤥ ᤔᤡ᤺ᤶ, ᤗᤢᤱᤔᤠᤐᤜᤡ᤺ᤶ ᤏᤢ ᤀᤡᤏᤥᤃᤧᤴ ᤜᤧᤰᤁᤩᤠᤱ ᤏᤠᤵᤔᤡ ᤜᤡᤱᤔᤴᤖᤧ ᤆᤡᤔᤧᤴᤍᤱ (ᤘᤡᤛᤱᤃᤋᤡ) ᤏᤢ ᤑᤧᤴᤘᤠᤏᤠᤶ (ᤘᤡᤁᤪᤡᤋᤡ) ᤒᤠ ᤌᤏᤠᤖᤧᤴ ᤐᤏᤥᤃᤧᤶᤒᤠ ᤜᤰᤕᤠᤍᤡᤶ ᤐᤥ᤺ᤰᤂᤧᤀᤠᤱ ᤘᤠᤒᤠ ᤀᤠᤏᤡᤛᤢᤶ ॥

ᤁᤴ ᤛᤢᤱ ᤛᤡᤃᤠᤱᤒᤠ ᤌᤡᤰᤛᤡᤃᤣ᤺ᤰᤐᤠ ᤛᤠᤶᤔᤡᤗᤠ ᤔᤧᤏᤜᤰᤔᤠᤏᤠ ᤏᤧᤵᤑᤢᤖᤧ ᤔᤡ᤺ᤶᤗᤧᤴ ᤔᤥᤒᤵᤐᤠ ᤛᤰᤛᤠᤵ (ᤜᤖᤵ) ᤜᤠ᤹ᤖᤧ ᤌᤠᤱᤒᤧᤴ ᤕᤥᤍᤱᤒᤠ ᤏᤧᤷᤘᤧᤳᤗᤧ ᤁᤢᤳᤆᤢᤘᤠ ᤁᤧᤎᤰᤐᤠ ᤕᤠᤶᤏᤡ᤺ᤶᤖᤧ ᤐᤏᤥᤖᤡᤰ ᤛᤠᤶᤗᤥᤃᤧᤴ ᤜᤁᤕᤠᤍᤡᤶ ᤐᤡᤖᤢᤀᤠᤱ ᤘᤠ-

ᤌᤣᤀᤠᤱ ᤁᤧᤏᤡ᤺ᤀᤠᤎᤰ-

ᤔᤧᤴᤏᤡᤆᤄᤵ ᤂᤧᤶᤓᤠ ᤆᤧᤸᤗᤧᤰᤗᤧᤰ ᤁᤧᤖ᤹ᤒᤠᤒᤣ ᥄

ᤀᤠᤳᤋᤡᤕᤥ ᤀᤠᤍᤢᤶᤛᤡᤛᤠᤱ ᤌᤣᤀᤠᤱ ᤁᤧᤏᤠᤖᤠᤀᤡᤴ

ᤌᤥ᤺ᤰᤑᤧᤳᤗᤠ ᤐᤥ᤺ᤱᤒᤠᤒᤣ ᥄

(ᤐᤠ ᤁᤴ ᤛᤢᤱ ᤔᤧᤴᤜᤰᤔᤠᤏᤠ ᤏᤧᤵᤑᤢᤖᤧ ᤔᤡ᤺ᤶ, ᤆᤡᤖᤡ ᥇)

ᤔᤏᤠᤖᤧ ᤜᤡᤱᤔᤴ ᤏᤢ ᤁᤢᤘᤤᤴᤏᤡᤴ ᤛᤵᤑᤠ᤹ᤒᤠ ᤕᤠ ᤌᤡᤰᤏᤠᤶᤒᤠ ᤘᤠᤛᤠᤱ ᤔᤏᤠᤖᤧ ᤜᤡᤱᤔᤴᤏᤡᤴ ᤐᤣᤕᤠᤰᤐᤠ ᤆᤥ᤺ᤰᤔᤠᤏᤧᤓᤃᤪ ᤔᤠᤱᤗᤡᤱᤘᤠ ᤜᤧᤰᤁᤣ ᤑᤢᤱᤜᤡᤰ ᤛᤡᤃᤠᤱ ᤐᤣ᤺ᤰᤔᤠᤀᤠᤱ ᤑᤢᤱᤅᤡᤴ ᤆᤡ᤺ᤶᤔᤠᤎᤠᤔᤠ ᤆᤥ᤺ᤰᤔᤠ ᤔᤧ᤺ᤸᤗᤥᤓᤠᤱ ᤛᤠᤶᤒᤠᤖᤧ ᤛᤢᤏᤠᤀᤡᤱ ᤀᤠᤒᤡᤖᤧᤀᤠᤱ ᤘᤠ-

ᤀᤠᤴᤜᤡ᤹ ᤑᤢᤱᤀᤡᤰ ᤗᤢᤶᤔᤥ᤹ ᤀᤠᤘᤠᤛᤡ᤹

ᤁᤵᤔᤥ ᤀᤠᤴᤍᤧᤴ

ᤀᤠᤳᤋᤡᤴ ᤑᤢᤱᤅᤡᤴ ᤁᤧᤍᤢᤒᤢ ᥅

ᤀᤠᤳᤋᤡᤴ ᤑᤢᤱᤅᤡᤴ ᤁᤧᤘᤠᤖᤢ ᥅

ᤀᤠᤴᤜᤡ᤹ ᤔᤧᤴᤜᤠ᤺ᤶᤍᤡᤱ ᤕᤠᤵᤔᤡ

ᤔᤠᤱᤗᤡᤱᤘᤠ ᤁᤢᤛᤡᤰ ᤀᤶᤓᤠ ᤑᤢᤱᤜᤠ᤹

ᤆᤡ᤺ᤶᤔᤠᤎᤠᤔᤠᤀᤠᤱ ᤐᤣ᤺ᤰᤔᤠ ᤔᤧᤏᤢ᤹ᤏᤧᤴ

(ᤐᤠ ᤁᤴ ᤛᤢᤱ ᤀᤠᤳᤋᤡ ᤀᤠᤍᤢᤔᤧᤒᤣ ᥄ ᤆᤡᤖᤡ ᥇᥆)

ᤌᤡᤰᤕᤧᤶᤒᤠ ᤌᤡᤰᤏᤠᤶᤒᤠ ᤔᤏᤠᤜᤡᤱᤔᤴᤏᤡᤴ ᤛᤍᤣ ᤐᤏᤥᤃᤧᤴ ᤀᤥᤔᤢᤗᤠ᤹ᤒᤠ ᤔᤧᤘᤠᤏᤧᤴᤗᤥ ॥ ᤛᤥ᤺ᤰᤏᤠᤒᤠ ᤋᤠᤖᤠᤵᤜᤠ᤹ᤀᤠᤱ ᤆᤥ᤺ᤳᤗᤢᤱᤎᤥ ᤛᤍᤣᤃ ᤁᤧᤵᤐᤠ ᤔᤧ᤺ᤸᤗᤥ ॥ ᤐᤏᤥᤃᤧᤴ-ᤀᤡᤏᤥᤃᤧᤴ, ᤀᤣ᤺ᤵᤔᤠ-ᤜᤠ᤺ᤵᤔᤠᤖᤧ ᤌᤡᤶᤛᤢᤒᤠ ᤜᤡᤱᤔᤴᤏᤥ᤹ ᤗᤢᤱᤍᤢᤰᤔᤠ ᤏᤢ ᤔᤡ᤺ᤶᤖᤧ ᤑᤠ᤹ᤛᤡᤱ ᤁᤧᤒᤡ᤹ᤒᤠ ᤋᤣ᤺ᤱᤈᤢᤶ ᤔᤧᤜᤥ᤺ᤵᤛᤠᤱ, ᤕᤠᤵᤔᤡᤖᤧ ᤔᤡᤰᤘᤠᤖᤧ ᤔᤧᤸᤗᤢᤱ ᤜᤥ᤺ᤵᤛᤠᤱ, ᤜᤡᤱᤔᤤ ᤐᤥ᤺ᤱᤒᤠᤖᤧᤳᤜ ᤔᤏᤠᤜᤠ᤹ᤖᤧ-

ᤁᤵᤔᤥ ᤀᤣ᤺ᤵᤔᤠᤖᤧ ᤗᤠᤶᤎᤠ᤺ᤴ ᤜᤥ᤺ᤵᤛᤠᤱ

ᤀᤣ᤺ᤵᤔᤤ ᤐᤥ᤺ᤰᤂᤧ

ᤁᤵᤔᤥ ᤔᤡᤰᤘᤠᤜᤠ᤹ᤖᤧ ᤔᤧᤸᤗᤢᤱ ᤜᤥ᤺ᤵᤛᤠᤱ

ᤜᤠ᤺ᤵᤔᤤ ᤐᤥ᤺ᤰᤂᤧ

ᤁᤢᤏᤢᤶᤔᤥ ᤁᤵᤔᤥ

ᤗᤢᤱᤔᤠ᤹ ᤛᤩᤠ᤺ᤳ ᤏᤢ ᤔᤡᤶᤈᤡ

ᤜᤠᤱᤜᤠᤱᤘᤠ ᤏᤢ ᤀᤥᤔᤢᤜᤠ᤹ ᤔᤧᤜᤥ᤺ᤵᤛᤠᤱ

ᤜᤡᤱᤔᤤ ᤐᤥ᤺ᤰᤂᤧ ॥

(ᤐᤠ ᤁᤴ ᤛᤢᤱ ᤜᤡᤱᤔᤤ ᤐᤥ᤺ᤰᤂᤧ, ᤆᤡᤖᤡ ᥌)

ᤁᤴ ᤁᤧᤳᤋᤰᤁᤧᤴ ᤕᤥᤒᤠ ᤐᤏᤥᤖᤡᤰ ᤁᤢᤛᤡᤱᤁᤧᤏᤡ᤺ᤵᤐᤠᤜᤠ᤹ᤖᤧᤃ ᤕᤠᤵᤔᤡ ᤜᤡᤱᤔᤴᤏᤥ ᤁᤧᤈᤢᤰᤐᤠ ᤌᤠᤱᤒᤠᤱ-ᤛᤱᤔᤠᤱ, ᤀᤡᤏᤥᤃᤧᤴ-ᤐᤏᤥᤃᤧᤴ, ᤛᤢᤖᤡ᤺ᤳ-ᤁᤣᤈᤱ ᤀᤡᤛᤡᤰᤐᤠ ᤐᤠ᤺ᤴᤏᤥ, ᤏᤡᤱᤘᤠ᤹ᤀᤡᤴ ᤔᤧᤴᤍᤣᤛᤢᤴ, ᤌᤩᤠᤱᤓᤠᤸᤗᤧ ᤁᤧᤄᤡ᤺ᤰᤐᤠᤛᤠᤱ ᤂᤧᤴᤜᤠ᤹ᤃ ᤕᤠᤵᤔᤡ ᤜᤡᤱᤔᤴᤖᤧᤴ ᤛᤧᤰᤂᤠᤒᤠ ᤏᤡᤛ᤻ᤛᤣᤖᤥ ॥ ᤜᤧᤰᤁᤩᤠᤱᤛᤧ ᤛᤠᤶᤒᤠ᤺ᤸᤗᤧ ᤛᤠᤵᤋᤢ-

ᤁᤢᤓᤠᤖᤧ ᤜᤡᤱᤔᤴᤏᤡᤴ ᤀᤶᤓᤠ ᤌᤢ᤺ᤰᤘᤠ-ᤔᤠᤱᤔᤣᤖᤧ ᤘᤠᤍᤣ᤹ᤖᤢᤒᤠᤜ

ᤁᤢᤓᤠᤖᤧ ᤛᤧᤵᤔᤠᤱᤜᤠ᤹ᤀᤠᤱ ᤀᤶᤓᤠ ᤛᤢᤖᤡ᤺ᤳ-ᤁᤧᤈᤱᤗᤧ

ᤑᤧ᤺ᤛᤢᤍᤣ᤹ᤖᤢᤒᤠ

ᤁᤖ-

ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤴ ᤕᤠᤰᤁᤣ᤺ᤰᤁᤣ ᤔᤣ᤺ᤴᤍᤢᤰ

ᤀᤠᤰᤁᤣᤖᤡᤰ ᤌᤢ᤺ᤰᤘᤠ-ᤔᤠᤱᤔᤣᤖᤧ ᤘᤠᤍᤣᤷᤔᤠ ᤛᤢᤰᤋᤢ

ᤜᤧᤰᤁᤣᤀᤠᤱ

ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴᤏᤠᤱ ᤛᤡᤱᤓᤧᤰᤘᤠᤀᤣ ᤔᤧ᤺ᤴᤍᤢᤰ

ᤀᤠᤰᤁᤣᤖᤡᤰ ᤛᤢᤖᤡ᤺ᤳ-ᤁᤧᤈᤱᤗᤧ ᤑᤧᤔᤠ ᤛᤢᤰᤋᤢ

(ᤐᤠᤃᤴ ᤛᤢᤱ, ᤌᤢ᤺ᤰᤘᤠ-ᤔᤠᤱᤔᤣ᤹ ᤛᤢᤖᤡ᤺ᤳ-ᤁᤣᤈᤱ ᤏᤢ ᤀᤠᤱᤃᤠ᤹. . . ᤆᤡᤖᤡ ᥇᥊)

ᤀᤠᤜᤡᤱᤒᤠ ᤕᤢᤱᤘᤠᤏᤠᤶᤔᤥ ᤕᤠᤵᤔᤡᤖᤧᤴ ᤀᤠᤵᤑᤠᤸᤛᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴ ॥ ᤋᤠᤃᤧᤖᤠ ᤏᤡᤱᤘᤠ᤹ᤓᤢ ᤔᤠᤱᤗᤧ ᤆᤀᤡ᤺ᤳᤜᤠᤱ ᤔᤏᤠᤖᤧᤀᤠᤱ ᤆᤥ᤺ᤰ (ᤏᤡᤷᤔᤠᤴ)ᤏᤡᤴ ᤆᤥᤃᤢ-ᤕᤛ᤻ᤛᤢᤷ ᤕᤠᤱᤔᤥ ᤆᤥᤃᤢ ॥ ᤐᤥ᤺ᤱᤔᤠ-ᤔᤠ᤺ᤵᤔᤠᤖᤧ ᤁᤧ᤺ᤰᤁᤠᤀᤡᤴ ᤁᤧᤈᤥ᤺ᤰᤐᤠᤖᤧ ᤁᤢᤏᤡᤱᤘᤠ᤹ᤒᤠ ᤐᤠ᤺ᤴᤖᤧ ᤆᤥ᤺ᤳᤗᤢᤱ ᤔᤧᤸᤗᤛ᤻ᤛᤧᤓᤰ, ᤁᤢᤍᤡᤶᤍᤡᤶ ᤔᤧᤱᤃᤧᤳᤋᤣᤓᤰ ᤀᤰᤂᤣᤗ᤹ᤖᤡᤰᤁᤣ ᤀᤡ᤺ᤖ᤹ ᤐᤣ᤺ᤰᤐᤠᤴ ᤀᤡ᤺ᤖ ᤐᤣ᤺ᤰᤗᤥ ॥ ᤁᤢᤕᤠ᤺ᤶᤒᤰᤗᤧ (ᤁᤠᤷᤕ) ᤆᤥ᤺ᤳᤗᤢᤱ ᤗᤛ᤻ᤛᤢᤀᤠᤱ ᤁᤢᤍᤡᤶᤍᤡᤶᤒᤠ ᤐᤥ᤺ᤱᤅᤠᤱᤗᤰ ᤔᤏᤠ᤺ᤸᤗᤧ ᤁᤢᤜᤡᤱᤔᤴᤏᤢ ᤛᤧᤴᤗᤵ ᤂᤥᤛᤢᤖᤥ ᤗ᤹ᤖᤡᤰ ᤗᤢᤱᤔᤧᤴᤍᤡᤱ ᤜᤰᤕᤠᤍᤡᤶ ᤔᤥᤒᤵᤐᤠ ᤛᤰᤛᤠᤵᤜᤠ᤹ᤖᤧ ᤔᤧᤒᤡᤖᤢ-

ᤀᤠᤸᤗ ᤁᤴ ᤕᤢᤰᤔᤡᤖᤠᤀᤡᤸᤗᤧ ᤂᤧᤴ ᤋᤠᤶᤓᤢᤱᤔᤥ ᤁᤧᤕᤧᤰᤐᤠ

ᤁᤩᤧᤒᤠ᤹ ᤔᤠ᤺ᤰᤕᤢ ᤁᤢᤎᤢᤖᤢᤵᤐᤠᤜᤠ᤹ ᤔᤡᤔᤧᤎᤡᤰᤁᤠᤱ ᤂᤩᤠᤶ ᤔᤧᤛᤧᤀᤡᤖᤠ

ᤂᤧᤵᤔᤥᤒᤠ ᤐᤥ᤺ᤰᤗᤠ-ᤁᤢᤗᤢᤱ, ᤋᤠᤒᤢ-ᤛᤡᤱᤗᤠᤱᤜᤠ᤹

ᤂᤩᤠᤶ ᤔᤡᤎᤡᤰᤁᤠᤱ ᤂᤠᤵᤐᤢ ᤐᤥᤱᤅᤡᤖᤠ

ᤜᤧᤰᤁᤣᤜᤠᤱᤗᤰ ᤂᤧᤴ ᤋᤠᤶᤓᤢᤱᤅᤡᤴ ᤛᤧᤴᤍᤪᤱᤗᤠ ᤏᤡᤎᤠ᤺ᤵᤐᤡᤖᤠ

ᤐᤠᤱᤓᤣ᤹ ᤛᤠᤒᤠᤜᤠ᤹ ᤂᤧᤵᤔᤥ ᤔᤧᤒᤣ᤺ᤰᤁᤠᤱ

ᤐᤩᤠᤱᤛᤡ ᤏᤢ ᤀᤡᤰᤋᤠᤵ ᤔᤧᤓᤧ᤺ᤰᤂᤢᤀᤡᤖᤠ

ᤋᤠᤶᤓᤢᤱᤅᤡᤸᤗᤧ ᤁᤢᤖᤧᤰᤘᤠ ᤂᤧᤴ ᤀᤡᤳᤌᤢᤱ ᤐᤥ᤺ᤱᤅᤡᤖᤠ

ᤂᤴᤂᤠᤱᤃ ᤐᤠᤱᤓᤣ᤹ ᤛᤠᤒᤠᤜᤠ᤹ ᤂᤧᤵᤔᤥ ᤋᤠᤱᤃᤣᤆᤠᤏᤢ

ᤏᤡᤕᤠᤖᤠ ᤁᤢᤎᤠ᤺ᤵ ᤛᤠᤳᤋᤠᤗᤢᤱᤗᤧᤱ ᤔᤧᤈᤥ᤺ᤰ ᤔᤧᤈᤠᤀᤡᤖᤠ

ᤂᤠ ᤀᤰᤁᤣᤖᤡᤰ ᤀᤶᤓᤠ ᤀᤠᤔᤡᤰᤗᤧ ᤏᤡ᤺ᤛᤢᤖ ᤂᤧᤴ ᤋᤠᤶᤓᤢᤱᤔᤥ

ᤔᤧᤴᤍᤱᤍᤱ ᤕᤢᤰᤔᤡᤖᤠ ᤗᤠ᤺ᤳᤗ ᤐᤳ ॥

(ᤐᤠ ᤁᤴ ᤛᤢᤱ ᤕᤢᤰᤔᤡᤖᤠ ᤗᤠ᤺ᤳᤗ ᤐᤳ ᤆᤡᤖᤡ ᥎)

ᤋᤢᤳᤋᤢ ᤒᤡᤷ ᤏᤧᤶᤒᤠᤱᤗᤧᤴ ᤁᤧᤜᤡ-ᤏᤡᤱᤘᤠ᤹ ᤁᤧᤍᤢᤶᤒᤠ ᤏᤠᤰᤆᤠ ᤏᤢ ᤛᤠᤵᤋᤧᤒᤠ ᤐᤏᤥᤃᤧᤴ, ᤁᤢᤈᤠᤛᤥᤖᤡᤰᤐᤠ ᤏᤢ ᤁᤢᤒᤣ ᤁᤧᤕᤠᤰᤐᤠ ᤛᤠᤶᤔᤡᤗᤠᤜᤠ᤹ᤖᤧ ᤕᤠᤰᤌᤢᤱ ᤛᤠᤵᤛᤰᤁᤡᤴ ᤁᤢᤴᤎᤣᤍᤠᤱᤒᤠ ᤆᤥᤃᤢᤀᤠᤱ ᤘᤠᤓᤠᤱ ᤔᤢᤖᤠ ᤔᤧᤴᤕᤠᤀᤣ ᤔᤧᤵᤔᤠ ᤛᤢᤰᤋᤧᤳᤗᤥ ॥ ᤛᤢ᤺ᤸᤗᤡᤰᤛᤠᤱ ᤛᤒᤵᤐᤠ ᤛᤠᤶᤔᤡᤗᤠᤖᤰ ᤁᤧᤛᤠᤵᤐᤠ ᤛᤠᤶᤒᤠᤓᤠᤱ ᤒᤡᤷ ᤏᤧᤶᤒᤠᤱ ᤔᤧᤵᤔᤠ ᤐᤥ᤺ᤱ ॥ ᤋᤠᤕᤧᤶᤒᤠ ᤕᤧᤴᤜᤠ᤹ᤀᤥᤣᤀᤠᤱ ᤁᤢᤏᤠᤰᤆᤠᤗᤠᤶᤏᤢ ᤕᤠᤰᤌᤢᤱ ᤛᤠᤵᤛᤰᤗᤧ ᤐᤠᤃᤴ ᤜᤧᤰᤁᤣᤍᤱᤒᤠ ᤕᤔᤧᤸᤗᤢᤱᤒᤠ ᤆᤓᤠ᤹ ᤂᤥᤔᤠ ᤛᤢᤰᤋᤢᤖᤓᤠᤱ ᤏᤛᤠ᤺ᤴ ᤆᤥᤃᤢᤱᤗᤥ ॥

ᤖᤢᤔᤣᤒᤠ ᤕᤧᤴ

᥇᥌ ᤕᤧᤴᤏᤡ᤺ᤳ, ᤁᤰᤑᤧᤰᤘᤠ ᤗᤠ, ᥈᥆᥋᥍

ᤎᤢᤶᤒᤠᤖᤠᤜᤡ, ᤛᤢᤁᤣᤎᤠᤖᤠ

ᤁᤠ,ᤔ,ᤏ,ᤐᤠ,-᥊

(ᤛᤠᤶᤒᤠ ᤒᤡᤷ ᤏᤧᤶᤒᤠᤱᤖᤧᤴ ᤐᤣᤏᤡ ᤋᤱᤒᤣ᤹ ᥈᥆᥋᥍ ᤀᤥ ᤛᤠᤵᤗᤴ ᤁᤧᤒᤥ᤺ᤱᤒᤠ ᤔᤧᤴᤜᤰᤏᤠᤒᤠ ᤏᤧᤵᤑᤢᤖᤧ ᤔᤡ᤺ᤶ ᤛᤠᤶᤔᤡᤗᤠ ᤛᤢᤱᤗᤠᤶ, ᤆᤡᤖᤡ ᤀ-ᤀᤢ᤺)